Ginnifer Goodwin

Ginnifer Goodwin (echte namme: Jennifer Michelle Goodwin; Memphis, 22 maaie 1978) is in Amerikaansk film-, tillefyzje-, toaniel- en stimaktrise. Hja is it bekendst wurden mei rollen yn 'e tillefyzjesearjes Big Love en Once Upon a Time. Fierders liende se har stim oan it haadpersonaazje Judy Hopps yn 'e Disney-tekenfilm Zootopia en oan Fawn yn Tinker Bell and the Legend of the NeverBeast. Ek spile se yn films as Mona Lisa Smile, Walk the Line, He's Just Not That Into You en Killing Kennedy.

Ginnifer Goodwin
akteur
persoanlike bysûnderheden
echte namme	Jennifer Michelle Goodwin
nasjonaliteit	Amerikaansk
berne	22 maaie 1978
berteplak	Memphis (Tennessee)
etnisiteit	Ingelsk Joadsk Welsk
jierren aktyf	2000 – no
offisjele webside
Ginnifer Goodwin op Twitter

Libben en karriêre

Jonkheid en oplieding

Goodwin waard yn 1978 berne yn Memphis, yn 'e Amerikaanske steat Tennessee. Har heit, Tim Goodwin, wie foar syn pinsjonearring muzykprodusint, wylst har mem, Linda Kantor, in leararesse wie dy't húsfrou waard om 'e bern grut te bringen, en dêrnei by FedEx en Apple wurke. Goodwin hat in jongere suster, Melissa, dy't animator fan stop-motionfilms is en û.m. meiwurke hat oan Robot Chicken. Goodwin is oan har heitekant fan Ingelsk en Welsk etnysk komôf, wylst se oan 'e kant fan har mem Joadsk bloed hat. Har beppe oan memmekant is in Asjkenazyske Joadinne. Goodwin en har suster waarden sawol kristlik as joadsk grutbrocht: sneins giene se nei de unitaryske tsjerke fan har heit, en sneons giene se mei har mem nei de synagoge. Se waarden doopt, mar hiene ek in bat mitzvah.

Yn har jonkheid wie Goodwin lid fan 'e Noardamerikaanske Federaasje fan Timpeljongerein, in joadske jeugdorganisaasje. Se folge basisûnderwiis oan 'e episkopaalske St. Mary's Episcopal School yn Memphis, en slagge yn 1996 foar har middelbere-skoaleksamens oan 'e Lausanne Collegiate School, ek yn Memphis. Dêrnei studearre se toaniel oan it Hanover Kolleezje yn Hanover (Indiana), om nei in jier oer te stappen nei de toanieloplieding fan 'e Universiteit fan Boston, dêr't se in bachelortitel behelle en cum laude ôfstudearre. Under har stúdzjetiid spile Goodwin yn ferskate koarte films fan har mei-studinten, en dêropta yn ferskate toanielstikken foar de universiteit en by pleatslike toanielselskippen. Nei't se har stúdzje yn Boston ôfrûne hie, skreau Goodwin har yn oan it Shakespeare Ynstitút yn it Ingelske Stratford-upon-Avon. Yn dyselde snuorje spile se ek as gastakteur by de Royal Shakespeare Company. It jiers dêrop bemachtige se in prestizjeus 'Acting Shakespeare Certificate' oan 'e Londenske Royal Academy of Dramatic Art (RADA).

Ginnifer Goodwin yn 2007.

Aktearkarriêre

Doe't se yn 2000 mei har wurkpaad as aktrise úteinsette, feroare Goodwin har foarnamme fan 'Jennifer' ta 'Ginnifer' om op te fallen en om 'e korrekte útspraak fan 'e namme yn har memmetaal, it Súdlik Amerikaansk-Ingelsk, oan te jaan. Nei ferskate kearen yn toanielproduksjes spile te hawwen, wie se yn 2001 foar it earst op 'e tillefyzje te sjen yn in gastrol yn 'e plysjesearje Law & Order. Har earste grutte fêste rol yn in tillefyzjesearje hie Goodwin fan 2001 oant 2003 as Diane Snyder yn Ed. Se briek troch mei har rol as Margene Heffman, yn 'e dramasearje Big Love, dy't rûn fan 2006 oant en mei 2011, oer in polygamistyske mormoan mei trije froulju. Ek spile Goodwin yn tillefyzjefilms as Porn 'n Chicken (2002) en Five (2011). Yn 'e tillefyzjefilm Killing Kennedy, oer de moard op John F. Kennedy, fertolke se yn 2013 de rol fan Jackie Kennedy.

