Jûzjno-Sachalinsk

Jûzjno-Sachalinsk (Russysk: Южно-Сахалинск; "Súd-Sachalin") is in stêd op it Russyske eilân Sachalin. De stêd is it haadplak fan de oblast Sachalin. Yn Japan hjit de stêd Toyohara (豊原).

Jûzjno-Sachalinsk Южно-Сахалинск
sintrum
Flagge	Wapen
Polityk
Lân	Ruslân
Kraj	Sachalin
Sifers
Ynwennertal	181.587 (2021)
Oerflak	164,66 km²
Befolkingstichtens	1102,8 ynw./km²
Hichte	50 m
Oar
Stifting	1882 stêd sûnt 1946
Simmertiid	(UTC+11) MSK+8
Koördinaten	46° 58' N 142° 44' E
Webside	www.yuzhno-sakh.ru

Geografy

Jûzjno-Sachalinsk leit yn it súdeastlike diel fan Sachalin oan de rivier Sûsûja, ek bekend as de Swarte Rivier, sa'n 25 km fan de eastlike kust en de See fan Ochotsk, 50 km fan de westlike kust en de Grutte Oseaan en 20 km fan de Anivabaai yn it suden fan Sachalin. It is de grutste stêd fan it eilân en de iennige stêd mei mear as 100.000 ynwenners. Oan de eastlike kant wurdt Jûzjno-Sachalinsk beskerme troch in bergrige. De ôfstân fan Moskou is himelsbreed 6.660 km.

De belangrykste ferkearsieders op it eilân binne de haadwei yn Jûzjno-Sachalinsk, it spoar en de lofthaven.

Skiednis

Japanske D51-22 lokomotyf op it stasjon

De stêd waard yn 1882 stifte troch Russyske twangarbeiders en waard doe Vladimirovska (Владимировка) neamd. Nei de Russysk-Japanske kriich fan 1904-1905 stie de stêd neffens it Ferdrach fan Portsmouth tusken 1905 en 1945 ûnder Japansk bestjoer. Yn dy tiid waard de stêd Toyohara neamd en wie de stêd it haadplak fan de prefektuer Karafuto. Yn dy tiid leine de Japanners it spoar yn it suden oan mei in smellere spoarbreedte as it spoar yn it Russyske noarden fan it eilân. De Japanners brochten tûzenen Koreaanske twangarbeiders nei Sachalin. Tsjintwurdich is it iennige gebou út de Japanske tiid in karakteristike museum fan de stêd.

Nei de Twadde Wrâldkriich foel Sachalin wer yn hannen fan Ruslân. Wylst de Japanske troepen de ôftocht blaasden, bleaune de Koreanen efter. In soad hopen om werom te gean nei Koreä en wegeren dêrom it steatsboargerskip fan de Sovjet-Uny.

Yn 1946 krige Jûzjno-Sachalinsk stedsrjochten en de hjoeddeiske namme.

It duorre noch oant 1990, nei it ophelpen fan de diplomatike relaasjes tusken Súd-Koreä en Ruslân, dat de Koreanen holpen waarden om te repatriëarjen nei harren lân fan komôf. It Japanske regear betelle de bou fan in opfanghûs yn Súd-Koreä en in wenwyk yn Anshan. Likernôch 2.000 Koreanen fan de earste generaasje ferhûzen dêr hinne.

Befolkingsferrin

Befolkingsferrin

Jier	1925	1935	1959	1970	1979	1989	2002	2010	2021
Ynwenners	15.280	28.459	85.510	105.840	139.861	159.299	175.085	181.728	181.587

• Ofbylden
• 
  Parade Befrijingsdei (2019)
• 
  Lofthaven
• 
  Katedraal fan de Berte fan Kristus
• 
  Museum
• 
  Roomsk-katolike tsjerke

Ofbylden dy't by dit ûnderwerp hearre, binne te finen yn de kategory Jûzjno-Sachalinsk fan Wikimedia Commons.