Liski

Liski (Russysk: Лиски) is in stêd yn Ruslân. It is de haadstêd fan it rayon Liski yn it oblast Voronezj.

Liski
De yn 2003-2013 yn Liski boude katedraal fan de Vladimir-ikoan fan de Mem Gods
Flagge	Wapen
Polityk
Lân	Ruslân
Oblast	Voronezj
Sifers
Ynwennertal	53.897 (2018)
Oerflak	65 km²
Befolkingstichtens	829,18 / km²
Stêdekloft
Hichte	110 m (sintrum)
Oar
Stifting	1576 Foarhinne Novaja Pokrovka
Tiidsône	(UTC+3)

Geografy

De stêd leit oan de linker kant fan de rivier de Don, 80 kilometer súdeastlik fan Voronezj en 547 kilometer súdeastlik fan de Russyske haadstêd Moskou.

De tichtstbylizzende stêden binne Ostrogozjsk (westlik), Bobrov (eastlik) en Novovoronesj (noardwestlik).

Sa'n tsien kilometer westlik fan Liski leit it natoergebiet Divnogorje mei it Marije-Himelfeartkleaster. It natoergebiet stiet bekend om de krytrotsen mei harren karakteristike eroazjefoarmen.

It klimaat yn Liski is tuskenbeiden kontinintaal. De trochsnee delslach bedraacht alle jierren 430 oant 560 mm.

Skiednis

Liski ûntstie yn 1571 as in wachtpost tsjin mooglike oanfallen fan Krim-Tataren op it tsaardom Ruslân. Yn it begjin wie it bekend as Novaja Pokrovka (Новая Покровка); de lettere namme Liski ferwiist nei it rivierke de Liska.

Mei de bou fan in stasjon oan it û.o. nei Voronezj en Rostov oan de Don rinnende spoar fan it Súdeasttrajekt krige it plak wat mear ekonomyske betsjutting. Yn 1928 waard it nije rayon Liski foarme, dêr't Liski it bestjoerlike sintrum fan is. Liski krige yn 1937 stedsrjochten.

Sawol yn de Russyske Boargerkriich as ek yn de Twadde Wrâldkriich waard der fochten by Liski. Yn de Twadde Wrâldkriich lei yn july 1942 oan de oare kant fan de Don by Liski in ienheid fan de Wehrmacht stasjonearre. Nei de kriich krige Liski yndustry en spile de stêd in jimmeroan gruttere rol as agrarysk sintrum.

Liski hiet yn de Sovjet-tiid fan 1928 oant 1943 Liski Svoboda (Свобода, letterlik "frijheid") en tusken 1965 en 1991 Georgiû-Dezj (Георгиу-Деж; nei de Roemeenske politikus Gheorghe Gheorghiu-Dej).

Befolkingsûntwikkeling

Demografyske ûntwikkeling fan Kaljazin fan 1897 oant 2018
Jier	1939	1959	1970	1979	1989	2002	2010	2018
befolking	25.490	37.638	48.682	52.375	54.039	55.893	55.864	53.897

Bekende persoanen

• Ivan Anikejev (1933–1992), Sovjet-Russyske romtefarder

Boarnen, noaten en referinsjes

Boarnen, noaten en/as referinsjes:

Dizze side is alhiel of foar in part in oersetting fan de Dútsktalige Wikipedyside; sjoch foar de bewurkingsskiednis: de:Liski Commons Wikimedia Commons  Ofbylden dy't by dit ûnderwerp hearre, binne te finen yn de kategory Liski fan Wikimedia Commons.