Byrol
In byrol is de rol fan in personaazje dat in beheinde bydrage leveret oan 'e plot yn in wurk fan fiksje, lykas in mearke, koart ferhaal, stripferhaal, novelle, roman, toanielstik, musical, opera, operette, film, tekenfilm, tillefyzjesearje, fideospultsje of kompjûterspultsje. Sels beskate gedichten en reklamespotsjes kinne in byrollen omfetsje. It tsjinstelde fan in byrol is in haadrol, wêrmei't ferwiisd wurdt nei de rol fan it wichtichste personaazje of ien fan 'e wichtichste personaazjes. Spesjale soarten byrollen binne de gastrol (in optreden yn in tillefyzjesearje foar ien kear), de weromkearende rol (in optreden yn in tillefyzjesearje foar mear as ien kear) en de kameorol (in tige lytse roltsje, meast yn films, dat lykwols fertolke wurdt troch in ferneamd akteur of aktrise).
As it poer om it personaazje giet, wurdt ek wol sprutsen fan in bypersonaazje of in byfiguer. Der binne grutte en lytse byrollen. Dy binne allegear wol deeglik fan belang foar it ferhaal, mei't se de haadrol op ûnmisbere wize ûnderstypje. Dat yn tsjinstelling ta figuranten, dy't poer eftergrûnfolling binne en foar it eigentlike ferhaal dat ferteld wurdt net echt ta de saak dogge. De bêste fertolkings fan byrollen wurde by in protte prizen op it mêd fan toaniel, film en tillefyzje bekroane mei oerwinnings yn 'e kategoryen 'bêste byrol fan in akteur' of 'bêste byrol fan in aktrise'. Dat is bygelyks sa by de Oscars, Emmys, Tonys, BAFTA's, ensfh.
Sjoch ek
bewurkje seksje| Boarnen, noaten en/as referinsjes: |
|
Foar boarnen en oare literatuer, sjoch ûnder: References, op dizze side. |