Vlamertinge

Vlamertinge is in doarp yn de Belgyske provinsje West-Flaanderen en in dielgemeente fan de stêd fan Iper. It doarpssintrum fan Vlamertinge leit krekt bûten it stedssintrum fan Iper, oan de haadwei N38 nei de deunby leine stêd Poperinge. Neist it stêdssintrum fan Iper sels, is Vlamertinge de grutste dielgemeente fan Ypres. Yn it westen fan Vlamertinge, oan de wei nei Poperinge, leit de buorskip Brandhoek.

It wapen fan Vlamertinge.

Skiednis

De âldste gegevens oer Vlamertinge datearje út 'e Midsiuwen. Yn 857 waard in kapel boud. Yn 970 waard Iper ferwoaste en baarnde de kapel fan Vlamertinge ôf. It âldste oerlevere dokumint dêr't de namme Flambertenges yn foarkomt, is in akte út it jier 1066. Boudewyn fan Risel, greve fan Flaanderen, syn frou Adela en harren soan Boudewyn, skonken yn dy akte lânerijen oan it kapittel Sint-Pieters yn Risel, dy't foar in tsiendepart yn Elverdinge en foar in tsiendepart yn Vlamertinge leine: In territorio Furnensi, in villa Elverzenges, decinam unam; Flambertenges decinam similiter unam.

Under it ancien régime wie Vlamertinge in hearlikheid fan Veurne-Ambacht. It hie yn dy tiid in protte te lijen ûnder de belegerings fan it deunby leine Iper.

Yn 'e Earste Wrâldoarloch waard it hiele doarp Vlamertinge ferwoaste troch bombardeminten. Yn 1944 waard Vlamertinge yn de Twadde Wrâldoarloch befrijd troch in Poalske pânserdifyzje.

Geografy

Vlamertinge leit 17 meter boppe seenivo. De gemeente grinzget yn it easten oan Iper, yn it súdeasten oan Voormezele, yn it suden oan Kemmel en Dikkebus, yn it súdwesten oan Reningelst, yn it westen oan Poperinge, yn it noarden oan Elverdinge en yn it noardeasten oan Brielen.

Demografyske ûntjouwings

Fan 1487 oant 1697 rûn it ynwennertal fan Vlamertinge sterk tebek. De meast plausibele ferklearring dêrfoar is de Tachtichjierrige Oarloch yn 'e Nederlannen. Yn 'e Earste Wrâldoarloch wie der fannijs in tebekgong fan it tal ynwenners. Dat kaam om't it buorplak Iper doe oan it front lei en swier bombardearre waard, wêrby't ek Vlamertinge ûnder it kriichsgeweld te lijen hie.

Monuminten

• De Sint-Vedastus-tsjerke
• It eardere gemeentehûs fan Vlamertinge út 1922, yn Flaamske neo-renêssansistyske styl
• It kastiel fan Vlamertinge of Castle du Parc waard yn 1857-1858 boud troch op oarder fan de boarchgreve Pierre-Gustave du Parc, nei in ûntwerp fan Joseph Schadde.
• Yn Vlamertinge lizze in tal Britske militêre begraafplakken út 'e Earste Wrâldoarloch:
  • Brandhoek Military Cemetery
  • Red Farm Military Cemetery
  • Vlamertinghe Military Cemetery
  • Vlamertinghe New Military Cemetery
  • Railway Chateau Cemetery
  • Divisional Cemetery
  • Brandhoek New Military Cemetery
  • Brandhoek New Military Cemetery No.3
  • Hop Store Cemetery