Motor

In motor (Latyn foar "beweger") is in masine dy't ûntwurpen is om ien of mear foarmen fan enerzjy om te setten yn bewegingsenerzjy. Almeast wurdt dêrfoar gebrûk makke fan in rûntsjedraaiende beweging, mar lineêre bewegings binne ek mooglik. Fan in masine mei in motor wurdt sein dat dy motorisearre is.

In animaasje dy't de fjouwer stadia werjout fan in troch benzine oandreaune ynterne ferbrâningssyklus fan in fjouwertaktmotor mei in elektryske ûntstekkingsboarne:
  1. Ynduksje (brânstof komt binnen)
  2. Kompresje (brânstof wurdt gear-
      drukt)
  3 Untstekking (brânstof wurdt ferbrând)
  4 Emisje (útlaatgassen wurde ôffierd)

Utfining

De foarrinner fan 'e motor wie de steammasine dy't yn 1764 troch de Ingelsman James Watt ûntwikkele waard. De earste echte motor waard yn 1804 yn Frankryk test troch Isaac de Rivaz. Der folge in lange, stadige ûntwikkeling oant Etienne Lenoir yn 1860 de ferbrâningsmotor útfûn.

Tapassing

In motor is faak bedoeld foar de oandriuwing fan in masine. Dêrby kin it gean om in motorfiertúch, mar ek om in masine foar hysjen/optillen, boarjen, seagjen, skroevjen, skuorjen, poetsen, waskjen, pompen, sûgen, graven of it byhâlden en oanjaan fan 'e tiid.

Yndieling

Der wurdt ûnderskie makke tusken ferskillende soarten motors oan 'e hân fan 'e foarm fan enerzjy dêr't se op wurkje. Sa is der:

• de elektryske motor (rint op elektrisiteit)
• de waarmtemotor (basearre op 'e termodynamika, wêrby't it 'rinnen' fan 'e motor feroarsake wurdt troch ferskillen yn temperatuer; de temperatuerferskillen kinne sawol útwindich wêze, lykas by de stirlingmotor, as ynwindich feroarsake wurde, lykas by de ferbrâningsmotor, dy't by de ferbrâning gemyske enerzjy omset nei bewegingsenerzjy)
• de steammasine (is neffens de algemiene definysje ek in motor, mar wurdt sa net neamd, wierskynlik om't it wurd "motor" pas ynfierd waard doe't de steammasine al bestie)

Foarbylden fan motors

• benzinemotor
• diselmotor
• elektromotor
• fearmotor
• fjouwertaktmotor
• gasturbine
• hydromotor
• ynjeksjemotor
• ioanemotor
• mingselmotor
• parsluchtmotor
• petroaleummotor
• raketmotor
  • fêstebrânstofmotor
  • floeiberebrânstofmotor
• rotaasjemotor
• strielmotor
• twataktmotor
• V-motor
• wankelmotor

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Engines fan Wikimedia Commons.