James Garfield

James Abram Garfield (Moreland Hills, Ohio, 19 novimber 1831 - Long Branch, New Jersey, 19 septimber 1881) wie de 20e Presidint fan de Feriene Steaten en de twadde presidint dy't fermoarde waard.

Portret fan James A. Garfield

Syn amtstermyn wie ien fan de koartste yn de skiednis fan Amerikaanske presidinten; seis moannen en 15 dagen (de koartst sittende presidint wie William Henry Harrison).

Garfield waard berne yn it destiidske Orange Township, Cuyahoga County, Ohio, in foarstêd te súdeasten fan Cleveland. Syn heit stoar yn 1833, en hy waard grutbrocht troch syn mem en in omke. Hy waard learaar, joech les yn klassike talen, en waard letter haad fan it Eclectic Institute dêr't hy les joech. Op 11 novimber 1858 troude hy mei Lucretia Randolph, en se krigen fiif bern. Syn soan James Rudolph Garfield, waard ek politikus en wie letter Secretary of the Interior ûnder Theodore Roosevelt.