Mo Yan

Mo Yan (yn it Mandarynsk: 莫言) (17 febrewaris 1955) is in Sineesk skriuwer dy't yn it westen fral bekendheid krige troch twa fan syn romans dy't de basis foarmje fan de film It reade nôtfjild. Syn wurk is oerset yn in soad talen. Yn 2012 krige Mo Yan de Nobelpriis foar de Literatuer.

Biografy

Mo Yan waard berne yn in lânbouhúshâlding yn it Gaomi-distrikt yn de provinsje Shandong fan Sina. Hy ferliet de skoalle tidens de Kulturele revolúsje om te wurkjen yn in oaljeferwurkjend fabryk. Yn 'e âldens fan tweintich jier waard er soldaat fan it Folksbefrijingsleger. Yn 1981 begûn er te skriuwen wylst er noch tsjinne as soldaat. Trije jier letter waard er learaar oan de ôfdieling literatuer fan de Kulturele Akademy fan it leger.

Pseudonym

"Mo Yan", dat yn it Sineesk "praat net" betsjut, is in pseudonym. Syn echte namme is Guan Moye (管谟业). Mo Yan hat ferklearre dat er dy auteursnamme keas doe't er syn earste roman skreau om himsels yn it sin te bringen om net te folle te sizzen, omdat yn Sina iepenens net wurdearre wurdt.

Styl

Mo Yans wurken binne benammen in foarm fan sosjaal kommentaar. Hy wurdt sterk beynfloede troch de politike krityk fan Lu Xun en it magysk realisme fan Gabriel Garcia Marquez. Mei help fan skitterjende, komplekse en faak grafyske gewelddiedige bylden slagget it Mo Yan de lêzer yn de kaleidoskopyske universums fan syn ferhalen te loadsjen. In protte fan syn ferhalen spylje har ôf yn 'e omkriten syn berteplak Gaomi yn de provinsje Shandong.

Mo Yan is tige produktyf: hy skreau syn roman Libben en dea putsje my út (Sineesk: 生死疲劳) yn mar 43 dagen. Ma Yan hat tsientallen koarte ferhalen en romans publisearre.

Underskiedings

1998: Neustadt Ynternasjonale Priis foar Literatuer, kandidaat
2005: Kiriyama Prize, Opmerklike Boeken, foar Grutte boarsten, brede heupen
2006: Fukuoka Asiatyske Kultuerpriis XVII
2007: Man Asian Literary Prize, in folmacht, foar Grutte boarsten, brede heupen
2009: Newman Priis foar Sineeske literatuer, winner, foar Libben en dea putsje my út
2010: Modern Language Association, earelid
2011: Mao Dun Literatuerpriis, winner, mei de roman Kikkerts
2012: Nobelpriis foar de Literatuer, winner

Keppelings om utens

Portret fan Mo Yan yn NRC Handelsblad
Fraachpetear mei Mo Yan yn de Volkskrant
Mo Yan's Nederlânske oersetter oer syn wurk