Johnny Lion

Johnny Lion, pseudonym fan John van Leeuwarden (De Haach, 4 july 1941 - Breda, 31 jannewaris 2019), wie in Nederlânsk sjonger en akteur. Hy wenne sûnt de jierren tachtich yn Breda.

Johnny Lion
artyst en/of kabaretier
Johnny Lion en Sophie van Kleef mei gouden plaat foar Sophietje (1966)
persoanlike bysûnderheden
echte namme	Jan van Leeuwarden
nasjonaliteit	Nederlânsk
berne	4 july 1941
stoarn	31 jannewaris 2019 (77 jier)
wurkpaad
wurksum as	Sjonger, akteur, sjoernalist
jierren aktyf	1959-2019
offisjele webside
(in) IMDb-profyl

The Jumping Jewels

Yn 1959 foarme er mei in oatal skoalfreonen Johnny & His Jewels, letter omneamd yn The Jumping Jewels. Dy groep, formearre nei it foarbyld fan de rocker Cliff Richard, skoarde yn 1961 in nûmer-ienhit mei Wheels en hie dêrnei oant 1965 noch in protte súkses yn Nederlân.

Solo

Johnny Lion yn 2008

Yn dat jier gie Van Leeuwarden by de groep wei om as Nederlânsktalige solosjonger fierder te gean. Dat smiet him fuortendaliks de grutte hit Sophietje op, it Sweedske nûmer Fröken Fräken fan Thore Skogman op in Nederlânske tekst fan Gerrit den Braber en opdroegen oan syn freondinne en sakepartner Sophie van Kleef. It jier dêrnei skoarde er mei Tjingeling wer in hit en iepene er mei Van Kleef in kleanboetyk mei de namme Sophie en Johnny. Dy saak bestie oant sy yn 1969 út elkoar giene.
Nei Tjingeling slagge it him net en helje nochris in wiere hit. Wol krige er in fêst arranzjemint by it Sirkus Boltini, tegearre mei Rob de Nijs. Yn lettere jierren liet Lion út en troch as sjonger fan him hearre, ûnder mear mei de single Alleen in Dallas, dy't in beskieden hit waard, en mei it titelliet fan de film Brandende Liefde út 1983. Op dy platen brûkte er de namme John Lion.

Sjoernalistyk

Van Leeuwarden bleau nei syn sjongkarriêre wurkjen by Sirkus Boltini, no as perssjef. Letter skreau er ek kollums foar it wykblêd Panorama en makke yn 1995 foar dat blêd yn 'e mande mei Govert de Roos de rige In bed met Johnny Lion. Ek hat er as sjoernalist foar ferskate tydskriften en kranten wurke, en wie er ûnder oare tsien jier (2001-2011) haadredakteur fan it SENA Performers Magazine.

Film

Johnny Lion hat ek akteur west yn de spylfilms Liefdesbekentenissen (1967), Siberia (1988) en yn Van God Los (2003).

De ein

Van Leeuwarden stoar yn de âldens fan 77 jier yn Breda. Hy wie al lange tiid siik en wie oanhelle mei longkanker en de Sykte fan Alzheimer.

Boarnen, noaten en referinsjes

Boarnen, noaten en/as referinsjes:

Zanger Johnny Lion (77) van Sophietje overleden, omroepbrabant.nl, 1 febrewaris 2019