Laurentius- en Ignatiuskatedraal (Rotterdam)

De HH. Laurentius- en Ignatiuskatedraal oan 'e Westzeedijk yn Rotterdam wie in neogoatyske katedraal fan it bisdom Rotterdam. De katedraal waard yn 1967 foar de earetsjinst sletten en rillegau dêrnei ôfbrusten.

Laurentius- en Ignatiuskatedraal
Lokaasje
provinsje	Súd-Hollân
plak	Rotterdam
adres	Westzeedijk 90
koördinaten	51° 54' N 4° 28' E
Tsjerklike gegevens
tsjerkegenoatskip	Roomsk-Katolike Tsjerke
bisdom	Rotterdam
patroanhillige	Ignatius fan Loyola Laurentius fan Rome
Arsjitektuer
arsjitekt	Nicolaas Molenaar
boujier	1890-1892
sloopjier	1968
boustyl	Neogotyk
Kaart

Skiednis

De oarspronklik allinne oan Sint-Ignatius wijde tsjerke waard tusken 1890 en 1892 neffens in ûntwerp fan Nicolaas Molenaar (1850-1930), in learling fan Pierre Cuypers, boud as in trijeskippige krúsbasilyk mei twa transepten en in koer mei omgong. Njonken de foargevel stie in toer dy't bekroand waard mei hoekpinakels en in smelle achtside spits.

Ynterieur

De troch paters jezuïten behearde tsjerke tsjinne as de parochytsjerke foar it Scheepvaartkwartier en it súdlike stedssintrum. De tsjerke oerlibbe it bombardemint fan 1940 op de stêd en krige by de oprjochting fan it bisdom Rotterdam yn 1956 sels de status fan katedraal. Yn it ramt dêrfan waard ek de patroanhillige fan 'e stêd, Sint-Laurentius tafoege as patroanhillige fan de katedraal.

Yn 'e jierren 1960 hie de parochy te meitsjen mei de ûntfolking fan de binnenstêd. In restauraasje fan 'e tsjerke, werfan de foargevel al in skoft yn 'e steigers stie, soe in miljoen gûne kostje moatte. Dêrom naam de doedestiidske biskop it beslút de tsjerke op 1 oktober 1967 te sluten. As katedraal foar it bisdom Rotterdam tsjinne dêrnei de Elisabettsjerke oan 'e Mathenesserlaan, wylst de Kapel fan it Alderhillichst Sakramint sûnt as de parochytsjerke tsjinnet.

Op de nei de ôfbraak frijkommen grûn waard in kantoarekompleks boud, dat yn 2018 ferboud waard ta in grutskalich appartemintekompleks foar senioaren.

It oargel fan 'e katedraal, dat yn 1863 boud waard troch de firma Loret & Vermeersch, ferhûze nei de Sint-Augustinuskerk yn Geleen. It oerwurk fan 'e tsjerke kaam yn de Hillich Herttsjerke fan Skiedam telâne en in byld fan Marije fan 'e Wynhaven krige in plak yn de Kapel fan it Alderhillichst Sakramint (de tsjintwurdige Iendrachtskapel).

In lytse twa jier letter soe ek de grifformearde Nije Sudertsjerke foar de katedraal oer sloopt wurde.

Boarnen, noaten en referinsjes

Boarnen, noaten en/as referinsjes:

Reliwiki, oproppen 9 desimber 2020 Side Eendrachtskapel, oproppen 9 desimber 2020 Commons Wikimedia Commons  Ofbylden dy't by dit ûnderwerp hearre, binne te finen yn de kategory Nije Sudertsjerke, Rotterdam fan Wikimedia Commons.