Trije-ienheidskateraal (Verchotoerje)

De barokke Trije-ienheidskateraal (Russysk: Троицкий собор; Troitski Sobor) is in otterdokse katedraal yn Verchotoerje yn Ruslân. Sûnt 1960 is de tsjerke in monumint.

Trije-ienheidskateraal Троицкий собор
Lokaasje
lân	Ruslân
oblast	Sverdlovsk
plak	Verchotoerje
koördinaten	58° 51' N 60° 48' E
Arsjitektuer
boujier	1703-1712
boustyl	Narysjkin-barok
monumintale status	Kultureel monumint fan federaal belang
monumintnûmer	6610067004
Webside
Side fan de katedraal
Kaart

Skiednis

Muorredekoraasje.

Mei de bou fan 'e stiennen katedraal, dy't in âldere houten tsjerke út 1598 ferfange moast, waard yn 1703 yn opdracht fan tsaar Peter I útein set. De wijing fan it gebou fûn plak yn 1709, mar de foltôging duorre noch oant 1712. It is de âldste stiennen tsjerke fan 'e oblast Sverdlovsk.

De bolsjewiken lieten de katedraal yn 1932 slute foar de tsjinsten en stadichoan ferfoel de katedraal. Nei ynternasjonaal omtinken en it setten fan 'e tsjerke op 'e monumintelist folgen der repraasjes en yn 1991 nei de ûntbining fan 'e Sovjet-Uny waard de katedraal oan 'e Russysk-Otterdokse Tsjerke werom jûn.

Sûnt 1992 wurdt de tsjerke wer brûkt foar de earetsjinst.

Arsjitektuer

De katedraal is in geef foarbyld fan 'e Narysjkin-barok en stie foar in soad oare tsjerken yn 'e Oeral en Sibearje model. De tsjerke hat in fjouwerkant oerflak, dy't heger yn in achthoeke oergiet en bekroand is mei fiif koepels, en in fiifsidige apsis. De gevel is tige ryk fersierd en de motiven binne bysûnder wat de foarm oanbelanget. De hege toer hat in tintedak en in klokkestoel mei njoggen klokken.

Oars

Op ynternet wurdt in soad ornearre dat de tsjerke yn 1959 UNESCO wrâlderfgoed waard, itjinge net kloppet. De tsjerke stie yn dat jier op in ynternasjonale konferinsje yn De Haach yn 'e belangstelling en dêr komt it ferhaal wei dat de tsjerke op 'e list fan it wrâlderfgoed stiet. It opstellen fan in list fan kultureel en natuerlik erfgoed is lykwols sûnt de jierren 1970 pas fan krêft. Wol hat yn 1997 UNESCO-direkteur Federico Mayor Zaragoza it plak besocht en de mooglikheid bepraat om foar de katedraal de status fan wrâlderfgoed oan te freegjen, mar dêr is fierder neat fan telâne kommen.

Boarnen, noaten en referinsjes

Boarnen, noaten en/as referinsjes:

Dizze side is alhiel of foar in part in oersetting fan de Russysktalige Wikipedyside; sjoch foar de bewurkingsskiednis: ru:Троицкий собор (Верхотурье) Commons Wikimedia Commons  Ofbylden dy't by dit ûnderwerp hearre, binne te finen yn de kategory Trije-ienheidskateraal (Verchotoerje) fan Wikimedia Commons.