Jenisejsk

Jenisejsk (Russysk: Енисейск, Jenisejsk) is in stêd oan de rivier de Jenisej yn de Russyske kraj Krasnojarsk.

Jenisejsk
Untsliepenis- of Uspenskikatedraal
Flagge	Wapen
Polityk
Lân	Ruslân
Kraj	Krasnojarsk
Sifers
Ynwennertal	17.795 (2021)
Oerflak	66,41 km²
Befolkingstichtens	268 ynw. /km²
Hichte	75 m boppe seenivo (sintrum)
Oar
Stifting	1619
Tiidsône	UTC +7
Koördinaten	58° 28' N 92° 9' E
Webside	Webstee Jenisejsk

Skiednis

Jenisejsk waard yn 1619 as in militêr fort stifte as earste stêd oan de rivier Jenisej. Yn 1635 krige it plak stedsrjocht. Yn de kolonisaasje fan East-Sibearje hie de stêd yn de 17e en 18e iuw in wichtige rol as oerslachplak foar goud en bont. Yn dy tiid kaam likernôch 90% fan al it Russyske goud hjir wei en de monumintale hûzen út dy tiid tsjûgje dêr noch fan. Oardel iuw lang tsjinne de stêd as poarte nei East-Sibearje.

De stêd oan it begjin fan de 20e iuw

Al sûnt de stifting wie de stêd foar minsken dy't yn ûngenede foelen in plak fan ferballing. Under Stalin waarden finzenen fan de Gûlag troch Jenisejsk yn skippen nei de noardeastlike goudminen fan Kolyma brocht.

Op 3 july 1869 soarge in grutte brân foar in soad skea yn 'e stêd. Mar de brân fan 27 augustus 1869 wie noch slimmer en lei hast de hiele stêd (útsein it heger lizzende diel) yn 'e jiske. Troch in hurde wyn sloegen de flammen oer nei it stedssintrum. De gebouwen fan de oerheid, likernôch 2000 hûzen en fiif tsjerken baarnden ôf. De oanlis fan it Trans-Sibearyske spoar nei Krasnojarsk tsjin it ein fan de 19e iuw brocht Jenisejsk in grutte tebekslach. It ynwenneral sakke fan 11.500 yn 1897 nei 7.100 yn 1917.

It âlde sintrum fan de stêd is troch it federale regear op 'e foarriedige list fan it wrâlderfgoed set.

Befolkingsferrin

Jier	1690	1723	1856	1897	1917	1939	1959	1979	1992	2009	2018	2022
Ynwenners	3.000	4.500	5.100	11.500	7.100	12.764	17.047	20.798	22.800	19.007	17.826	17.795

Commons

Wikimedia Commons

Ofbylden dy't by dit ûnderwerp hearre, binne te finen yn de kategory Jenisejsk fan Wikimedia Commons.