Liboarius fan Le Mans

Liboarius fan Le Mans (berne ûnbekend - ferstoarn yn it jier 397) is in roomsk hillige.

Liboarius fan Le Mans
hillige
persoanlike bysûnderheden
bertedatum	ûnbekend
berteplak	ûnbekend
stjerdatum	† 397 (of 390)
stjerplak	Le Mans
wurkpaad
funksjes	biskop
hillichferklearring
hjeldei	23 july
hillichdom	Dom fan Paderborn
attributen	iepen boek, pau, stientsjes

Libben

Oer de histoaryske figuer fan Liboarius is net in soad bekend. Oer syn bertedatum bestiet net in soad dúdlikens. Neffens midsiuwske beskriuwings soe er 47 jier biskop yn 'e Gallo-Romeinske civitas Le Mans west ha. It gebiet dêr't biskop Liboarius wurke wie al in skoft kristlik, mar heidenske druïden wiene noch aktyf yn 'e krite en koene mei harren riten de minsken beynfloedzje. Under biskop Liboarius waarden in soad tsjerken boud en mei troch in goede opliediing koene preesters yn syn gebiet de druïden oerwinne.

Ek soe Liboarius in maat west ha fan Martinus fan Tours, syn buorman yn funksje. Neffens in leginde soe Liboarius yn 397 yn 'e earmen fan Sinte-Marten stoarn wêze.

Reliken

Yn 'e tiid fan keizer Loadewyk de Fromme ferhûzen de bonken fan ferskillende hilligen fan it westlike nei it eastlike diel fan Loadewyk's ryk en dêrûnder wiene ek de bonken fan Liboarius, dy't yn Le Mans al ier as hillige fereare waard. In ûnbekende Paderborner, nei alle gedachten in geastlike fan it domkapittel, skreau oan 'e ein fan 'e 9e iuw oer de translaasje fan 'e "Europeeske brêgebouwer" Liboarius yn Paderborn. It translaasjeberocht fan 'e Paderborner biskop Biso (887-909) ferhellet hoe't in groep Paderborner geastliken nei Le Mans reizgen en fan 'e biskop dêre reliken krige (de lofter earm fan Liboarius bleau yn Le Mans en is yn 'e rin fan 'e tiid ferlern gien). De reliken waarden oer Chartres en Parys oer de Ryn nei Saksen brocht en kamen op 28 maaie 836 ûnder grutte belangstelling fan 'e befolking op pinkstersnein yn Paderborn oan. De biskop dêre, Badurad (815-862) liet se yn 'e domtsjerke fan 'e stêd bewarje.

De Liboariusskryn yn 'e Paderborner dom.

Yn 'e iuwen dêrnei ûnstie in grutte ferearing fan Liboarius yn Westfalen, wêrfan't Paderborn it sintrum wie. Sûnt de 11e iuw wiene it Beierske kleaster Tegernsee en Quedlinburg ek sintra fan ferearing. De Nederlannen, Nedersaksen, Tueringen en de Nederryn folgen sûnt de 12e iuw.

Liboarius waard yn 'e lette midsiuwen oanroppen by krupsjes oan 'e yngewanten, û.o. by nierstiennen. De aartsbiskop Werner von Eppstein († 1284) fan Mainz soe nei it bidden by syn grêf fan syn nierstiennen ôfholpen wêze.

De reformaasje en kontrareformaasje brochten ek yn 'e Roomsk-Katolike Tsjerke en it katolike Paderborn feroaringen yn 'e rjochting fan in wat dimmener hilligenferearing, fral wat de Liboariusferearing oanbelanget.

Mei de relikentranslaasje fan Le Mans nei Paderborn ûntstie de âldste freonskiplike stêdebân fan 'e wrâld. Hjoed-de-dei wurdt ta neitins fan 'e translaasje yn Paderborn it Fest Libori organisearre. De skryn mei de reliken fan Liboarius wurdt dan oer it domplein troch de binnenstêd droegen.

Attributen

Liboarius wurdt as biskop útbylde mei in iepen boek en in pau. Faak lizze op 'e iepen boek stientsjes.

Feestdei

De dei dat Liboarius betocht wurdt is 23 july.

Nederlân

Yn Nederlân stiet mar ien oan Sint-Liboarius wijde tsjerke en dat is de sûnt de reformaasje protestantske tsjerke fan Dinxperlo.

Boarnen, noaten en referinsjes

Boarnen, noaten en/as referinsjes:

Dizze side is alhiel of foar in part in oersetting fan de Dútsktalige Wikipedyside; sjoch foar de bewurkingsskiednis: de:Saint Liborius Commons Wikimedia Commons  Ofbylden dy't by dit ûnderwerp hearre, binne te finen yn de kategory Saint Liborius fan Wikimedia Commons.