Mila Kunis

Mila Kunis (folút: Milena Markovna Kunis; Oekraynsk: Милена Марківна Куніс, sekuere transliteraasje: Myljena Markivna Kunis; Russysk: Милена Марковна Кунис, sekuere transliteraasje: Miljena Markovna Kunis; Tsjernivtsi (Oekraïne), 14 augustus 1983) is in Amerikaansk aktrise fan etnysk Joadsk komôf. Hja waard fan 1998 ôf bekend yn 'e rol fan Jackie Burkhart yn 'e komeedzjesearje That '70s Show. Ek is se as stimaktrise by de populêre animaasjesearje Family Guy belutsen, wêrby't se de teksten fan dochter Meg Griffin ynsprekt. Sûnt 2008 is se dêropta as filmaktrise aktyf, mei rollen yn û.m. Forgetting Sarah Marshall, Black Swan, Friends with Benefits en Ted.

Mila Kunis
akteur
persoanlike bysûnderheden
echte namme	Milena Markovna Kunis
nasjonaliteit	Oekraynsk Amerikaansk
berne	14 augustus 1983
berteplak	Tsjernivtsi (Oekraïne)
etnisiteit	Joadsk
jierren aktyf	1994 – no
prizen	Saturn Award 2011
offisjele webside
Mila Kunis yn 'e IMDb

Libben en karriêre

Jonkheid en oplieding

Kunis waard yn 1983 berne yn in Joadsk gesin yn Tsjernivtsi, yn 'e Oekraïne (doe noch part fan 'e Sovjet-Uny), in stêd dy't yn 'e Karpaten leit, net fier benoarden de Roemeenske grins. Har heit Mark Kunis is in meganisiên, dy't no wurket as taksysjauffeur, en har mem Elvira is in natuerkundeleararesse dy't no in apteek runt. Kunis hat in âldere broer dy't fan Michael hjit en berne is yn 1976. Yn 1991, doe't se sân jier âld wie, emigrearre Kunis mei har âlden en broer nei de Feriene Steaten. De redens dêrfoar wiene dat har âldelju yn 'e Oekraïne op ekonomysk mêd gjin takomst seagen, en teffens spile it oanboazjende antysemitisme yn 'e eardere Sovjet-Uny in rol by dy beslissing.

Mila Kunis yn 2009.

It gesin sette him nei wenjen yn Los Angeles, yn 'e Amerikaanske steat Kalifornje. Kunis ûnderfûn troch de emigraasje in slimme kultuerskok, en hat yn fraachpetearen oanjûn dat se har net folle fan it earste jier yn 'e Feriene Steaten tebinnenbringe kin, útsein dat it in ellindige tiid foar har wie. Se begriep neat fan 'e Amerikaanske kultuer en ferstie gjin wurd Ingelsk, dat it fielde foar har krekt as wie se blyn en dôf wurden. Uteinlik learde se de taal lykwols en akklimatisearre se ta de kultuer. Se folge de middelbere skoalle yn Los Angeles, oant se trochbriek mei har rol yn That '70 Show. Dêrnei learde se foar it meastepart troch in priveelearaar dy't har op 'e set fan dy searje ûnderwiis joech.

Aktearkarriêre

Doe't se njoggen jier wie, waard Kunis troch har heit ynskreaun foar aktearlessen. By har earste audysje, foar in Barbie-reklame, wie it daliks rekke en krige se de rol. Ferskate oare reklamespotsjes folgen. Har earste tillefyzjerol hie Kunis yn 1994, yn 'e soapsearje Days of Our Lives. Koarte tiid letter hie se in gastroltsje yn 'e searje Baywatch, en yn 1995 folge har earste filmrol, yn Make a Wish, Molly. Yn 1996 en 1997 hie se in lyts roltsje yn 'e searje 7th Heaven. Fierders hie se yn dy tiid in gastrol yn 'e plysjesearje Walker, Texas Ranger en rollen yn films as Piranha (1995), Santa with Muscles (1996), Honey, We Shrunk Ourselves (1997) en Gia (1998).

