Ravengiersburg

Ravengiersburg is in Ortsgemeinde yn 'e Rhein-Hunsrück-Kreis op 'e Hunsrück yn 'e Dútske dielsteat Rynlân-Palts.

Ravengiersburg
Emblemen
Bestjoer
Lân	Dútslân
dielsteat	Rynlân-Palts
lânkring	Rhein-Hunsrück-Kreis
Sifers
Ynwennertal	333 (31.12.2022)
Oerflak	6,16 km²
Befolkingsticht.	54 ynw./km²
Hichte	340 meter boppe seenivo
Oar
Postkoade	55471
Koördinaten	49° 56' N 7° 28' E
Offisjele webside
www.ravengiersburg.info
Kaart

It plak leit yn 'e ferbânsgemeente Simmern-Rheinböllen.

Lokaasje

Ravengiersburg leit yn 'e delling fan 'e Simmerbach sintraal op 'e Hunsrück. It doarp is om de kleastertjerke boud. By it plak Ravengiersburg heart ek it súd fan Ravengiersburg lizzende plakje Neuhof. West fan Ravengiersburg mûnet de Kauerbach yn 'e Simmerbach út. Fan it gemeentegebiet bestiet goed in tredde part út bosk.

Skiednis

It plak waard foar it earst yn it jier 974 neamd. De namme stamt fan 'e greve Rabangar, dy't dêr op in steile rots boppe de Simmerbach syn kastiel boude. De stifting fan in koarhearenstift giet op it jier 1074 werom; it kleaster waard op it plak fan it Salyske kastiel boud. Yn in dokumint wêryn't lân oan it kleaster skonken waard, wurdt foar it earst de 'Hundesrucha', de Hunsrück, neamd.

Sint-Kristoffeltsjerke

It kleaster en it plak kamen yn 1410 yn it doe nije hartochdom Palts-Simmern te lizzen en ûntwikkele him ta de grutste grûnbesitter tusken de Mûzel en de Nahe, mar yn 1564 folge de opheffing yn it ramt fan 'e ynfiering fan 'e reformaasje yn it hartochdom. Ferskillende kearen waard besocht it kleaster nij libben yn te blazen, mar it mislearre hieltiten. Lang om let waard yn 1631 it kleaster troch Sweedske troepen yn 'e Tritichjierrige Kriich yn 'e brân stutsen. Sûnt 1673 wie Kar-Palts de lânshear.

De hjoeddeiske tsjerke waard tusken 1718 en 1722 ûnder karfoarst Karel II Filip fan 'e Palts stifte. Mei de besetting fan 'e lofter kant fan 'e Ryn troch Frânske troepen yn 1794 kaam it plak yn Frankryk te lizzen. Yn 1815 folge nei it Kongres fan Wenen de oerdracht oan it Keninkryk Prusen. Nei de Earste Wrâldkriich waard it gebiet op 'e nij troch Frânsen beset. Sûnt 1946 is Ravengiersburg ûnderdiel fan 'e dielsteat Rynlân-Palts.

It besjen wurdich

• It kleaster mei de katolike Sint-Kristoffeltsjerke en syn dûbele tuorren dominearret it doarp. De foarse tsjerke wurdt ek de Hunsrückdom neamd.
• De protestantske tsjerke is in neogoatysk tsjerkegebou út it begjin fan 'e 20e iuw.
• Oan 'e Hauptstraße 18 stiet in fakwurkhûs út de 18e iuw.

Ofbylden

• 
  Simmerbach.
• 
  Protestantske tsjerke.
• 
  Hauptstraße 18.

Boarnen, noaten en referinsjes

Boarnen, noaten en/as referinsjes:

Commons Wikimedia Commons  Ofbylden dy't by dit ûnderwerp hearre, binne te finen yn de kategory Ravengiersburg fan Wikimedia Commons.