Liam Davison

Liam Davison (folút: Liam Patrick Davison; Melbourne (Fiktoaria), 29 july 1957 – by Hrabove (de Oekraïne), 17 july 2014) wie in Australysk learaar, resinsint en skriuwer fan romans en koarte ferhalen. Hy kaam yn 2014 om boppe de eastlike Oekraïne by de fleanramp mei Malaysia Airlines-flecht 17.

Liam Davison
skriuwer
persoanlike bysûnderheden
echte namme	Liam Patrick Davison
nasjonaliteit	Australysk
berne	29 july 1957
berteplak	Melbourne (Fiktoaria)
stoarn	17 july 2014
stjerplak	by Hrabove (de Oekraïne)
etnisiteit	Angelsaksysk Australysk
wurk
taal	Ingelsk
sjenre	lit. romans & koarte ferhalen
jierren aktyf	1988 – 2014
offisjele webside
gjint

Libben en karriêre

Davison waard yn 1957 berne yn Melbourne, de haadstêd fan 'e Australyske steat Fiktoaria. Hy genoat syn oplieding oan it St Bede's College yn Melbourne en dêrnei oan it Melbourne Teacher's College. Oant 2007 wied er as learaar kreätyf skriuwen ferbûn oan it Chisholm Ynstitút yn Frankston, in foarstêd fan Melbourne. Dêrnjonken levere er op it mêd fan literatuerkrityk út en troch bydragen oan 'e krante The Australian.

Yn 1988 sette Davison útein mei in eigen karriêre as skriuwer, wêrby't er in oeuvre opboude dat sawol romans as koarte ferhalen omfieme. Yn 1993 wûn er de National Book Council's Banjo Award for Fiction. Dêrnjonken waard er troch de jierren nominearre foar ferskate oare prizen, wêrûnder de "The Age" Book of the Year Award en de Literatuerpriis fan de Fiktoriaanske Premier. Davison syn koarte fiksje waard opnommen yn withoefolle Australyske literêre blomlêzings.

Davison wie ien fan 'e passazjiers op Malaysia Airlines-flecht 17 fan Amsterdam nei Kuala Lumpur, dy't boppe it easten fan 'e Oekraïne troch pro-Russyske rebellen oansjoen waard foar in transportfleantúch fan 'e Oekraynske Loftmacht en sadwaande by fersin delsketten waard. Dêrby kamen Davison, syn frou Francesca "Frankie" Davison, in leararesse oan it Toorak College yn Mount Eliza, en alle 296 oare ynsittenden om it libben. Davison waard 56 jier.

Wurk

• 1988 – The Velodrome
• 1989 – The Shipwreck Party (ferhalebondel)
• 1993 – Soundings
• 1994 – The White Woman
• 1999 – The Betrayal
• 1999 – Collected Stories (hieltyd útwreide werútjeften yn 2001, 2003, 2011, 2012 en 2013)
• 1999 – The Spirit of Australia (mei Jim Conquest)
• 2001 – The Florilegium

Prizen en nominaasjes

Jier	Priis	Resultaat	Kategory	Foar
1993	National Book Council's Banjo Award	wûn	bêste fiksje	Soundings

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.