Rosa Caracciolo

Rosa Caracciolo, echte namme: Rósza Tassi (Boedapest, 29 juny 1972), is in fan oarsprong Hongaarsk rêstend model, neakenmodel en pornografysk aktrise, dy't de Italjaanske nasjonaliteit oannommen hat. Hja is troud mei de ferneamde Italjaanske pornoakteur, -regisseur en -produsint Rocco Siffredi.

Rosa Caracciolo
persoan yn de seksyndustry
Rosa Caracciolo mei har man Rocco Siffredi.
persoanlike bysûnderheden
echte namme	Rósza Tassi
nasjonaliteit	Hongaarsk Italjaansk
berne	29 juny 1972
berteplak	Boedapest (Hongarije)
etnisiteit	Hongaarsk
wurkpaad
wurksum as	neakenmodel, pornoaktrise
jierren aktyf	1992 – 1998
offisjele webside
gjint

Libben en karriêre

Caracciolo is hikke en tein yn 'e Hongaarske haadstêd Boedapest, dêr't se sûnt har tinerjierren wurke as model. Yn alle boarnen wurdt fermelden dat hja yn 1990 Miss Hongarije west hawwe soe, mar de listen fan dy titel bewize dat dat jiers in oar Hongaarsk model, Kinga Czuczor, dêrta keazen waard. Dat lit fansels iepen dat Caracciolo in alternative Miss-ferkiezing wûn hat of miskien in brâns-ferkiezing (lykas Miss Toerisme Hongarije of sokssawat).

Hoe dan ek, mei goed tweintich jier ferfear hja begjin jierren njoggentich nei Itaalje ta, dêr't hja in karriêre as neakenmodel begûn en fan 1992 ôf ek as pornoaktrise. Yn 1993 kaam Caracciolo yn it Frânske Cannes yn 'e kunde mei de doe al bekende en letter noch ferneamder wurden Italjaanske pornoakteur, -regisseur en -produsint Rocco Siffredi. Hja trouden noch datselde jiers. Hja krigen twa soannen, Lorenzo (1996) en Leonardo (1999).

Tusken 1993 en 1998, doe't se har út 'e pornoyndustry weromloek, wurke Caracciolo gauris gear mei har man, lykas yn Tarzan X: Shame of Jane, út 1995, dat nei alle gedachten har bekendste film is. Yn dy troch regisseur Joe D'Amato yn it Meksikaanske oerwâld draaide produksje wurdt it âlde ferhaal fan Tarzan en Jane nochris op 'e nij oereide. Hoewol't it in pornofilm is, springt er der mank dat sjenre yn positive sin út troch de aktearkapasiteiten fan 'e beide haadrolspilers Caracciolo en Siffredi.

Njonken Tarzan X spile Caracciolo yn har karriêre, neffens de Internet Adult Film Database (IAFD), noch yn fjirtjin oare pornografyske films, dêr't fiif fan regissearre waarden troch Joe D'Amato. Fierders ferskynde se yn 2007 mei Siffredi op 'e Italjaanske tillefyzje yn in reklamespotsje foar 48248, in sms-tsjinst.

Keppelings om utens

• (in) Biografy en filmografy fan Rosa Caracciolo yn 'e Internet Movie Database (IMDb)
• (in) Biografyske gegevens en filmografy fan Rosa Caracciolo yn 'e Internet Adult Film Database (IAFD)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: Referencias, op dizze side.