Annemieke Verdoorn

Annemieke Verdoorn (folút: Annemieke Margo Verdoorn; Rotterdam, 8 augustus 1961) is in Nederlânsk aktrise dy't by it grutte publyk bekendheid krige mei har rol as suster Ingrid yn 'e sikehûssearje Medisch Centrum West, en letter as Joyce Couwenberg yn 'e soapsearje Onderweg naar Morgen.

Annemieke Verdoorn
akteur
Annemieke Verdoorn yn 1998 yn it programma Denktank.
persoanlike bysûnderheden
echte namme	Annemieke Margo Verdoorn
nasjonaliteit	Nederlânsk
berne	8 augustus 1961
berteplak	Rotterdam (Súd-Hollân)
etnisiteit	Nederlânsk
jierren aktyf	1981 – 2008
offisjele webside
Annemieke Verdoorn yn 'e IMDb

Libben en karriêre

Karriêre

Verdoorn waard yn 1961 berne yn Rotterdam. Fan 1981 ôf wie se aktyf as aktrise, wêrby't se yn 't earstoan benammen rollen hie yn toanielstikken en musicals. Se ferfolle byrollen yn films as Les Branchés à Saint-Tropez, út 1983, en de Grijpstra en De Gier-plysjefilm De Ratelrat, út 1987 (as seksy motoraginte). Yn 1985 naam Verdoorn ûnder de skûlnamme Margo mei fiif oare artysten (wêrûnder Ireen Sheer, Malcolm Roberts en Chris Roberts) foar Lúksemboarch diel oan it Eurofyzjesongfestival. Harren ferske Children, Kinder, Enfants einige op it trettjinde plak.

Yn 1988 briek Verdoorn troch mei har rol as de ferpleechkundige Ingrid van der Linden yn 'e sikehûssearje Medisch Centrum West, dy't tige súksesfol wie. De searje rûn seis seizoenen en wie oant 1994 by de TROS op 'e tillefyzje te sjen. Nei Medisch Centrum West krige Verdoorn yn 1996 har oare grutte rol, nammentlik dy fan abbekate en direktrise Joyce Couwenberg, yn 'e soapsearje Onderweg naar Morgen. Hja naam dy rol oer fan Marjolein Keuning, dy't him de twa foargeande seizoenen spile hie. Yn 2008 beëinige Verdoorn nei tolve jier har dielname oan Onderweg naar Morgen, mei as gefolch dat Joyce Couwenberg út 'e searje skreaun waard.

Priveelibben

Verdoorn troude yn 1993 mei Robert Wilson. Mei him krige se op 1 novimber 2001 in soan, dy't James hjit. Nei't se yn 2008 stoppe wie mei har rol yn Onderweg naar Morgen emigrearre Verdoorn mei man en soan nei Austraalje, dêr't se sûnt dy tiid yn Sydney wennet.

Filmografy

Filmografy as aktrise
jier	titel	rol of funksje	opmerkings
films
1981	Belles, blondes et bronzées	miss
1983	Les Branchés à Saint-Tropez	Ingeu
1984	Gwendoline	ûnbekend	net fermelden op 'e ôftiteling
1984	Vivre pour survivre	assistinte fan plastysk sjirurch
1987	De Ratelrat	Hylkje Hilarides
tillefyzje
1988–1994	Medisch Centrum West	Ingrid van der Linden	fêste rol; 100 ôfl.
2002	Toen Was Geluk Heel Gewoon	Saskia	gastrol; ôfl. Mist
1996–2008	Onderweg naar Morgen	Joyce Couwenberg	fêste rol; 398 ôfl.

Keppelings om utens

• (in) Biografy en filmografy fan Annemieke Verdoorn yn de Internet Movie Database (IMDb)

Boarnen, noaten en referinsjes

Boarnen, noaten en/as referinsjes:

Biografy en filmografy fan Annemieke Verdoorn yn de Internet Movie Database (IMDb)