Oldfield Thomas

Oldfield Thomas (folút: Michael Rogers Oldfield Thomas; Millbrook (Bedfordshire), 21 febrewaris 1858 – Londen, 16 juny 1929) wie in Britsk soölooch, dy't syn hiele wurksume libben yn 'e tsjinst stie fan it Natoerhistoarysk Museum yn Londen. Hy moat net betize wurde mei de Britske politikus en skiedkundige Thomas Oldfield.

Oldfield Thomas
persoanlike bysûnderheden
echte namme	Michael Rogers Oldfield Thomas
nasjonaliteit	Britsk
berne	21 febrewaris 1858
berteplak	Millbrook (Bedfordshire) (Ingelân)
stoarn	16 juny 1929
stjerplak	Londen (Ingelân)
etnisiteit	Ingelsk
wurkpaad
berop/amt	biolooch
aktyf as	soölooch, publisist
jierren aktyf	1876 – 1929

Libben en karriêre

Jonkheid

Thomas waard yn 1858 berne yn it Ingelske doarp Millbrook, yn it greefskip Bedfordshire (net te betiizjen mei Millbrook yn Cornwall). Hy wurke foar it Natoerhistoarysk Museum yn 'e Britske haadstêd Londen, dêr't er yn 1876 mei achttjin jier oansteld waard yn in siktariële funksje. Twa jier letter, yn 1878, waard er oerpleatst nei de Soölogyske Ofdieling.

Karriêre

Yn 1891 troude Thomas mei Mary Kane, de dochter fan 'e Skotske medikus en patolooch sir Andrew Clark, en de erfgenamte fan in lyts fortún. Dat joech him de finansjele middels om op eigen kosten jagers yn te hieren dy't it museum foarseagen fan toaneksimplaren fan nije sûchdieren. Thomas ferrjochte sels ek fjildwurk yn West-Jeropa en Súd-Amearika, en syn frou, dy't syn belangstelling foar biology en natoerhistoarje dielde, beselskippe him op al syn reizen. Thomas skreau fierders ek ferskate artikels oer soölogyske ûnderwerpen foar de edysje fan 1911 fan 'e Encyclopædia Britannica.

Doe't William Henry Flower yn 1896 oansteld waard as haad fan 'e Soölogyske Ofdieling, naam dy Richard Lydekker oan om 'e tentoanstellingsaktiviteiten te bewurkmasterjen, sadat Thomas him fan dy tiid ôf folslein konsintrearje koe op it sammeljen, preparearjen en beskriuwen fan nije eksimplaren. Yn namme gie Thomas yn 1923 mei pinsjoen, mar yn it echt wurke er sûnder ûnderbrekking troch oant syn dea.

Ferstjerren

Likernôch in jier nei't yn 1928 syn frou ferstoarn wie, in swiere klap dy't er nea te boppen kaam, die Thomas himsels op 16 juny 1929 yn 'e âlderdom fan 71 jier oan syn buro yn it museum tekoart troch him mei in revolver troch de holle te sjitten.

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Michael Rogers Oldfield Thomas fan Wikimedia Commons.