P-47 Thunderbolt

Republic P-47 Thunderbolt

Rol	Eskortejager, jachtbommesmiter
Makker	Republic Aviation
Untwerper	Alexander Kartveli
Earste flecht	6 maaie 1941
Yn tsjinst	1942
Ut tsjinst	1966 (Perû)
Tal makke	15.660 - 15.677 (1941-1945)
Grutste brûkers	United States Army Air Forces, Royal Air Force, Frânske Loftmacht
Farianten	XP-47A, XP-47B, P-47B,P-47C, P-47D, P-47G, XP-47K, XP-47L, XP-47H, XP-47J, P-47M, P-47N

De Republic P-47 Thunderbolt (bynamme "Jug") wie in ienmotorige jachtfleanmasine fan de USAAF dy't yn de Twadde Wrâldkriich in protte brûkt wurden is.
It tastel wie yn it earstoan ornearre foar loftfjochterij en it eskortearjen fan bommesmiters, mar it die bliken dat it likegoed as better foar grûnoanfallen foldie. Neist de Feriene Steaten hiene ek oare alliearde loftmachten it tastel yn harren arsenaal. It ûntwerp wie fan Alexander de Seversky en Alexander Kartveli.

Untjouwing

De Republic Aviation Company kamen ta it beslút dat har prototypes XP-44 en XP-47 ynferieur wiene fergelike mei de Dútske jagers by it útbrekken fan de Twadde Wrâldkriich. Sy ferbetteren it ûntwerp en lang om let late dat ta de XP-47A. Dat prototype waard folslein feroare ta de XP-47B, dy't suver gjin oerienkomsten mear hie mei de A-fariant, troch de Amerikaanske loftmacht beteld waard yn juny 1940. It wie in noflik tastel foar de piloat, de cockpit hie bygelyks airconditioning.
Fanwege de yngewikkelde turbosupercharger waard de romp fan it tastel frijwat djip. De wjukken waarden dêrtroch relatyf heech set. De grutte diameter fan de propeller, 3.7 m, betsjutte dat it lâningsgestel tige lang wurde moast. Om dat op te lossen koe it lâningsgestel 230 mm útskood wurde middels in teleskoop-meganisme. It tastel waard sa de swierste jager ea makke. De XP-47B fleach foar it earst op 6 maaie 1941 en makke in soad yndruk wat fleaneigenskippen oanbelange.

Wylst Republic besocht om problemen mei rolroeren, masinegewearen, brânstofsysteem en ûntstekkingssysteem te helpen, bestelde de USAAF al 171 P-47B's; it earste prototype waard yn desimber 1941 levere.

Operasjoneel

De P-47C wie de earste fariant dy't brûkt waard foar in gefjochtsmissy ein juny 1942. Der waarden letter ferskate oanpassingen dien dêr't de P-47D út ûntstie; dêrfan binne de fierwei de measten makke, nammentlik 12.602. Nei WKII binne der in soad tastellen oan Súd-Amerikaanske lannen levere oant yn de jierren 60. Der binne in totaal fan 15.686 Thunderbolts boud. In lyts oantal is hjoeddendei noch fleanree.

Spesifikaasjes (P-47D Thunderbolt)

Bemanning: 1
Lingte: 11.00 m
Spanwiidte: 12.42 m
Hichte: 4.47 m
Fleanoerflak: 27.87 m²
Gewicht leech: 4.536 kg
Gewicht laden (maks.): 7.938 kg
Motor: 1 Pratt & Whitney R-2800-59 radiaalmotor fan 2.535 hk (1,890 kW)
Maks. faasje: 697 km/o op 9.145 m
Fleanberik: 1290 km (by gefjocht)/ 2900 km (krúsfaasje)
Maks. plafond: 13.100 m
Stiichfaasje: 15,9 m/s
Belesting: 284,8 kg/m²
Bewapening:
- 8 × .50 in (12.7 mm) M2 Browning masinegewearen (3400 patroanen)
- Oant 1.134 kg bommen
- 10 × 5 inch (127 mm) raketten

Keppeling om utens

Warbirds, ynformaasje oer de P-47

Wikimedia Commons

Ofbylden dy't by dit ûnderwerp hearre, binne te finen yn de kategory P-47 Thunderbolt fan Wikimedia Commons.