Angelique Midthunder
Angelique Midthunder (folút: Angelique Roehm Midthunder; Bangkok, 1970) is in Amerikaansk aktrise, stuntfrou en casting director fan Taisk-Dútsk komôf.
| Angelique Midthunder | ||
 akteur
| ||
| persoanlike bysûnderheden | ||
| echte namme | Angelique Roehm Midthunder | |
| nasjonaliteit |  Amerikaansk
| |
| berne | 1970 | |
| berteplak | Bangkok (Tailân) | |
| etnisiteit |  Dútsk  Taisk
| |
| jierren aktyf | 1991 – no | |
| offisjele webside | ||
| www.midthundercasting.com | ||
Libben en karriêre bewurkje seksje
Midthunder waard berne yn 'e Taiske haadstêd Bangkok út in Taiske mem en in Dútske heit, mar emigrearre op jonge leeftyd mei har âlden en har broer Mark nei de Feriene Steaten. Hja begûn yn 'e filmyndustry doe't hja begjin njoggentiger jierren út klearbare nijsgjirrigens besleat te reägearjen op in iepen oprop foar in Japanske film, foar figuranten dy't hynsteride koene. Nei't se as aktrise yn ferskate Amerikaanske en bûtenlânske films spile hie, sette se ek útein mei te wurkjen as stuntfrou, en letter ûntdiek se har belangstelling foar it castingproses (it sykjen fan gaadlike akteurs foar de beskikbere rollen) en waard se casting director.
Midthunder kombinearre alletrije funksjes en wurke lange tiid yn Los Angeles, mar yn 2005 ferfear se nei Santa Fe, de haadstêd fan 'e súdwestlike Amerikaanske steat Nij-Meksiko, dêr't har Midthunder Casting al rillegau it wichtichste en ynfloedrykste castingburo fan 'e steat waard. Dêrby hat se har spesjalisearre yn it casten fan Yndiaanske rollen (dy't se sels ek gauris spile hat), en lit se har foarstean op it kombinearjen fan it behâld fan 'e kulturele yntegriteit fan 'e Yndianen mei de kreätive frijheid fan 'e filmmakkers.
Sûnt de iuwwiksel hat Midthunder ek wurksum west as regisseur, filmprodusinte, dokumintêremakster, senarioskriuwster en filmeditor. Yn 2006 wûn se op it Filmfestival fan Fargo de priis foar de bêste ferheljende koarte film (foar it troch har regisearre Reservation Warparties), en yn 2010 waard se (yn 'e mande mei David Rubin en Richard Hicks) nominearre foar in Emmy (de wichtichste Amerikaanske tillefyzjepriis) foar har casting fan 'e minysearje Georgia O'Keeffe. Hja is lid fan 'e Casting Society of America en de Academy of Television Arts & Sciences. Angelique Midthunder is troud mei de Yndiaanske akteur David Midthunder, dy't fan mingd Sû- en Assiniboin-komôf is. Harren dochter Amber Midthunder is ek aktrise.[1]
Keppelings om utens bewurkje seksje
- (in) Offisjele webside fan Midthunder Casting
- (in) Biografyske gegevens en filmografy fan Angelique Midthunder yn 'e Internet Movie Database (IMDb)
| Boarnen, noaten en/as referinsjes: |
|
|