Trije-ienheidskatedraal (Jeruzalim)

De Trije-ienheidskatedraal (Russysk: Свято-Троицкий собор, Hebriuwsk: קתדרלת השילוש הקדוש) is in russysk-otterdokske katedraal yn Jeruzalim, Israel. De katedraal waard tusken 1860 en 1872 yn opdracht fan de Keizerlike Otterdokske Palestina Feriening yn Sint-Petersburch foar de Russyske pylgers nei it hillige lân boud.

Trije-ienheidskatedraal Свято-Троицкий собор / קתדרלת השילוש הקדוש
bouwurk
lokaasje
lân	Israel
plak	Jeruzalim
adres	Shne'ur Kheshin St.
bysûnderheden
type bouwurk	Katedraal
boujier	1860-1872
arsjitekt	Martin Ivanovitsj Eppinger
boustyl	Neobyzantynske styl
offisjele webside
De katedraal op de side fan de R.-O. Patriargaat

Skiednis

Om in tanimmende oantal Russen yn steat te stellen om feilich in beafeart te meitsjen nei it hillige lân, rjochte it Ministearje fan Bûtenlânske Saken fan it Keizerryk Ruslân yn 1847 in fertsjintwurdiging fan de Russysk-Otterdokske Tsjerke yn Jeruzalim op. De útfiering dêrfan waard oerlitten oan it yn 1859 stifte Palestina-komité, letter (sûnt 1882) de "Keizerlike Otterdokske Palestina-feriening". Nei de oankeap fan lân bûten de muorren fan Jeruzalim joech it komité opdracht om in katedraal, gebouwen foar de missy en muontsen, in sikehûs en ûnderkommens foar pylgers te bouwen. It kompleks ûntstie fan 1860 oant 1864 en om it hiele "Russyske Hiem" waard in stiennen muorre oanlein. De measte gebouwen wiene neffens it ûntwerp fan de russyske arsjitekt Martin Ivanovitsj Eppinger boud.

De katedraal yn 1917

It oarspronklike doel wie om de katedraal te ferneamen nei Aleksander Nevsky, de patroanhillige fan tsaar Aleksander III, mar der waard lang om let besletten de tsjerke te wijeen oan de Hillige Trije-Ienheid. Yn de jierren 1895-1897 fûn in renovaasje plak oan it dak en it ynterieur krige in nije beskildering.

Oan it begjin fan de Earste Wrâldkriich besiet de tsjerklike missy fan Ruslân yn Israel 37 lokaasjes, acht tsjerken en meardere kapellen, twa kleasters, fiif sikehûzen, sân hotels foar pylgers en hast 100 skoallen. De wichtichste taken fan de missy wiene it opfangen fan Russyske pylgers en de foarming fan otterdokske Arabieren. It útbrekken fan de Earste Wrâldkriich twong it personiel te ferhûzjen nei Aleksandrje, mar yn 1919 nei de besetting fan Palestina troch Grut-Brittanje, koene it missy-persoaniel werom komme nei Jeruzalim. Doe't lykwols de beskerming fan in steat weifallen wie ferdwûnen ek de boarnen fan jild. It wie boppedat foar otterdokske kristenen út Ruslân troch de feroare omstannichheden nei de Earste Wrâldkriich ûnmooglik woarn om nei it Hillige Lân te pylgerjen. De missygebouwen waarden oerdroegen oan boargerlike ynstellings lykas in plysjeburo, in finzenis, it Amearikaanske Reade Krús en in gerjochthôf en se rekken yn ferfal.

Yn de tiid fan it Britske mandaat bleau de katedraal yn funksje en foel doe ûnder de jurisdiksje fan Russysk-Otterdokske Tsjerke bûten Ruslân. Mei de tastimming fan Stalin mocht patriarch Alexius I fan 27 maaie 1945 oant 26 juny 1945 in beafeart meitsje nei it hillige lân. By de gefjochten yn de Arabysk-Israelyske Kriich fan 1948 rekke de katedraal slim skeind.

Ynterieur

Nei de stifting fan de steat Israel yn 1948 waard de katedraal oerdroegen oan de Russysk-Otterdokske Tsjerke. De measte gebouwen fan de missy waarden yn de tiid fan de Sovjet-tiid neffens in oerienkomst út 1964 troch de Russyske oerheid ferkocht oan Israel, dy't ûnoffisjeel de namme de "Synappel-deal" kirge, om't it ûnreplik guod fan de missy troch Israel mei Jaffa-synappels betelle waard. It is oant hjoeddedei in striidkwestje om't it net dúdlik is oft de Sovjet-oerheid wol as de juridyske eigner fan de erfenis beskôge wurde kin. Der binne ûnderhannelings geande mei de steat Israel om it Russyske Hiem werom te jaan oan de Russysk-Otterdokske Tsjerke. De katedraal bleau mei in pear oare gebouwen bûten de oerienkomst.

De Trije-ienheidskatedraal is noch jimmeroan ien fan de grutste en moaiste tsjerken fan West-Jeruzalim.

Arsjitektuer

De Trije-ienheidskathedraal is in neo-byzantynsk gebou mei fiif koepels .

De ikonostase fan de katedraal is yn 1869 yn Sint-Petersburch troch N.A. Leontjev makke. De keninklike doarren binne ferguld en skonken troch de foarsitter fan de Keizerlike Otterdokske Palestina Feriening, grutfoarst Konstantyn Nikolajevitsj.

Boarnen, noaten en referinsjes

Boarnen, noaten en/as referinsjes:

Dizze side is alhiel of foar in part in oersetting fan de Russysktalige Wikipedysiden; sjoch foar de bewurkingsskiednis: ru:Троицкий собор (Иерусалим), ru:Русская духовная миссия в Иерусалиме en ru:Апельсиновая сделка Commons Wikimedia Commons  Ofbylden dy't by dit ûnderwerp hearre, binne te finen yn de kategory Trije-ienheidskatedraal, Jeruzalim fan Wikimedia Commons.