Húns

Húns is in doarp yn de gemeente Ljouwert. It doarp krige yn de rin fan de tiid net in soad nijbou. Yn it midden fan it doarp leit it keatsfjild.

Húns
Doarpssicht
Emblemen
Polityk
Lân	Nederlân
Provinsje	Fryslân
Gemeente	Ljouwert
Sifers
Ynwennertal	105 (2022)
Oerflak	3,18 km² werfan lân: 3,17 km² werfan wetter 0,01 km²
Befolkingsticht.	33 ynw./km²
Oar
Tiidsône	UTC +1
Simmertiid	UTC +2
Koördinaten	53° 9' N 5° 40' E
Offisjele webside
Side Húns-Leons
Kaart

Namme

It doarp waard foar it earst yn 1275 beskreaun as 'Honnyghadyc'. Dêrnei komme farianten lykas Hynnynghe (1473), Hynghe (1473), Huns (1505) en Hoens (1529) foar. Yn de 18e iuw is it Huyns en yn de 19e iuw Huyns en Huns. It earste diel fan de namme soe in ferwizing wêze nei de persoansnamme Huno. Mei de ynfiering fan offisjele Fryske plaknammen troch de (eardere) gemeente Littenseradiel waard de plaknamme offisjeel Húns.

Skiednis

Gaueftich nei 1200 waard de tsjerke fan Húns boud. Oant fier yn de 18e iuw bleau Húns in isolearre doarp. De iennige ferbinings fan it doarp wiene de opfeart nei de Boalserter Trekfeart en it paad dat it doarp ferbûn mei Hoptille en Hilaard. Mar ek al lei Húns isolearre, om 1750 hinne krige it doarpke dochs in panwurk, dêr't dakpannen bakt waarden. Yn it doarpswapen ferwize de reade dakpannen nei dat fabrykje. Yn de grûn fan Húns tilt it ek no noch op fan de skerven van dakpannen.

Yn de twadde helte fan de 19e iuw waard de terp foar it measte ôfgroeven, sadat de tsjerke tsjintwurdich op it ôfstutsen restant fan de terp stiet. Op it plak fan de eardere terp leit it keatsfjild. Yn 2004 binne by de terp in tritich gouden munten fûn. Dy moatte yn de 16e iuw yn de grûn stoppe wêze.

Oant de gemeentlike weryndieling yn 1984 makke Húns diel út fan de gemeente Baarderadiel. Nei't it doarp sûnt 1984 ûnderdiel foarme fan de doe nije gemeente Littenseradiel, kaam it yn 2018 by in folgjende weryndieling by de gemeente Ljouwert.

Mienskip

De Húnzer Murd

De ynwenners dogge in soad tegearre mei it tichtby lizzende Leons. Der is in feriening Doarpsbelang Húns-Leons. It doarpshûs hjit de Murdhûn, ferneamd nei de bynamme fan de Húnzers.

Tsjerke

Nikolaastsjerke

De protestantske gemeente Hilaard-Húns-Leons makket út en troch gebrûk fan de Nikolaastsjerke.

Ferienings

• Soas Húns-Leons
• De Takomst - toaniel
• Keatsferiening

Berne

• Pieter Hiemstra (1878-1953), lânbouwer, fakbûnsman en SDAP-politikus
• Frederik Gerard van Dijk (1905-1994), abbekaat en VVD-politikus
• Jan Rodenhuis (1917-1987), sosjalistysk steatelid, keatser
• Tineke Fopma (1953-), hurdfytser.

Alde skoalle

Befolkingsferrin

Jier	1954	1959	1964	1969	1974	1999	2004	2022
Ynwenners	151	154	152	144	129	101	104	105

It besjen wurdich

Húnzermûne

De Wikipedy hat ek in side Nikolaastsjerke (Húns).

De Wikipedy hat ek in side Húnzermûne.

• De 13e-iuwske Nikolaastsjerke.
• In eintsje súd fan Húns stiet de Húnzermûne, in poldermole út 1829.

Ferkear

Der ride bussen nei Ljouwert en nei Boalsert.

Ferskaat

• Húns en Leons yn fûgelflecht, dit boekje waard útjûn by it 100-jierrich bestean fan de keatsferiening.

Sjoch ek

• Beskerme steds- en doarpsgesichten yn Fryslân
• Fryske doarpen

Keppeling om utens

• webstee van Huins en Leons

Boarnen, noaten en referinsjes

Boarnen, noaten en/as referinsjes:

Commons Wikimedia Commons  Ofbylden dy't by dit ûnderwerp hearre, binne te finen yn de kategory Húns fan Wikimedia Commons.