Tsjerke fan Den Andel

De Tsjerke fan Den Andel is in romanogoatyske tsjerke yn it Grinslânske Den Andel. Eigner fan 'e tsjerke is sûnt 2008 de Stifting Alde Grinslânske Tsjerken, mar it behear fan 'e tsjerke is tegearre mei de lokale protestanske gemeente.

Nikolaastsjerke
Lokaasje
provinsje	Grinslân
gemeente	It Hegelân
plak	Den Andel
adres	De Streekweg 91
koördinaten	53° 23' N 6° 30' E
Tsjerklike gegevens
tsjerkegenoatskip	PKN
patroanhillige	Nikolaas fan Myra
Arsjitektuer
boujier	13e iuw
monumintale status	ryksmonumint
monumintnûmer	8582
Webside
PKN Winsum-Halfambt
Kaart

Skiednis

Ynterieur

De oarspronklik oan Nikolaas fan Myra wijde tsjerke waard boud yn it earste fearn fan 'e 13e iuw. De frijsteande toer is letter boud en stamt út de 14e iuw. Yn 'e toer hinget in klok fan Jurjen Balthasar út Ljouwert, dy't yn 1653 getten waard. De tsjerke oerlibbe it platbaarnen fan it doarp troch Steatske troepen yn 1584 en de ferneatiging fan Den Andel troch de Krystfloed yn 1717.

Doe't de tsjerke yn 'e 17e iuw, nei de ynfiering fan de reformaasje, banken krige, binne de muorrepylders weikapt dy't it ferwulft droegen en waarden lûkbalken needsaaklik. Ek waarden de finsters fergrutte en dy fan 'e eastlike muorre tichtmitsele, dêr't de romte ornearre waard foar de preekstoel út 1792. Yn 'e tsjerke hinget in kroanluchter mei in dûbele earn. Oer de flier leit in sark út 1621, de oaren binne 18e-iuwsk.

Yn 1989 waard in fergunning oanfrege om it monumint ôf te brekken, itjinge wegere waard.

Restauraasje

Ynstee fan ôfbraak folge yn 'e jierren 1991 in restauraasje fan 'e tsjerke. By de restauraasje waarden de gevelpunten wer yn oarder makke. Yn 'e tsjerke waarden de lûkbalken ferwidere en ûnder de witerskalk kamen yn it stiennen ferwulft fresko's oan it ljocht. De bôgen tusken de ferwulftflakken binne yn bakstienstruktuer beskildere. Yn it tredde travee binne striidzjende ridders en bisten skildere. Oare traveeën hawwe bakstienstruktueren. De ribben fan it ferwulft binne skildere. Rjochts fan de kânsel is tsjintwurdich wer de sakramintsnis te sjen. De grutste operaasje fan 'e restauraasje wie it oanbringen fan in fûnemint fan in 45 sintimeter dikke flierplaat, dy't op 38 betonnen peallen rêst.

Oargel

It ienmanualige oargel mei njoggen registers en in oanhongen pedaal waard yn 1879 boud troch de firma Van Oeckelen.

Klokken

De grutste klok yn de toer waard troch Jurjen Balhtasar yn 1653 getten. De lytse klok yn de lanteare is in Van Bergen-klok út 1947.

Keppeling om utens

• Disposysje oargel

• Ofbylden
• 
  Oargel
• 
  Sakramintsnis
• 
  Striidzjende ridders
• 
  Beskildering bakstienstruktueren
• 
  Preekstoel

Boarnen, noaten en referinsjes

Boarnen, noaten en/as referinsjes:

Kerk Den Andel, oproppen 10.11.2020 Reliwiki, oproppen 12.11.2020 Commons Wikimedia Commons  Ofbylden dy't by dit ûnderwerp hearre, binne te finen yn de kategory Tsjerke fan Den Andel fan Wikimedia Commons.