Tsjerke fan Longerhou

De Tsjerke fan Longerhou oan de Buorren 6 yn Longerhou is in ryksmonumint. It is ien fan de trije tsjerken fan de protestantske gemeente Skettens-Skraard-Longerhou.

Tsjerke fan Longerhou
bouwurk
lokaasje
lân	Nederlân
provinsje	Fryslân
gemeente	Súdwest-Fryslân
plak	Longerhou
adres	Buorren 6
bysûnderheden
type bouwurk	Tsjerke
boujier	Tsjerke: 1757; toer: 13e iuw
monumintale status	ryksmonumint
monumintnûmer	39362
offisjele webside
Facebook PKN-gemeente

Skiednis

Fanwegen de fynst fan in tufstiennen fûnemint fan it alter yn it koer wurdt oannommen dat der al yn de 11e iuw in tsjerke yn Longerhou stien hat. Yn 1757 waard in midsiuwske tsjerke út de 13e iuw ferfongen troch de tsjintwurdige sealtsjerke mei in fiifsidich koer. De âlde sealtektoer bleau doe stean en stamt noch út de 13e iuw.

Ynterieur

It troch in tonferwulft oerkape ynterieur besit in preekstoel út it boujier fan de tsjerke. Op de kûp binne yn in rococo-kader Bibelske foarstellings út it libben fan Jezus te sjen (de berte, de krusiging, opstanning, himelfeart en it lêste oardiel).

By de restauraasje yn de jierren 1980 waarden ûnder de flier dielen fûn fan de 14e-iuwske tsjerkeflier. De flier waard yn in mozaïekpatroan lein en guon gruttere tegels drage foarstellings fan in hert, in earn, in ridder op it hynder, in leelje, in roazet en in gesicht. Oer de moaiste dielen is glês lein, sadat besikers de tegels noch sjen kinne. Ek binne by dy restauraasje in tal sarken út de 17e, 18e en begjin 19e iuw foar it ljocht helle.

De twa buorden yn it koer mei de Tsien Geboaden en in tekst yn dichtfoarm nei oanlieding fan Romeinen 6:23 stamme út 1757. De buorden hongen oarspronklik yn de tsjerke fan Longerhou, mar waarden yn de tsjerke fan Skettens achter it oargel werom fûn. Nei de restauraasje krigen de buorden wer in plak oan de muorre yn it koer fan de tsjerke fan Longerhou. Nei alle gedachten stamt it tekstboerd oer de ferkundiging oan de skieppehoeders achter it oargel út deselde tiid.

De banken binne ôfkomstich út in Grinslânske tsjerke dy't sletten is.

Yn de toer hinget in klok, dy't yn 1742 troch Joan Nicolaus Derck fan Hoarn getten is.

Oargel

It oargel yn de tsjerke waard yn 1868 troch L. van Dam & Soannen út Ljouwert boud. It ynstrumint wachtet op in restauraasje en by de tsjerke stiet in meter mei it yntusken ynsammele bedrach.

Ofbylden

• 
  Oersicht ynterieur
• 
  Oargel
• 
  Midsiuwske flier
• 
  Tegel mei gesicht

Sjoch ek

• Tsjerke fan Skettens
• Tsjerke fan Skraard

Boarnen, noaten en referinsjes

Boarnen, noaten en/as referinsjes:

PDF T.E. van Popta, 1994 Commons Wikimedia Commons  Ofbylden dy't by dit ûnderwerp hearre, binne te finen yn de kategory Tsjerke fan Longerhou fan Wikimedia Commons.