Katedraal fan Clonfert

De Katedraal fan Clonfert (Ingelsk: Clonfert Cathedral) is in Anglikaanske katedraal fan 'e Church of Ireland yn Clonfert (County Galway) yn Ierlân. Sûnt de gearfoeging fan meardere bisdommen is it ien fan 'e trije katedralen fan it Anglikaanske bisdom Limerick-Killaloe.

Katedraal fan Clonfert Clonfert Cathedral
Lokaasje
lân	Ierlân
plak	Clonfert
koördinaten	53° 14' N 8° 3' W
Tsjerklike gegevens
tsjerkegenoatskip	Tsjerke fan Ierlân
bisdom	Limerick-Killaloe
Arsjitektuer
boujier	sûnt 1180
boustyl	romaanske en goatyske arsjitektuer
Kaart

Skiednis

Sint-Brandaan stifte yn 557 in kleaster yn Clonfert. Hy beneamde Sint-Moinenn ta prior. De hillige biskop waard der ek beïerdige. De hjoeddeiske tsjerke waard yn de tolfte iuw op it plak fan in âldere tsjerke boud, dy't yn 'e 6e iuw troch Sint-Brendanus stifte wie, en ferbûn mei in kleaster.

Beskriuwing

Tsjerkeskip

It âldste part fan 'e tsjerke giet werom nei de tiid om 1180 hinne. It profilearre portaal is in masterwurk fan hiberno-romaanske styl en is dekorearre mei bistekoppen, minskekoppen en florale motiven. Boppe it portaal is oan 'e muorre in trijehoekige fersiering oanbrocht mei ek dêr minskekoppen.

Ut de let-romaanske tiid datearje de 13e-iuwske eastlike ramen fan it koer. De koerbôge waard yn 'e 15e iuw ynbrocht en is fersierd mei ingels, in rozet en in seewiif mei in spegel. Ek de dragende bôgen fan 'e westlike toer binne dekorearre mei 15e-iuwske hollen. Ut likernôch deselde tiid stamt de sakristy.

Fan it súdlike romaanske dwersskip binne allinnich dielen fan de muorren stean bleaun. It goatyske noardlike dwersskip waard ôfbrutsen.

De roomsk-katolike Us Leaffroutsjerke likernôch 1,5 km. súdlik besit noch in houten byld fan in Madonna mei Bern út de 14e iuw. Oft it byld út de katedraal komt is net alhiel dúdlik. It soe ek út de St. Mary de Portu Puro-abdij stamme kinne.

Behâld

De katedraal stie op 'e list fan 2000 World Monuments Watch fan it World Monuments Fund. De struktuer fan 'e sânstien hie bot fan it waar te lijen en eardere ynspannings om 'e tsjerke te behâlden levere net foldwaande op foar de problemen fan it gebou. Ek de moassen soargen foar in stadich ferfal fan 'e tsjerke. Om't de lytse kongregaasje sels net de nedige kosten byinoar bringe koe, joech de ûndernimming American Express oan 'e organisaasje finansjele stipe foar de needsaaklike konservearingskosten.

Ofbylden

• 
  Portaalhollen
• 
  Ingel
• 
  Seewiif
• 
  15e iuwsk reliëf fan in biskop oan it portaal

• 
  Ingel
• 
  Draak
• 
  Detail boppe yngong

Keppelings om utens

• (in) Oer Clonfert Cathedral Co. Galway.
• (in) Beskriuwing fan de katedraal fan Clonfert + fotos
• (in) Katedraal fan Clonfert op Ireland West

Boarnen, noaten en referinsjes

Boarnen, noaten en/as referinsjes:

Dizze side is alhiel of foar in part in oersetting fan de Ingelsktalige Wikipedyside; sjoch foar de bewurkingsskiednis: [1] Commons Wikimedia Commons  Ofbylden dy't by dit ûnderwerp hearre, binne te finen yn de kategory Katedraal fan Clonfert fan Wikimedia Commons.