Hillige Geastkleaster (Veliki Novgorod)

It Hillige Geastkleaster (Russysk: Ду́хов монастырь; Dûchov Monastyr) is sûnt de 12e iuw in otterdoksk kleaster yn Veliki Novgorod, Ruslân. It ferlear mei de fal fan it tsarendom de funsksje as kleaster en wurdt tsjintwurdich brûkt troch de oerheid.

Dûchov-kleaster Ду́хов монастырь
bouwurk
De Hillige Geastkatedraal
lokaasje
lân	Ruslân
oblast	Novgorod
plak	Veliki Novgorod
koördinaten	58° 31' N 31° 16' E
bysûnderheden
type bouwurk	Kleaster
boujier	1162 (foar it earst neamd); gebouwen fan ôf 14e iuw
monumintale status	Kultureel monumint fan federaal belang
monumintnûmer	5310022000

Skiednis

It kleaster is tige âld en wurdt al foar it earst yn kroniken út 1162 neamd. It hat ea ien fan de grutte kleasters fan de stêd west, dy't mei it Joerjev-kleaster, it Antonievkleaster, it Chûtinkleaster en it kleaster fan Vjazjisjtsjski meunsterje koe. Tsjintwurdich binne allinne de katedraal en de Trije-ienheidtsjerke mei de refter, it hûs fan de abt en de ruïne fan in gebou noardlik fan it kleaster bewarre bleaun.

Oant de 14e iuw wiene alle kleastergebouwen noch fan hout. Yn 1357 ferriisden de earste stiennen gebouwen, wêrûnder de Katedraal fan de Hillige Geast.

Trije-ienheidtsjerke

De hast yn it sintrum fan it kleastergebiet steande Trije-ienheidtsjerke waard yn 1557 yn opdracht fan hegumen Jonas boud. Oan de tsjerke is in refter mei twa ferdjippings boud; de boppeferdjipping wie de refter sels, wylst de keuken, in bakkerij en twa kelders ûnder wiene ûnderbrocht. It ûntwerp fan de tsjerke folge de nije moade fan de Moskouse tsjerkegebou út de 16e iuw. De tsjerke hat in soad te lijen hân ûnder de Sweedske besetting tusken 1611 en 1617. Ek in brân yn 1685 brocht skea oan it gebou.

Op 5 maart 1786 waard it manljuskleaster omset yn in kleaster foar froulju. De earste nonnen kamen út twa ferskillende kleasters by inoar yn it Hillige Geastkleaster.

Yn 1822 joech tsaar Aleksander I in bedrach fan 10.000 rûbel foar de restauraasje fan it kleaster.

De tsjintwurdige katedraal fan it kleaster waard yn de jierren 1877-1892 boud op it plak fan de stiennen katedraal út 1357. It eklektyske bouwurk wurdt sûnt 1926 brûkt foar de opslach fan de stedsargiven. Under de besetting fan de Dútsers yn de Twadde Wrâldkriich wie de Kommandantur dêr fêstige. Hjoed-de-dei hawwe ek de argiven fan de oblast Novgorod dêr in plak krige.

Boarnen, noaten en referinsjes

Boarnen, noaten en/as referinsjes:

Dizze side is alhiel of foar in part in oersetting fan de Russysktalige Wikipedyside; sjoch foar de bewurkingsskiednis: ru:Духов монастырь (Великий Новгород) Commons Wikimedia Commons  Ofbylden dy't by dit ûnderwerp hearre, binne te finen yn de kategory Dûchov-kleaster fan Wikimedia Commons.