Boris Vallejo
Boris Vallejo (Lima, 8 jannewaris 1941) is in Perûviaansk yllustrator, boekbânûntwerper en keunstskilder, dy't yn 1964 nei de Feriene Steaten emigrearre. Hy leit him frijwol útslutend ta op it meitsjen fan keunstwurken, yllustraasjes en omslaggen dy't ta de sjenres fan 'e fantasy en de erotyk hearre. Vallejo wurket in protte gear mei syn frou, Julie Bell. Syn soan Dorian Vallejo is ek yllustrator en boekbânûntwerper.
| Boris Vallejo | ||
 keunstner
| ||
| ||
| persoanlike bysûnderheden | ||
| echte namme | Boris Vallejo | |
| nasjonaliteit |  Perûviaansk
| |
| berne | 8 jannewaris 1941 | |
| berteplak | Lima (Perû) | |
| etnisiteit | Perûviaansk
| |
| wurkpaad | ||
| wurksum as | yllustrator, boekbânûntwerper | |
| jierren aktyf | 1964 – no | |
| prizen | British Fantasy Award 1979 | |
| offisjele webside | ||
| borisjulie.com | ||
Libben en karriêre bewurkje seksje
Jonge jierren bewurkje seksje
Vallejo waard yn 1941 berne yn 'e Perûviaanske haadstêd Lima. Hy begûn mei skilderjen yn 1954, doe't er noch mar trettjin jier âld wie, en krige syn earste betelle opdracht foar it meitsjen fan yllustraasjes yn 1957, doe't er sechstjin jier wie. Vallejo genoat syn oplieding oan 'e Escuela National de Bellas Artes yn Lima, dêr't er troch it winnen fan in stúdzjebeurs fiif jier studearje koe. Neitiid emigrearre er yn 1964, mei 23 jier, nei de Feriene Steaten, dêr't er al rillegau populêr waard mei syn yllustraasjes fan û.m. Tarzan en Conan de Barbaar.
Karriêre bewurkje seksje
Hoewol't Vallejo him benammen talei op it meitsjen fan omslaggen foar boeken, produsearre er ek wol kalinders, reklameyllustraasjes en losse keunstwurken. Filmposters makke er ek, û.m. foar Knightriders (1981), Q (1982), National Lampoon's Vacation (1983) en Barbarian Queen (1985). Foar syn wurk jout Vallejo de foarkar oan it gebrûk fan oaljeferve op in boerd, wêrnei't er gauris digitale technyk ynset om aparte ôfbyldings te kombinearjen ta in gehiel. Tariedend wurk docht er mei potlead of Eastyndyske inket op papier.
Vallejo syn wurk kin hast útslutend ta de sjenres fan fantasy en erotyk rekkene wurde. Syn hyperrepresintative skilderings binne ornaris fan goaden, meunsters en/of spierde manlike en froulike barbaren dy't yn in gefjocht ferwikkele binne. Guon fan syn manlike figueren modellearre Vallejo foarhinne nei himsels, wylst in protte fan syn lettere froulike ûnderwerpen op syn frou en kollega Julie Bell basearre wiene. Syn lettere wurk omfiemet noch altyd sterke fantasy-eleminten, mar skaait sterk de kant fan 'e erotyk út. Yn 1979 wûn Vallejo de British Fantasy Award yn 'e kategory bêste keunstner, foar syn wurk The Amazon Princess and Her Pet.
Priveelibben bewurkje seksje
Vallejo is troud mei Julie Bell, in Amerikaanske yllustratrise fan wurk dat sterk op syn eigen liket. Mei har wurket er dan ek gauris gear. Hja wenje yn Allentown, yn 'e Amerikaanske steat Pennsylvania. Vallejo hat twa bern út syn eardere houlik mei syn earste frou Doris. Syn soan Dorian Vallejo is as yllustrator en boekbânûntwerper yn syn heite fuotleasten trêde. Syn dochter Maya Vallejo is in profesjoneel fotografe. Dêropta hat Vallejo ek noch twa styfsoannen, Anthony en David Palumbo, dy't allebeide ek skilders en yllustrators binne.
Publikaasjes bewurkje seksje
- 1980 – The Fantastic Art of Boris Vallejo
- 1982 – Mirage (werprinte yn 1996 en 2011)
- 1985 – Fantasy Art Techniques
- 19?? – Ladies
- 1999 – Dreams: The Art of Boris Vallejo
- 200? – Titans (a.k.a. Superheroes): The Heroic Visions of Boris Vallejo and Julie Bell
- 2002 – Twin Visions
- 2005 – Boris Vallejo and Julie Bell: The Ultimate Collection
- 2006 – The Fabulous Women of Boris Vallejo and Julie Bell
- 2006 – Imaginistix
Keppelings om utens bewurkje seksje
| Boarnen, noaten en/as referinsjes: |
|
Foar boarnen en oare literatuer, sjoch ûnder: References, op dizze side. |