Bertekleaster fan de Mem Gods (Moskou)

It Bertekleaster fan de Mem Gods (Russysk: Рождественский монастырь; transl.: Rozjdestvenskikleaster) is in otterdoks kleaster foar nonnen yn Moskou, Ruslân. It kleaster leit noch binnen de Petrovski-ring yn de Wite Stêd oan de lofter kant fan de Neglinnaj.

Rozjdestvenskykleaster

Рождественский монастырь

bouwurk
De kleasterkatedraal
De kleasterkatedraal
lokaasje
lân Ruslân
plak Moskou
adres Ul. Rozjdestvenka 20
koördinaten 55° 45' N 37° 37' E
bysûnderheden
type bouwurk kleaster
boujier begjin 16e iuw, 17e-18e iuw en 19e iuw
monumintale status Kultureel monumint fan federaal belang
monumintnûmer 7710705000 [1]
offisjele webside
mbrsm.ru

Skiednis bewurkje seksje

It kleaster waard yn 1389 stifte om de Slach by Kûlikovo te betinken en neffens guon boarnen soe it oarspronklik noch yn it kremlyn fan Moskou stien ha. Letter, yn 1484, ferhûze it kleaster nei de hjoeddeiske lokaasje. Oare boarnen skriuwe dat it kleaster al sûnt de oprjochting oan de Neglinnaja stien hat. De katedraal fan it kleaster waard tusken 1501 en 1505 boud, mar troch de grutte stedsbrân yn 1547 ferneatige en gau dêrnei wer opboud.

In twadde alter op it suden waard yn opdracht fan tsaar Ivan de Ferskriklike ta eare fan Nikolaas fan Myra oanboud en dêrnei waard de refter boud. De 'Tsjerke fan Jehannes Krysostomos' waard tusken 1676-1677 boud. Ek yn de 17e iuw waard de begraffeniskapel foar de prinslike famylje Lobanov-Rostovski boud.

Yn 1671 wie it kompleks omjûn troch in muorre mei fjouwer tuorren, dy't yn de twadde helte fan de 19e iuw sloopt en ferfongen waard troch in nije muorre, wêrby't âldere dielen op 'e nij tapast waarden. Yn de jierren 1835-1836 waard boppe de tagong fan it kleaster de klassistyske klokketoer fan de arsjitekt Nikolai Iljitsj Kozlovski mei dêryn de 'Tsjerke fan de hillige martler Evgenija fan Cherson' boud.

20e iuw bewurkje seksje

 
It kleaster yn 1882 (Nikolai Naidenov)

Oan it begjin fan de 20e iuw waard it trije ferdjippings tellende kleastergebou boud, dêr't ek in parochiale skoalle yn ûnderbrocht waard. Yn deselde snuorje fûn der nijbou fan de Jehannes Krysostomostsjerke en de refter mei de 'Tsjerke fan de Mem Gods fan Kazan' plak. Ek holden de nonnen harren dwaande mei de opfang fan weesfamkes.

Yn 1922 waard it kleaster sletten en de sulveren omhulsels fan de ikoanen ferwidere en konfiskearre, wylst de ikoanen sels in plak krigen yn de tichteby lizzende Nikolaastsjerke. De kleastergebouwen waarden ferhierd oan kantoaren en wittenskiplike- en ûnderwiisynstellings en de sellen fan de nonnen waarden ta apparteminten ferboud. Guon nonnen krigen tastimming om wenjen te bliuwen yn it eardere kleaster, twa wennen der noch oant yn it ein fan de jierren 1970. It kleastertsjerkhôf waard mei it grêfmonumint foar de famylje Lobanov-Rostovsky yn de Sovjet-tiid romme en in diel fan de kleastermuorren waarden ôfbrutsen.

As earste bouwurk fan it kleaster waard yn 1992 de 'Katedraal fan de Berte fan de Mem Gods' werom jûn oan de Russysk-Otterdokske Tsjerke. Sûnt 14 maaie 1992 fine der wer regelmjittige tsjinsten plak. Op 16 july 1993 bloeide ek it monastike libben wer op en waarden der restauraasjes útfierd.

Ofbylden bewurkje seksje

Boarnen, noaten en referinsjes bewurkje seksje

Boarnen, noaten en/as referinsjes:

Dizze side is alhiel of foar in part in oersetting fan de Russysktalige Wikipedyside; sjoch foar de bewurkingsskiednis: ru:Рождественский монастырь (Москва)