Fierders wurke se ferskate kearen as stimaktrise mei oan animaasjesearjes, lykas Robot Chicken (2005), SpongeBob SquarePants (2011) en Sofia the First (2014). Yn 2012 hie Goodwin wer in fêste rol yn 'e searje Electric City, as Jean Marie St. Cloud. Ien fan har bekendste rollen hie se as leararesse Mary Margaret Blanchard en dy har alter ego, it mearkesfiguer Sniewytsje, yn 'e fantasyrige Once upon a Time. Dêryn hearde se fan seizoen 1 oant en mei 6 ta de fêste cast, wylst se yn 'e lêste ôflevering fan seizoen 7 in gastrol ferfolle. Foar har rol yn Once Upon a Time waard Goodwin trije kear nominearre foar in Teen Choice Award en fiif kear foar in People's Choice Award. Goodwin hie noch ferskate gastrollen yn tillefyzjesearjes as The Twilight Zone, Heartstrings en Earth to Ned. Yn 2019 hie se in fêste rol yn it earste seizoen fan Why Women Kill, en yn 2022 waard se cast yn 'e haadrol yn 'e searje Pivoting.

Op it wite doek makke Goodwin har debút yn 2003 yn Mona Lisa Smile. Se spile ek yn films as Win a Date with Tad Hamilton! (2004), In the Land of Women (2007), Birds of America (2008), A Single Man (2009), Ramona and Beezus (2010) en Something Borrowed (2011). Foar har rol yn dy lêste film waard se nominearre foar in Teen Choice Award. Yn 'e biografyske film Walk the Line (2005) fertolke se de rol fan Vivian Liberto, de earste frou fan countryleginde Johnny Cash. Yn 2006 spile se de rol fan Dori Dumchovic yn 'e swarte komeedzje Love Comes to the Executioner. Foar de rol fan Gigi Phillips yn He's Just Not That Into You waard se nominearre foar in People's Choice Award yn 'e kategory bêste trochbraak fan in aktrise.

Yn 2014 liende Goodwin har stim oan it personaazje Fawn yn 'e Disney-tekenfilm Tinker Bell and the Legend of the NeverBeast. Yn 2016 die se itselde foar Judy Hopps, de haadpersoan út 'e Disney-tekenfilm Zootopia, in knyn dy't plysje wurde wol. Dyselde rol fertolke se ek (as stimaktrise) yn it fideospultsje Disney Infinity 3.0 (2015). Foar har rol yn Zootopia waard Goodwin op 'e nij nominearre foar in People's Choice Award, diskear yn de kategory favorite stim yn in animaasjefilm, en boppedat wûn se der in Kids' Choice Award foar (dield mei har tsjinspiler Jason Bateman), in Alliance of Women Film Journalists Award en in Voice Arts Award. Fierders wie Goodwin yn 2015 op 'e tillefyzje te sjen yn it geneälogyske programma Who Do You Think You Are?, wêryn't se har stambeam werom troch de tiid folge. Yn jannewaris 2017 waard Goodwin cast yn 'e rol fan Marianne yn it toanielstik Constellations, dat dat jiers yn juny en july yn it Geffen Playhouse yn Los Angeles op 'e planken brocht waard.

Ginnifer Goodwin mei har man Josh Dallas.

Priveelibben

Goodwin fersei har yn desimber 2010 mei akteur Joey Kern, mar briek de ferloving yn maaie 2011 ôf. Neitiid krige se yn it neijier fan 2011 in relaasje mei har kollega Josh Dallas, dy't ien fan har tsjinspilers wie yn 'e searje Once Upon a Time. Hja ferloofden har yn oktober 2013 en trouden op 12 april 2014 op in geheim holden lokaasje yn Kalifornje. Goodwin en Dallas krigen twa soannen: Oliver Finlay Dallas (2014) en Hugo Wilson Dallas (2016). De húshâlding wennet anno 2018 yn Los Angeles.

