Jehannestsjerke (Sohrol)

De Jehannestsjerke fan Sohrol (Armeensk: Սուրբ Յովհաննէս Եկեղեցի; Perzysk: کلیسای هوانس سهرل, کلیسای هوهانس مقدس of کلیسای سهرل) is in leech Armeensk-apostoalysk tsjerkegebou, dy't yn 'e Iraanske provinsje East-Azerbeidzjan by it doarp Sohrol stiet, likernôch 25 km fan 'e stêd Tabriz.

Sint-Jehannestsjerke
Lokaasje
lân	Iran
provinsje	East-Azerbeidzjan
plak	Sohrol
koördinaten	38° 17' N 46° 11' E
Tsjerklike gegevens
tsjerkegenoatskip	Armeensk-Apostoalyske Tsjerke
status	leechsteand
Arsjitektuer
arsjitekt	Samson Jakovljevitsj Makinzev
boujier	1840
Kaart

Lokaasje

De Jehannestsjerke stiet op in heuvel oan 'e súdwestlike râne fan it doarp Sohrol, likernôch 25 km himelsbreed fan Tabriz en 13 km fan 'e autodyk Tabriz–Marand.

Skiednis

Koepel.

Op it plak waard yn 'e 5e/6e iuw nei Kristus in tsjerke boud, dêr't yn 'e 19e iuw allinne in ruïne fan oer wie. Yn 1840 waard op 'e fûneminten fan dy tsjerke mei it jild fan in rike Armeen ûnder lieding fan 'e Russyske generaal Samson Jakovljevitsj Makintsev in nije tsjerke boud. De tsjerke rekke yn 1936 troch in ierdskodding skeind en dêrnei waarden de doarren en de ramen fan 'e tsjerke plondere. Nei de emigraasje fan in soad Armeenske kristenen nei de Twadde Wrâldkriich, fral nei de Sovjet-Uny, kaam de tsjerke leech te stean.

Arsjitektuer

De tsjerke is 18,45 m lang, wylst de breedte by it alter 5,7 m en foar de rest 4,5 m mjit. De bakstiennen tsjerke hat yn it west in tagong, yn 'e midden in sintrale rjochthoekige hal en in alterromte yn it easten.

Boppe de westlike tagong hat de tsjerke in achtpuntige klokketoer mei in pyramidefoarmige koepel. Fierder hat de sintrale hal in grutte kegelfoarmige koepel en boppe it alter in lytsere koepel mei in achtsidige, pyramidefoarmige koepel.

Oars

By de fotowedstriid Wiki Loves Monuments wûn in troch Farzin Izaddoust Dar makke ôfbyld fan it tsjerkegebou it earste plak.

Boarnen, noaten en referinsjes

Boarnen, noaten en/as referinsjes:

Dizze side is foar in part in oersetting fan 'e Dútsktalige Wikipedyside; sjoch foar de bewurkingsskiednis de:Johanneskirche (Sohrol) Commons Wikimedia Commons  Ofbylden dy't by dit ûnderwerp hearre, binne te finen yn de kategory Sint-Jehannestsjerke (Sohrol) fan Wikimedia Commons.