William F. Hanson
William F. Hanson (folút: William Frederick Hanson; Vernal (Utah), 23 oktober 1887 – Provo (Utah), 22 juny 1969) wie in Amerikaansk musikolooch en komponist dy't benammen saakkundich wie op it mêd fan Yndiaanske muzyk.
| William F. Hanson | ||
| persoanlike bysûnderheden | ||
| echte namme | William Frederick Hanson | |
| nasjonaliteit |  Amerikaansk
| |
| berne | 23 oktober 1887 | |
| berteplak | Vernal (Utah) | |
| stoarn | 22 juny 1969 | |
| stjerplak | Provo (Utah) | |
| etnisiteit | Angelsaksysk Amerikaansk
| |
| wurkpaad | ||
| berop/amt | komponist | |
| jierren aktyf | ±1910 – 1969 | |
Libben en karriêre bewurkje seksje
Hanson waard yn 1887 berne yn Vernal, yn 'e Amerikaanske steat Utah, as de soan fan Peter Hanson en dy syn frou Sarah Helen Glines. Hy troude op 19 augustus 1910 mei in Afton Pack yn 'e timpel fan 'e Tsjerke fan Jezus Kristus fan de Hilligen fan de Lêste Dagen yn Salt Lake City. Mei har hied er twa soannen, Gene R. Hanson en J. Howard Hanson, en ien dochter, Elma Hanson Falkner.
Hanson genoat syn oplieding oan 'e Brigham Young Universiteit yn Provo, dêr't er sawol in bachelor- as in mastergraad yn 'e musikology behelle. Hy waard komponist en wurke as heechlearaar musikology. Syn grutste bekendheid krige er doe't er yn gearwurking mei de Yndiaanske musika en aktiviste Zitkála-Ša yn 1913 The Sun Dance skreau, dat de earste Yndiaanske opera wie. Hanson ferdjippe him neitiid fierder yn 'e muzikale tradysjes fan 'e ûnderskate Yndiaanske folken yn 'e Feriene Steaten, en ûntjoech him ta in rûnom erkend ekspêr op dat mêd.
Hanson syn frou ûntfoel him op 28 jannewaris 1967, en sels kaam er op 22 juny 1969 nei in lang siikbêd te ferstjerren yn Provo, yn 'e âlderdom fan 81 jier.
Keppelings om utens bewurkje seksje
| Boarnen, noaten en/as referinsjes: |