Yn 2013 fertelde Goodwin yn in fraachpetear dat se, nei't se foar har stúdzje út Memphis wei gien wie, "hiel lang it joadendom efter [my] litten" hie. "Tsien jier lang wie der neat. Gjin rituelen. Gjin tradysje. Gjin mienskip." Letter fûn se har leauwe werom. Dêroer sei se: "Ik wie joadinne troch berte; no bin ik joadinne troch frije kar."

Filmografy

Filmografy as aktrise
jier	titel	rol of funksje	opmerkings
tillefyzje
2001	Law & Order	Erica	gastrol; ôfl. Myth of Fingerprints
2001–2003	Ed	Diane Snyder	fêste rol yn seizoen 2–3; 25 ôfl.
2002	Porn 'n Chicken	Maya	tillefyzjefilm
2005	Robot Chicken	ferskaat	as stimaktrise; weromkearende rol; 7 ôfl.
2006–2011	Big Love	Margene Heffman	fêste rol
2007	Big Love: In the Beginning	Margene Heffman	weromkearende rol; 2 ôfl.
2009	Crappy Holidays Presents…	n.f.t.	ôfl. Crappy Easter
2011	SpongeBob SquarePants	pearshierrige seemearmin	as stimaktrise; gastrol; ôfl. Welcome to the Bikini Bottom Triangle
2011	Margene's Blog	Margene Henrickson	gastrol; ôfl. Crush Story
2011	Five	Charlotte	tillefyzjefilm
2011–2018	Once Upon a Time	Mary Margaret Blanchard / Sniewytsje	fêste rol yn seizoen 1–6; weromkearende rol yn seizoen 7 3 × nom. People's Choice Award foar bêste aktrise yn in science fiction- of fantasysearje (2014–2016) nom. People's Choice Award foar favorite aktrise yn in dramasearje (2013) nom. People's Choice Award foar favorite tillefyzjeduo (mei Josh Dallas, 2015) 3 × nom. Teen Choice Award foar favorite aktrise yn in fantasy- of science fiction-searje (2012–2014)
2012	Electric City	Jean Marie St. Cloud	as stimaktrise; fêste rol
2013	Killing Kennedy	Jackie Kennedy	tillefyzjefilm
2014	Sofia the First	Gwen	as stimaktrise; gastrol; ôfl. Gizmo Gwen
2015	Who Do You Think You Are?	harsels	geneälogysk programma; ôfl. Ginnifer Goodwin
2019	I Am Somebody's Child: The Regina Louise Story	Jeanne Kerr	tillefyzjefilm; ek útfierend produsinte
2019	The Twilight Zone	Eve Martin	gastrol; ôfl. Point of Origin
2019	Heartstrings	Genevieve	gastrol; ôfl. These Old Bones
2019	Why Women Kill	Beth Ann	fêste rol yn seizoen 1
2021	Earth to Ned	harsels	gastrol; ôfl. Dream a Little Dream of Ned
2022	Pivoting	Jodie	fêste rol
2022	Zootopia+	Judy Hopps	as stimaktrise; op argyfmateriaal
films
2003	Mona Lisa Smile	Connie Baker
2004	Win a Date with Tad Hamilton!	Cathy Feely
2005	Walk the Line	Vivian Cash
2006	Love Comes to the Executioner	Dori Dumchovic
2007	In the Land of Women	Janey
2007	Day Zero	Molly Rifkin
2008	Birds of America	Ida Tanager
2009	He's Just Not That Into You	Gigi Phillips
2009	A Single Man	frou Strunk
2010	Ramona and Beezus	muoike Bea
2011	Take Me Home Tonight	Banky
2011	Something Borrowed	Rachel White	nom. Teen Choice Award foar favorite aktrise yn in romantyske film
2014	Tinker Bell and the Legend of the NeverBeast	Fawn	as stimaktrise
2016	Zootopia	Judy Hopps	as stimaktrise Kids' Choice Award foar favorite 'frijannen' (mei Jason Bateman) nom. People's Choice Award foar bêste stim yn in animaasjefilm
fideospultsjes
2015	Disney Infinity 3.0	Judy Hopps	as stimaktrise

Keppelings om utens

• (in) Ginnifer Goodwin op Twitter
• (in) Folsleine filmografy fan Ginnifer Goodwin yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Ginnifer Goodwin fan Wikimedia Commons.