Yn 1998 waard Kunis cast yn 'e rol fan 'e kreaze mar ekstreem egoïstyske Jackie Burkhart, yn 'e komeedzjesearje That '70s Show, oer in groep ferfeelde tiners op it plattelân fan Wiskonsin yn 'e 1970-er jierren. Alle akteurs moasten teminsten achttjin jier wêze; Kunis, dy't fjirtjin wie, sei by har audysje dat se achttjin wurde soe (mar net wannear). Hoewol't de produsinten úteinlik útfigelearren wat se bedoelde, wiene se sa ûnder de yndruk fan har aktearprestaasje dat se har likegoed oannamen. That '70s Show wie tige súksesfol en rûn acht seizoenen lang, fan 1998 oant 2006. Foar Kunis en de oare jonge akteurs (Topher Grace, Ashton Kutcher, Danny Masterson, Laura Prepon en Wilmer Valderrama) foarme de searje de trochbraak. Kunis waard foar de rol fan Jackie Burkhart trije kear nominearre foar in Young Artist Award en fiif kear foar in Teen Choice Award.

Mila Kunis yn 2012.

Yn 1999 ferfong Kunis Lacey Chabert as stimaktrise yn 'e populêre tekenfilmrige Family Guy, fan Seth MacFarlane. Dy searje rint noch altyd en Kunis lient dêryn har stim oan it personaazje Meg, de dochter fan it gesin Griffin. Underwilens sette hja ek har wurk as filmaktrise fuort. Yn 2001 spile se yn Get Over It, mei Kirsten Dunst, en it jiers dêrop wie se te sjen yn 'e flopte horrorfilm American Psycho 2, mei William Shatner. Letter hie se ek rollen yn films as After Sex, Moving McAllister en Boot Camp, dy't alletrije útbrocht waarden yn 2007. As filmaktrise kaam Kunis har trochbraak yn 'e komeedzje Forgetting Sarah Marshall, yn 2008. Datselde jiers spile se hiermoardneresse Mona Sax yn 'e aksjefilm Max Payne, mei Mark Walhberg as tsjinspiler. Hoewol't dy film in finansjeel súkses wie, fûnen de measte resinsinten dat Kunis dêryn miscast wie.

Better waard har rol yn 'e komeedzje Extract (2009) ûntfongen, wêryn't se Ben Affleck en Jason Bateman as tsjinspilers hie. Yn 2010 spile Kunis fierders mei Denzel Washington yn 'e aksjefilm The Book of Eli, dy't útinoar rinnende resinsjes krige. Foar har fertolking fan 'e rol fan balletdûnseresse Lily, de aartsrivale fan it haadpersonaazje (spile troch Natalie Portman), yn 'e psychologyske skrillerfilm Black Swan (2010) krige Kunis lykwols in protte lof. Se wûn der in Saturn Award mei yn 'e kategory bêste byrol fan in aktrise, en teffens de Marcello Mastroianni Award op it Ynternasjonaal Filmfestival fan Feneesje. Fierders waard se nominearre foar û.m. in Golden Globe en twa Screen Actors Guild Awards. Foar dizze rol ûndergie Kunis in treningsprogramma dat û.m. in dieet fan 1.200 kaloryen deis en sân dagen yn 'e wike fjouwer oeren balletles omfieme. Under dy trening rûn se ferskate blessueres op, lykas in skuorde piis en in skouder út it potsje.

Yn 2011 spile Kunis mei Justin Timberlake yn 'e romantyske komeedzje Friends with Benefits, dy't in grut kommersjeel súkses waard. In jier letter wie se mei Mark Walhberg te sjen yn 'e komeedzje Ted, dy't skreaun wie troch Family Guy-skepper Seth MacFarlane. Dy film, oer in libbene teddybear en syn minsklike (no folwoeksen) eigner, waard goed ûntfongen troch de krisisy en wie ek in grut finansjeel súkses. Lettere films dêr't Kunis yn spile, wiene û.m. Oz the Great and Powerful (2013), Blood Ties (2013) en Third Person (2013), mei Liam Neeson en Olivia Wilde. Yn 2015 wie se te sjen yn 'e science fiction-rôlprint Jupiter Ascending, en yn 2016 spile se mei Kirsten Bell en Christina Applegate yn 'e komeedzje Bad Moms, dêr't it jiers dêrop in ferfolch op makke waard, A Bad Moms Christmas. Yn 2018 hie se mei Kate McKinnon de haadrol yn 'e spionaazje-aksjekomeedzje The Spy Who Dumped Me.

Mila Kunis yn 2008.

