Stephen Hunter (Kansas City (Missoery), 25 maart 1946) is in Amerikaansk skriuwer, essayist en filmkritikus. Yn 2003 waard him de Pulitzerpriis foar Krityk takend.

Stephen Hunter
skriuwer
persoanlike bysûnderheden
echte namme Stephen Hunter
nasjonaliteit Amerikaansk
berne 25 maart 1946
berteplak Kansas City (Missoery)
etnisiteit Angelsaksysk Amerikaansk
wurk
taal Ingelsk
sjenre romans, essay's, non-fiksje,
resinsjes
jierren aktyf 1971 – no
offisjele webside
www.stephenhunter.net

Libben en karriêre bewurkje seksje

Jonkheid en oplieding bewurkje seksje

Hunter waard yn 1946 berne yn Kansas City, yn 'e Amerikaanske steat Missoery, as de soan fan Charles Francis Hunter, in heechlearaar logopedy, en dy syn frou Virginia Ricker, in skriuwster fan berneboeken. Hy groeide op yn Evanston, yn Illinois, krekt benoarden Chicago, dêr't syn heit ferbûn wien oan 'e Noardwestlike Universiteit. Syn heit waard yn 1975 fermoarde troch twa manlike prostituees.

Nei't er yn 1968 ôfstudearre wie oan 'e Noardwestlike Universiteit mei in bachelorgraad yn sjoernalistyk, waard Hunter oproppen foar it ferfoljen fan syn tsjinstplicht. Hy tsjinne twa jier yn it Amerikaanske Leger yn 'e 'Alde Garde', it Amerikaanske 3e Ynfanteryrezjimint, in ienheid dy't yn Washington, D.C. stasjonearre is en operasjonele misjes kombinearret mei seremonieel fertoan, benammen oangeande it wachthâlden by it Grêf fan 'e Unbekende Soldaat op it Nasjonaal Begraafplak Arlington. Yn dy tiid skreau Hunter ek foar in krante fan it Amerikaanske Leger, de Pentagon News.

Karriêre bewurkje seksje

Yn 1971 naam Hunter in baan oan by The Baltimore Sun, dêr't er tsien jier lang op 'e redaksje wurke oan kopijtarieding. Yn 1982 waard er filmkritikus by deselde krante, in posysje dy't er behold oant er yn 1997 oerstapte nei The Washington Post, dêr't er itselde wurk die. Yn 2003 wûn er foar syn resinsjes de prestizjeuze Pulitzerpriis foar Krityk. Yn 2008, doe't de Post besunigje moast, ferliet Hunter de krante mei in gouden hândruk en hold er op as kritikus.

Underwilens hied er ek súkses berikt as romanskriuwer, en dêr leid er him doe fierder op ta. Yn dy hoedanichheid is Hunter benammen bekend fan 'e Bob Lee Swagger-romansearje oer in Amerikaanske slûpskutter en de Earl Swagger-trilogy. Fierders skreau Hunter ek essays en inkele non-fiksjeboeken, wêrfan't it bekendste, American Gunfight (2005), de moardoanslach behannelet troch Portorikaanske nasjonalisten op presidint Harry Truman op 1 novimber 1950.

Priveelibben bewurkje seksje

Hunter stiet bekend as in grut leafhawwer fan fjoerwapens en in oanhinger fan frij wapenbesit yn 'e Feriene Steaten. Dat beskôget er as in grûnrjocht dat fêstlein wêze soe yn 'e Amerikaanske Grûnwet, en hy hat it yn ferskate opinystikken en fraachpetearen ferdigene.

Wurk bewurkje seksje

Fiksje bewurkje seksje

Romans
  • 1980 – The Master Sniper
  • 1982 – The Second Saladin
  • 1985 – Target (in ferboeking fan 'e film mei deselde namme)
  • 1985 – The Spanish Gambit (letter werútbrocht ûnder de titel Tapestry of Spies)
  • 1989 – The Day before Midnight
  • Bob Lee Swagger-searje
    • 1993 – Point of Impact
    • 1996 – Black Light
    • 1998 – Time to Hunt
    • 2007 – The 47th Samurai
    • 2008 – Night of Thunder
    • 2009 – I, Sniper
    • 2010 – Dead Zero (ek ien fan 'e Ray Cruz-boeken)
    • 2013 – The Third Bullet
    • 2014 – Sniper's Honor
    • 2017 – G-Man
    • 2019 – Game of Snipers
    • 2022 – Targeted
  • 1994 – Dirty White Boys (in prequel fan Black Light)
  • Earl Swagger-trilogy
    • 2000 – Hot Springs
    • 2001 – Pale Horse Coming
    • 2003 – Havana
  • Ray Cruz-boeken
    • 2010 – Dead Zero (ek in diel fan 'e Bob Lee Swagger-searje)
    • 2011 – Soft Target
  • 2015 – I, Ripper
  • 2021 – Basil's War
Koarte ferhalen
  • 2010 – Casey at the Bat (yn Agents of Treachery, û.red.f. Otto Penzier)

Non-fiksje bewurkje seksje

  • 1996 – Violent Screen: A Critic's 13 Years on the Front Lines of Movie Mayhem
  • 2005 – Now Playing at the Valencia: Pulitzer Prize-Winning Essays on Movies
  • 2005 – American Gunfight: The Plot to Kill Harry Truman and the Shoot-out that Stopped It (mei John Bainbridge jr.)

Keppelings om utens bewurkje seksje

Boarnen, noaten en referinsjes bewurkje seksje

Boarnen, noaten en/as referinsjes:

Foar boarnen en oare literatuer, sjoch ûnder: Notes, op dizze side.