Earehôf Bakhuzen

Earehôf Bakhuzen is in ûnderdiel fan it roomsk-katolike begraafplak fan Bakhuzen yn de provinsje Fryslân. De grêven lizze by de yngong fan it begraafplak, njonken de roomsk-katolike Sint Odulfustsjerke, oan de Sint Odulfusstrjitte. Der steane 9 stiennen mei dêrop de folgjende nammen:

Namme	Funksje	Underdiel	Skwadron	Ferstoarn	Alderdom
Charles Ablett	Boardskutter	Royal Air Force Volunteer Reserve	61e Squadron	03-01-1944	19
John Stanley Baldwin	Bommerjochter	Royal Canadian Air Force	61e (RAF) Squadron	03-01-1944	20
John Vincent Conlon	Sersjant	Royal Australian Air Force	460e Squadron	23-01-1943	23
Charles Gordon Crosby	Boardskutter	Royal Air Force Volunteer Reserve	61e squadron	03-01-1944	35
Gordon Edward Heasman	Boardwurktúchkundige	Royal Air Force Volunteer Reserve	61e Squadron	03-01-1944	33
Joseph Gerald Holden	Navigator	Royal Air Force Volunteer Reserve	61e Squadron	03-01-1944	20
Stuartson Charles Methven	Piloat	Royal Australian Air Force	460e Squadron	23-01-1943	30
James Stock	Radio-telegrafist	Royal Air Force Volunteer Reserve	61e Squadron	03-01-1944	22
George Arthur Tull	Piloat	Royal Air Force Volunteer Reserve	61e Squadron	03-01-1944	22

Skiednis

Op 23 jannewaris 1943 wie in Lancasterbommewerper, de W 4308 fan it 460e Squadron, ûnderweis op in missy nei Düsseldorf. Doe 't it fleantúch by de Nederlânske kust kaam, waard de bommewerper oanfallen troch in nachtjager. Om 20.54 oere stoarte it fleantúch del yn in iepen stik lân by Warns. Twa bemanningsleden rekken deadlik ferwûne en waarden beïerdige op it roomsk-katolike begraafplak fan Bakhuzen. De oare bemanningsleden waarden kriichsfinzen makke. Sersjant R.A. Brown waard ferwûne ôffierd nei it sikehûs yn Ljouwert.

Op 3 jannewaris 1944 wie in Lancasterbommewerper, de DV 401 fan it 61e Squadron, ûnderweis op in missy nei Berlyn doe 't dy boppe de Iselmar oanfallen waard troch in Dútske nachtjager. It swier skansearre en baarnende tastel stoarte del ûnder Murns. Alle sân bemanningsleden kamen dêrby om it libben. Sy waarden beïerdige op it roomsk-katolike begraafplak fan Bakhuzen.

Boarnen, noaten en referinsjes

Boarnen, noaten en/as referinsjes:

Verliesregister van de studiegroep Luchtoorlog 1939-1945
Gerrit J. Zwanenburg, En nooit was het stil..., [De Haach]: Koninklijke Luchtmacht/Bureau Drukwerkvoorziening Korps Luchtmachtstaf
Commonwealth War Graves Commission
Database fan ferlern giene bommewerpers WOII

Wikimedia Commons

Ofbylden dy't by dit ûnderwerp hearre, binne te finen yn de kategory Earehôf Bakhuzen fan Wikimedia Commons.