Priveelibben

Kunis hat heterochromia iridum, in ôfwiking dy't in kleurferskil ynhâldt tusken de iris fan it lofter- en rjochtereach. Kunis har rjochtereach is griis/blau en har loftereach is ljochtbrún/grien. Yn 2011 makke se bekend dat se troch dizze ôfwiking in groanyske foarm fan 'e eachkrupsje iritis hat, dy't derfoar soarge hie dat se in pear moannen earder blyn wurden wie yn ien each. Underwilens hie se in operaasje ûndergien om it probleem te ferhelpen.

Yn novimber 2011 beselskippe Kunis sersjant Scott Moore nei in bal fan it Amerikaanske Korps Mariniers yn Greenville, nei't dy har fia in YouTube-filmke útfrege hie wylst er noch legere wie yn Afganistan. Fan 2002 oant begjin 2011 hie Kunis in relaasje mei kollega-akteur Macaulay Culkin, mei wa't se noch altyd befreone is. Yn april 2012 begûn se in nije relaasje mei hat Ashton Kutcher, dy't krekt as sysels bekend wurden is troch syn rol yn That '70s Show. Kunis en Kutcher ferloofden har yn febrewaris 2014, en trouden yn july 2015 yn Oak Glen. Yn oktober 2014 skonk Kunis it libben oan harren dochterke Wyatt Isabelle, en yn juny 2016 waard befêstige dat Kunis op 'e nij swier is.

Kunis is in oanhingster fan 'e Demokratyske Partij en hat har yn 2008 en 2012 ynset foar de ferkiezing fan Barack Obama ta presidint fan de Feriene Steaten. Se is in útsprutsen kritikaster fan 'e Republikeinske Partij en hat û.m. oanjûn dat se har misledige fielt troch de wize dy't Republikeinen foar de moade hawwe om oer froulju te praten. Fierders hat se it der likemin op stean dat de Republikeinen allegeduerigen Jezus Kristus oeral by helje.

