Medal of Honor
De Medal of Honor (Amerikaansk-Ingelsk foar "Earemedalje"), of ek wol de Congressional Medal of Honor ("Earemedalje fan it Kongres") is de heechste Amerikaanske militêre ûnderskieding. Dizze medalje wurdt út namme fan it Amerikaanske Kongres troch de presidint fan de Feriene Steaten takend oan Amerikaansk militêr personeel foar moed op it slachfjild dy't de militêre plicht te boppe giet. Der besteane trije farianten fan 'e ûnderskieding, ien foar de lânmacht, ien foar de marine en ien foar de loftmacht. Mariniers en leden fan 'e kustwacht komme yn oanmerking foar de marinefariant.
| Medal of Honor | ||
| ||
| De lânmacht-, marine- en loftmachtfarianten fan 'e Medal of Honor | ||
| algemiene ynformaasje | ||
| nasjonaliteit |  Amerikaansk
| |
| útrikt foar | moed op it slachfjild dy't de militêre plicht te boppe giet | |
| útrikt troch | de presidint fan de Feriene Steaten út namme fan it Am. Kongres | |
| frekwinsje | ûngeregeld | |
| datum | ûngeregeld | |
| plak | meastal Washington, D.C. | |
| ynsteld | 1861 (marinefariant) 1862 (lânmachtfariant) 1965 (loftmachtfariant) | |
| 1e útrikking | 25 maart 1863 | |
| offisjele webside | ||
| www.cmohs.org | ||
Skiednis
bewurkje seksjeDe skiednis fan 'e Medal of Honor giet tebek oant 21 desimber 1861, doe't oan it begjin fan 'e Amerikaanske Boargeroarloch de marinefariant ynsteld waard ûnder de namme 'Medal of Valor' ("Dapperensmedalje"). De lânmachtfariant waard in healjier letter, op 12 juny 1862, ynsteld ûnder de namme 'Medal of Honor'. Yn 1863 waarden dizze ûnderskiedings troch it Amerikaanske Kongres permanint makke, en yn 1915 waard de aparte namme foar de marinefariant ôfskaft, sadat beide farianten 'Medal of Honor' kamen te hjitten. Yn 1963 waard in aparte fariant foar de kustwacht ûntwurpen, mar nea ynfierd. Yn 1965 waard der al in aparte fariant foar de loftmacht ynsteld; foartiid ûntfongen leden fan 'e Amerikaanske Loftmacht dy't ûnderskaat waarden, de lânmachtfariant.
Op 29 febrewaris 2016 wiene der yn totaal 3.514 Medals of Honor útrikt, wêrfan 621 postúm, oan 3.495 ûnderskate persoanen. Dat betsjut dat 19 Amerikaanske militêren twa kear de Medal of Honor takend krigen hawwe; fan dy njoggentjin is Tom Custer, de jongere broer fan 'e ferneamde generaal George Armstrong Custer, it bekendst. Justjes mear as de helte fan 'e takende Medals of Honor, 1.523, binne ûnder de Amerikaanske Boargeroarloch (1861-1865) útrikt. Op it twadde plak komt de Twadde Wrâldoarloch (1941-1945) mei 471 útrikte Medals of Honor en dêrnei de Yndiaanske oarloggen (1863-1890) mei 426 en de Fjetnamoarloch (1955-1975) mei 257.
Utrikking
bewurkje seksjeOrnaris wurdt de Medal of Honor útrikt troch de Amerikaanske presidint sels by in formele seremoanje yn it Wite Hûs te Washington, D.C. By postume takennings ûntfange de djipdrôven de ûnderskieding út 'e hannen fan 'e presidint. Fanwegen it prestiizje en de hege status fan 'e Medal of Honor genietet dizze ûnderskieding spesjale beskerming ûnder de Amerikaanske wet; ûnautorisearre dracht, ferkeap en produksje fan 'e ûnderskieding, ynklusyf it lintsje, is ferbean en wurdt strang tsjin optreden. Nei de Medal of Honor is de twad heechste Amerikaanske militêre ûnderskieding it Distinguished Service Cross foar de lânmacht, it Navy Cross foar de marine en mariniers, it Air Force Cross foar de loftmacht en it Coast Guard Cross foar de kustwacht.
Keppelings om utens
bewurkje seksje| Boarnen, noaten en/as referinsjes: | ||
|
Foar boarnen en oare literatuer, sjoch ûnder: References, op dizze side.
|
