Liudgertsjerke (Oldehove)

De Liudgertsjerke is in tsjerkegebou yn it Grinslânske Oldehove. De oarspronklik oan de apostel Liudger wijde tsjerke is in romanogotyks bouwurk út de 13e iuw. De tsjerke is ien fan de trije tsjerken dy't brûkt wurde troch de protestantske gemeente Oldehove-Niehove en waard yn 2013 oerdroegen oan de Stichting Alde Grinslânske Tsjerken. Sûnt de fúzje fan de herfoarme en grifformearde gemeente fan Oldehove yn 2009 wurdt de tsjerke mar út en troch brûkt.

Liudgertsjerke Liudgerkerk
bouwurk
lokaasje
lân	Nederlân
provinsje	Grinslân
gemeente	Westerkertier
plak	Oldehove
adres	Kerkpad 2
bysûnderheden
type bouwurk	Tsjerke
boujier	13e iuw
monumintale status	ryksmonumint
monumintnûmer	31395
offisjele webside
PKN Oldehove-Niehove

Stiftingsleginde

Neffens de leginde rekken trije nonnen fan it Ljouwerter kleaster fan Oldehove by tige min waar by Humerke (de âlde namme fan Oldehove) yn 'e swierrichheden. Hja waarden holpen troch fiskers dy't by it Rûgesân fisken en út tankberens foar dy rêding lieten de nonnen in tsjerke yn Humerke bouwe. Fan doe ôf oan waard it plak ferneamd nei it Ljouwerter kleaster Oldehove.

Beskriuwing

De yngong fan 'e tsjerke yn 2008

De tsjerke is in ienskippich gebou út de 13e iuw en hie oarspronklik in stiennen ferwulft, dat yn de 17e iuw ferfongen waard troch it hjoeddeiske houten tonferwulft. De noardlike bûtenmuorre fan de tsjerke is foar it grutste part noch oarspronklik, yn de súdlike muorre trije goatyske finsters ynbrocht. De sealtektoer waard yn de 15e iuw tafoege. Yn 1664 fûn in ferbouwing plak, wêrby't ôfbraakmaterjaal fan it Bernardus-kleaster fan Aduard brûkt waard. Ut dy tiid datearret ek it súdlike tagongsportaal.

Ynterieur

De preekstoel en hearebanken binne 17e-iuwsk. Under it rjochthoekich sletten koer binne twa grêfkelders dy't by in restauraasje yn 1969 ûntdutsen binne. Yn ien fan de kelders stiet de sânstiennen sarkofaach fan de katolike Weenske grevinne Margaretha von Cobentzel, de frou fan Ludovicus Ludgerus, baron fan Ripperda. Foar Douwe en Aedsge Martens Teenstra, dy't oan de ein fan de 18e iuw it Rûgesân ynpolderen, is in betinkingsstien yn de tsjerke oanbrocht.

Yn 'e toer hinget in yn 1617 getten klok fan Hans Nortmeijer mei in diameter fan 89 sintimeter.

Oargel

It oargel is in meganysk ynstrumint dat yn 1903 troch in legaat fan P. Raven troch de firma Van Oeckelen boud wurde koe. It is yn 1971 restaurearre troch de firma Mense Ruiter. It oargel is útsein de lettere tafoege wynmotor folslein orizjineel.

Boarnen, noaten en referinsjes

Boarnen, noaten en/as referinsjes:

Side Liudgertsjerke De tsjerke op de side fan de Stifting Alde Grinslânske Tsjerken Disposysje oargel Liudgertsjerke Commons  Ofbylden dy't by dit ûnderwerp hearre, binne te finen yn de kategory Liudgertsjerke, Oldehove fan Wikimedia Commons.