Filmografy

Filmografy as aktrise
jier	titel	rol of funksje	opmerkings
tillefyzje
1994	Days of Our Lives	de jonge Hope Williams	flashback; 1 ôflevering
1994	Baywatch	Annie	ôflevering Aftershock
1995	The John Larroquette Show	Lucy Sanchez	ôflevering The Defiant One
1995	Piranha	Susie Grogan	tillefyzjefilm
1995	Hudson Street	Devon	ôflevering Here's Just Looking at You, Kid
1995	Baywatch	Bonnie	ôflevering Hot Stuff
1996	Unhappily Ever After	Chloe	ôflevering In the Stars
1996–1997	Nick Freno: Licensed Teacher	Anna-Maria Del Bono	5 ôfleverings
1996–1997	7th Heaven	Ashley	4 ôfleverings
1997	Walker, Texas Ranger	Pepper	ôflevering Last Hope
1998	Gia	de jonge Gia Carangi	tillefyzjefilm
1998	Pensacola: Wings of Gold	Jessie Kerwood	ôflevering Company Town
1998–2006	That '70s Show	Jackie Burkhart	fêste rol; 200 ôfleverings 3× nominearre foar in Young Artist Award 5× nominearre foar in Teen Choice Award
1999–2003 &    2005-no	Family Guy	Meg Griffin	as stimaktrise; fêste rol nominearre foar in Annie Award foar bêste stimakteur yn in tekenfilmsearje (2007)
2000–2002	Get Real	Taylor Vaughn	2 (net-útstjoerde) ôfleverings
2002	MADtv	Daisy	ôflevering 8.7
2004	Grounded for Life	Lana	2 ôfleverings
2005	Punk'd	harsels	ôflevering 5.6
2005–2011	Robot Chicken	ferskaat	15 ôfleverings
2009	The Cleveland Show	Meg Griffin	as stimaktrise; ôflevering Pilot
2010	The Late Late Show with Craig Ferguson	Snooki Polizzi	ôflevering 6.85
2011	Sesame Street	harsels	ôflevering The Good Bird's Club
2011	Good Vibes	harsels	as stimaktrise; ôflevering Red Tuxedo
2014	Two and a Half Men	Vivian	ôflevering Lan Mao Shi Zai Wuding Shang
2017	The Bachelorette	harsels	gast yn in realityprogramma
2019	The Ellen DeGeneres Show	harsels	gastpresintatrise fan in praatprogramma
films
1996	Santa with Muscles	Sarah
1997	Honey, We Shrunk Ourselves	Jill
1998	Krippendorf's Tribe	Abbey Tournquist
1998	Milo	Martice	net fermeld op 'e ôftiteling
2001	Get Over It	Basin
2002	American Psycho 2	Rachael Newman
2004	Tony n' Tina's Wedding	Tina Nunzio
2005	Stewie Griffin: The Untold Story	Meg Griffin	as stimaktrise
2007	After Sex	Nikki
2007	Moving McAllister	Michelle McAllister
2008	Boot Camp	Sophie
2008	Forgetting Sarah Marshall	Rachel Jansen	nominearre foar in Teen Choice Award foar bêste trochbraakrol fan in aktrise
2008	Max Payne	Mona Sax	nominearre foar in Teen Choice Award foar bêste aktrise yn in aksjeaventoerefilm
2009	Extract	Cindy
2010	The Book of Eli	Solara	nominearre foar in Teen Choice Award foar bêste aktrise yn in aksjeaventoerefilm
2010	Date Night	Whippit
2010	Black Swan	Lily	nominearre foar in Golden Globe foar bêste byrol fan in aktrise nominearre foar in SAG Award foar bêste byrol fan in aktrise nominearre foar in SAG Award foar bêste cast nominearre foar in MTV Movie & TV Award foar bêste tút (mei Natalie Portman) nominearre foar in Teen Choice Award foar froulike sênesteller nominearre foar in Teen Choice Award foar bêste tút (mei Natalie Portman) wûn de Saturn Award foar bêste byrol fan in aktrise wûn de Marcello Mastroianni Award (foar bêste jonge aktrise) fan it Ynternasjonaal Filmfestival fan Feneesje
2011	Friends with Benefits	Jamie Rellis	nominearre foar in People's Choice Award foar favorite aktrise yn in komeedzjefilm nominearre foar in Teen Choice Award foar bêste froulike simmerfilmstjer nominearre foar in Rembrandt Award foar bêste ynternasjonale aktrise
2012	Ted	Lori Collins	nominearre foar in MTV Movie & TV Award foar bêste froulik optreden nominearre foar in MTV Movie & TV Award foar bêste tút (mei Mark Wahlberg)
2012	The Color of Time	Catherine Mauger
2013	Oz the Great and Powerful	Theodora, the Wicked Witch of the West	nominearre foar in MTV Movie & TV Award foar bêste smjunt nominearre foar in Teen Choice Award foar bêste aktrise yn in science fiction- of fantasyfilm
2013	Blood Ties	Natalie
2013	Third Person	Julia Weiss
2014	The Angriest Man in Brooklyn	Sharon Gill	ek útfierend produsinte
2014	Annie	Andrea Alvin	cameo
2015	Jupiter Ascending	Jupiter Jones	nominearre foar in Teen Choice Award foar bêste aktrise yn in science fiction- of fantasyfilm
2015	Hell and Back	Deema	as stimaktrise
2016	Bad Moms	Amy Mitchell
2017	A Bad Moms Christmas	Amy Mitchell	ek útfierend produsinte
2018	The Spy Who Dumped Me	Audrey Stockman	nominearre foar in People's Choice Award foar favorite komeedzjefilmstjer
2019	Wonder Park	Greta	as stimaktrise
2020	Four Good Days	Molly
2020	Breaking News in Yuba County	Nancy
2022	Luckiest Girl Alive	Ani Fanelli
fideospultsjes
2006	Saints Row	Tanya Winters	as stimaktrise
2006	Family Guy Video Game!	Meg Griffin	as stimaktrise
2012	Family Guy: Back to the Multiverse	Meg Griffin	as stimaktrise
2014	Family Guy: The Quest for Stuff	Meg Griffin	as stimaktrise
fideoklips
1999	In the Street		fan Cheap Trick
2000	The Itch		fan Vitamin C
2001	Rock and Roll All Nite		fan Kiss
2001	Jaded		fan Aerosmith
2003	The End Has No End		fan The Strokes
2008	LA Girls		fan Mams Taylor featuring Joel Madden

Keppelings om utens

• (in) Folsleine filmografy fan Mila Kunis yn 'e Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References en Further reading, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Mila Kunis fan Wikimedia Commons.