Koskorobaswan

De koskorobaswan (Coscoroba coscoroba) is in lytse swan en de iennige fan it skaai koskorobaswannen (Coscoroba). De swan hat de namme te tankjen oan 'e oarspronklike bewenners fan Súd-Amearika, dy't de swan ferneamden nei it lûd as er tsjetteret: kos-ko-ro-oa.

Koskorobaswan
taksonomy
ryk dieren (Animalia) stamme rêchstringdieren (Chordata) klasse fûgels (Aves) skift goeseftigen (Anseriformes) famylje einfûgels (Anatidae) skaai koskorobaswannen (Coscoroba) Reichenbach, 1853
soarte
Coscoroba coscoroba
Molina, 1782
IUCN-status: net bedrige
ferspriedingsgebiet
wintergast      stânfûgel      briedfûgel

Beskriuwing

Koskorobaswan yn 'e flecht.

Kokorobaswannen wurde likernôch 90 sm lang en binne hielendal wyt mei op 'e bûtenste grutte wjukfearren swarte einen. De snaffel is read en de poaten binne rôze. Mantsjes ha in oranjegiele oant ljochte iris, wylst wyfkes earder in brúneftich iris ha. Wyfkes binne wat lytser as mantsjes.

De soarte wurdt likernôch 20 jier âld.

Fersprieding

Se libje yn it suden fan Súd-Amearika en op 'e Falklâneilannen yn sompen en op marren. De fûgels oerwinterje yn Sily en it noardeasten fan Argentynje nei't hja yn it briedgebiet ferfearre binne. Sûnt 2001 briedt de fûgel foar it earst sûnt 1860 wer op 'e Falklâneilannen.

Gedrach

De swannen libje fan gers en lytse wetterplanten, oanfolle mei weakdieren en lytse fisken.

Pearkes bliuwe in libben lang trou oan inoar. Se briede yn 'e sompen fan it súdlikste stik fan it kontinint. It wyfke leit fiif oant njoggen aaien, dy't yn goed in moanne útbret wurde. It mantsje helpt by it grutbringen fan 'e piken.

Status

De IUCN beöardielet de soarte op 'e Reade list as net bedrige. Neffings in rûzing út 2009 bestiet de populaasje út 10.000 oant 25.000 fûgels (6.700 oant 17.000 folwoeksen fûgels).

Keppeling om utens

• Birdlife, oproppen 6 febrewaris 2025.
• Ebird, oproppen 6 febrewaris 2025.
• Avibase, oproppen 6 febrewaris 2025.

Boarnen, noaten en referinsjes

Boarnen, noaten en/as referinsjes:

Dizze side is alhiel of foar in part in oersetting fan de Dútsktalige Wikipedyside; sjoch foar de bewurkingsskiednis: de:Coscorobaschwan Commons Wikimedia Commons  Ofbylden dy't by dit ûnderwerp hearre, binne te finen yn de kategory Coscoroba coscoroba fan Wikimedia Commons.