Margreeth de Boer

Margaretha (Margreeth) de Boer (Amsterdam, 16 april 1939) is in Nederlânske eardere politikus. Hja is lid fan de PvdA.

Margreeth de Boer
politikus
Margreeth de Boer yn 1994
echte namme	Margaretha de Boer
nasjonaliteit	Nederlânsk
bertedatum	16 april 1939
berteplak	Amsterdam
etnisiteit	Frysk
partij	PvdA
Gemeenteriedslid fan Wormer
amtsperioade	1970 - 1978
Steatelid fan Noard-Hollân
amtsperioade	1978 - 1992
Fraksjefoarsitter fan de PvdA-Noard-Hollân
amtsperioade	1985 - 1987
opfolger	Deputearre fan Noard-Hollân
amtsperioade	1987 - 1993
Kommissaris fan de Keninginne fan Drinte
amtsperioade	1993 - 1994
foargonger	Wim Meijer
opfolger	Relus ter Beek
Minister fan Folkshúsfêsting, Romtlike Oardering en Miljeu
amtsperioade	1994 - 1998
foargonger	Hans Alders
opfolger	Jan Pronk
Boargemaster fan Ljouwert
amtsperioade	2001 - 2004
foargonger	Loekie van Maaren
opfolger	Geert Dales
Boargemaster fan Hoogeveen (wnd.)
amtsperioade	2010 - 2011

Libben en wurk

Margreeth de Boer waard op 16 april 1939 berne yn Amsterdam út Fryske âlden. Fan 1965 oant 1970 wie se maatskiplik wurker by de Jellinekklinyk yn Amsterdam. Fan 1980 oant 1983 wie se haad Personielssaken fan 'e Tsjinst Sosjale Wurkfoarsjenning yn Amsterdam. Fan 1983 oant 1987 wie se haad Sosjale en Algemiene Saken en plakferfangend direkteur fan de Tjsinst Sosjale Wurkfoarsjenning Saanstêd

Yn 1970 waard De Boer ynstallearre as gemeenteriedslid fan Wormer. oant 1978 wie se dêr fraksjefoarsitter fan de PvdA. Fan 1974 oant 1978 wie se lid fan it Deistich Bestjoer en portefúljehâlder Ekonomyske en Kulturele Saken fan Yntergemeentlik Gearwurkingsferbân Wetterlân. Fan 1978 oant 1992 wie se lid fan de Provinsjale Steaten fan Noard-Hollân. Fan 1985 oant 1987 wie se dêr de fraksjefoarsitter fan de PvdA. Fan 1987 oant 1993 wie se lid fan it Kolleezje fan Deputearre Steaten fan Noard-Hollân, mei as portefúljes Romtlike Oardering, Folkshúsfêsting en iepenbier Ferfier.

Op 1 jannewaris 1993 waard De Boer beneamd ta Kommissaris fan de Keninginne yn Drinte. Oardel jier letter ferliet se it provinsjehûs yn Assen en waard se minister fan Folkshúsfêsting, Romtlike Oardering en Miljeu (VROM) fan 1994 oant en mei 1998 yn it earste pearse kabinet. Yn dy snuorje hat se in protte oparbeide mei Angela Merkel, dy't doe minister fan Miljeu yn Dútslân wie.

Yn 1998woe se gjin twadde termyn as minister nei't se earder al it boargemasterskip fan Amsterdam opsein hie. De Boer waard nei de ferkiezings fan 1998 lid fan de Twadde Keamer. Hja waard foarsitter fan de Kommisje Bûtenlânske Saken fan de twadde Keamer en wurdfierder fan it Grutte Stêdebelied en Enerzjy. Yn novimber 2001 waard se frege om waarnimmend boargemaster fan Ljouwert te wurden, nei't har partijgenoate Loekie van Maaren ôftrede moast. Op 2 oktober 2002 waard De Boer ynstallearre as "gewoane" boargemaster. Hja bleau it boargemasterskip fan 'e Fryske haadstêd ferfoljen oant se 65 jier waard. Hja waard troch Geert Dales opfolge. Yn augustus 2010 waard se waarnimmend boargemaster fan Hoogeveen as opfolger fan de yn maaie 2010 ferstoarne Helmer Koetje. Hja waard yn febrewaris 2011 opfolge troch Karel Loohuis.

Underskeiding

Yn 1998 waard se Offisier yn de Oarder fan Oranje-Nassau.

Sjoch ek

• List fan boargemasters fan Ljouwert