E.L. James

E.L. James (pseudonym fan Erika Leonard, famkesnamme: Erika Mitchell; Londen, 7 maart 1963) is in Britsk skriuwster, dy't yn 2011 op spektakulêre wize trochbriek mei har debút, de bondaazje- en SM-roman Fifty Shades of Grey.

E.L. James
skriuwer
persoanlike bysûnderheden
echte namme	Erika (Mitchell) Leonard
nasjonaliteit	Britsk
berne	7 maart 1963
berteplak	Londen (Ingelân)
etnisiteit	Sileensk Skotsk
wurk
taal	Ingelsk
sjenre	romantyske fiksje, eroatika
bekendste   wurk(en)	Fifty Shades of Grey
prizen	2x National Book Award
jierren aktyf	2009 – no
offisjele webside
www. eljamesauthor.com

Libben en karriêre

Jonkheid en oplieding

James waard berne yn 1963 yn Londen, as de dochter fan in Skotske heit en in Sileenske mem. Har heit wurke as kameraman foar de BBC. James groeide op yn Buckinghamshire, dêr't se de middelbere skoalle trochrûn oan 'e Wycombe High School, in iepenbiere famkesskoalle yn it doarp High Wycombe. Neitiid studearre hja skiednis oan 'e Universiteit fan Kent te Canterbury. James fûn wurk as studiomanagersassistinte oan 'e Britske Nasjonale Film- en Telefyzjeskoalle yn Beaconsfield.

Skriuwkarriêre

James begûn har karriêre as auteur mei it skriuwen fan fanfiksje ûnder de skûlnamme "Snowqueen's Icedragon". Har meast opfallende wurk op dat mêd wie in ferhaal dat hja basearre op 'e Twilight-fantasysearje. Se sette dêrmei útein yn jannewaris 2009, nei't se it lêste Twilight-boek út hie. Letter ferwurke se de ideeën út dit ferhaal yn 'e roman dy't úteinlik Fifty Shades of Grey kaam te hjitten, oer Anastasia Steele, in ûnskuldige jonge frou, dy't ferwikkele rekket yn in eksplisyt seksuële relaasje mei Christian Grey, in dominante en by fleagen sadistyske âldere man.

Fifty Shades of Grey kaam út yn 2011, en wie it earste diel fan 'e saneamde Fifty Shades-trilogy, dy't fierder gie mei Fifty Shades Darker en einige mei Fifty Shades Freed. De beide lêste dielen waarden allebeide yn 2012 publisearre. De trilogy, en fral it earste diel, brieken alle ferkeaprekôrs. James hat ûnderwilens mear as 70 miljoen boeken ferkocht, wêrfan 35 miljoen yn 'e Feriene Steaten. De trilogy hat op it stuit it Britske rekôr yn 'e hannen fan 'e fluchst ferkeapjende paperback aller tiden. Yn 2012 berneamde it Amerikaanske tydskrift Time James ta ien fan 'e hûndert ynfloedrykste minsken fan 'e wrâld, en yn augustus 2013 stie se boppe-oan op 'e list fan it tydskrift Forbes fan meastfertsjinjende auteurs, mei $90 miljoen oan boekeferkeap mei nochris $5 miljoen foar de filmrjochten. De ferfilming fan Fifty Shades of Grey, ûnder rezjy fan Sam Taylor-Johnson, kaam yn febrewaris 2015 út.

Yn 2015 en 2017 recycle James it ferhaal fan 'e Fifty Shades-trilogy nochris yn 'e romans Grey en Darker, dy't itselde ferhaal fanút it eachpunt fan Christian Grey fertelle. Yn 2019 kaam fan James de roman The Mister út, dy't los stiet fan 'e Fifty Shades-trilogy (en dêr't ek gjin s.m. yn foarkomt). The Mister giet oer in loaie en rike Ingelske ealman, dy't fereale rekket op syn Albaneeske húshâldster.

Priveelibben

E.L. James wennet yn 'e Westlondenske wyk Ealing, mei har man Niall Leonard en har beide tinersoannen.

Wurk

• de Fifty Shades-trilogy
  • 2011 – Fifty Shades of Grey
  • 2012 – Fifty Shades Darker
  • 2012 – Fifty Shades Freed
• 2015 – Grey: Fifty Shades of Grey As Told by Christian
• 2017 – Darker: Fifty Shades Darker as Told by Christian
• 2019 – The Mister

Prizen en nominaasjes

Jier	Priis	Resultaat	Kategory	Foar
2012	National Book Award	wûn	bêste wurk fan populêre fisje fan it jier	Fifty Shades of Grey
		wûn	boek fan it jier	Fifty Shades of Grey

Keppelings om utens

• (in) Offisjele webside fan E.L. James

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.