Wetterhintsje

It wetterhintsje (Rallus aquaticus) is in fûgel út de famylje fan 'e ralfûgels (Rallidae).

wetterhintsje
taksonomy
ryk dieren (Animalia) stamme rêchstringdieren (Chordata) klasse fûgels (Aves) skift kraanfûgeleftigen (Gruiformes) famylje ralfûgels (Rallidae) skaai wetterrallen (Rallus)
soarte
Rallus aquaticus
Linnaeus, 1758
IUCN-status: net bedrige
ferspriedingsgebiet
simmergast      stânfûgel      wintergast      mooglik útstoarn

Beskriuwing

It wetterhintsje wurdt likernôch 22 oant 28 sm lang. De fearren besteane út in kastanjebrune boppeside mei swarte strepen en in blaugrize ûnderkant mei streepte flanken en in wite ûndersturt. De fûgel hat in lange, tinne reade snaffel, reade eagen en rôzebrune poaten.

Iten

De fûgel is net sinnich mei iten en yt wat er yn 'e dridze fynt: wjirmkes, ynsekten, tongerkopkes en woartels fan planten, mar ek wol lytse fiskjes, kikkerts en lytse skaaldieren.

Aaikes

Aaikes fan it wetterhintsje

It wetterhintsje leit fiif oant tolve brutsen wite oant ljocht gielbrune aaikes mei readbrune plakjes, dy't yn in reiten nêst lein wurde.

Biotoop

Wetterhintsjes komme hast oeral yn Europa foar, mar net yn it Hege Noarden. Yn Fryslân is it wetterhintsje fral te finen yn it suden en it easten fan 'e provinsje, mar op 'e klaai komme se net foar. Hja libje yn reidsompen en binne dreech te sjen. Foar wetterhintsjes moatte de reitfjilden net te bot trochsjitte mei begroeiing en wetterhintsjes ferdwine ek as it lân droeger wurdt. De jonge sompen yn 'e Lauwersmarkrite binne bygelyks in goed hinnekommen foar in groeiend tal wetterhintsjes.

In oantal fan ús wetterhintsjes oerwinteret yn Ingelân en Frankryk, wylst de bliuwende fûgels dan mei wetterhintsjes út kâldere dielen fan Europa oanfolle wurde. Winterdeis binne wetterhintsjes minder bûn oan 'e reitlannen en komme se ek by kanalen en fearten foar. De measte wetterhintsjes binne dan yn 'e westlike provinsjes tichteby de kust te finen. Yn Fryslân is de Lauwersmar winterdeis in plak mei in soad wetterhintsjes.

Undersoarten

Der wurde trije ûndersoarten ûnderskieden:

• R. a. hibernans: Yslân.
• R. a. aquaticus: Europa, noardlik Afrika en westelik Aazje.
• R. a. korejewi: fan 'e Aralmar en Iran oant noardwestlik Sina en Kasjmir.

Boarnen, noaten en referinsjes

Boarnen, noaten en/as referinsjes:

Fûgelbeskerming Nederlân Commons Wikimedia Commons  Ofbylden dy't by dit ûnderwerp hearre, binne te finen yn de kategory Rallus aquaticus fan Wikimedia Commons.