Thomas McDougall

Thomas McDougall (folút: Thomas Mower McDougall; Prairie du Chien (Wiskonsin), 21 maaie 1845 – Brandon (Fermont), 3 july 1909) wie in Amerikaansk militêr fan etnysk Skotsk komôf, dy't in beskate bekendheid krige troch syn rol yn 'e ferneamde Slach oan 'e Little Bighorn, yn 1876, wêrby't in koälysje fan Yndiaanske folken de Amerikaanske kavalery in ferpletterjende nederlaach tabrocht.

Thomas McDougall
militêr
persoanlike bysûnderheden
namme folút	Thomas Mower McDougall
nasjonaliteit	Amerikaansk
berne	21 maaie 1845
berteplak	Prairie du Chien (Wiskonsin)
stoarn	3 july 1909
stjerplak	Brandon (Fermont)
etnisiteit	Skotsk
wurkpaad
tsjinsttiid	1863 – 1904
yn tsjinst fan	Feriene Steaten
legerûnderdiel	lânmacht ● Amerikaanske Leger
heechste rang	majoar
konflikt(en)	Amerikaanske Boargeroarloch Grutte Sû-Oarloch fan 1876
treffen(s)	Slach by Vicksburg Slach oan de Little Bighorn

Libben en karriêre

Jonkheid en komôf

McDougall waard yn 1845 berne yn Prairie du Chien, yn 'e Amerikaanske steat Wiskonsin. Hy wie de soan fan Charles McDougall, dy't ek as ofsier yn it Amerikaanske Leger tsjinne. Hy hie in suster dy't mei generaal-majoar Edwin Burr Babbitt troud wie.

Amerikaanske Boargeroarloch

Under de Amerikaanske Boargeroarloch (1861-1865) joech McDougall him yn 1863 as in twadde luitenant by it Noardlike Leger. Hy tsjinne û.m. yn 'e Slach by Vicksburg (1863), wêrby't de Noardliken de Súdlike Konfederearre Steaten fan Amearika by de rivier de Mississippy lâns midstwa spjalten.

Grutte Sû-Oarloch

Nei ôfrin fan 'e Boargeroarloch naam McDougall in ofsiersposysje mei de rang fan kaptein oan yn it Amerikaanske 14e Ynfanteryrezjimint. Letter waard er oerpleatst nei it Amerikaanske 7e Kavaleryrezjimint, dêr't er it befel krige oer B Kompanjy, mei luitenant Benjamin Hodgson as syn ûnderbefelhawwer. Yn dy hoedanichheid focht er ûnder de Grutte Sû-Oarloch fan 1876 mei tsjin 'e Lakota, de Noardlike Sjajinnen en de Noardlike Arapaho.

Op 25 en 26 juny 1876 naam McDougall diel oan 'e ferneamde Slach oan de Little Bighorn, wêrby't B Kompanjy yn reserve holden waard en McDougall fan 'e fjildkommandant fan it rezjimint, luitenant-kolonel George Armstrong Custer, de opdracht krige om 'e bagaazjetrein te beskermjen. Dêrmei fierde hy feitlik it kommando oer ien fan 'e fjouwer detasjeminten dêr't Custer it 7e Kavaleryrezjimint yn opdielde. Nei't it detasjemint fan majoar Marcus Reno troch de Yndianen weromdreaun wie en op in klif boppe de rivier de Little Bighorn belegere waard, foegen kaptein Frederick Benteen en McDougall har mei harren detasjeminten by him. Hoewol't se yn 'e fierte gewearfjoer hearden, hie net ien fan harren yn 'e rekken dat Custer sels mei fiif kompanjyen 6 km noardliker troch de Yndianen ynsletten en útrûge waard. Reno, Benteen en McDougall stiene yn harren posysje oardel dei lang bleat oan oanfallen troch de Yndianen, mar wisten stân te hâlden oant se tsjin 'e moarn fan 27 juny ûntset waarden troch de farske troepen fan brigadegeneraal Alfred Terry en kolonel John Gibbon.

Lettere libben

Nei de Slach oan de Little Bighorn bleau McDougall yn it Amerikaanske Leger oant er yn 1904 mei de rang fan majoar mei pinsjoen gie. Hy wie troud mei in frou dy't fan Alice hiet en yn 1920 kaam te ferstjerren. Sels stoar McDougall op 3 july 1909 yn Brandon, yn 'e steat Fermont. Sawol hy as syn frou lizze begroeven op it Nasjonaal Begraafplak Arlington, by de Amerikaanske haadstêd Washington, D.C.

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.