Red Wing (Minnesota)

Red Wing (útspr.: [ɹɛd wɪŋ]) is in stêd yn it súdeasten fan 'e Amerikaanske steat Minnesota, dy't bekend stiet om syn histoaryske arsjitektuer en de pittoreske natoer yn 'e omkriten. It is it haadplak fan Goodhue County, en leit oan 'e igge fan 'e rivier de Mississippy.

Red Wing
In útsjoch op it sintrum fan Red Wing en de rivier de Mississippy.
Emblemen
Bestjoer
Lân	Feriene Steaten
Steat	Minnesota
County	Goodhue County
Sifers
Ynwennertal	16.459 (2010)
Oerflak	106,7 km² (ynkl. wetter) 89,6 km² (allinnich lân)
Befolkingsticht.	183,7/ km²
Hichte	226 m
Oar
Stifting	1853
Tiidsône	UTC -6
Simmertiid	UTC -5
Koördinaten	44°34′00″N 92°32′00″W
Offisjele webside
www.red-wing.org
Kaart
De lizzing fan Red Wing yn Goodhue County en yn 'e steat Minnesota.

Beskriuwing

De stêd is ferbûn mei de steat Wiskonsin, oare kant de rivier de Mississippy, troch de Red Wingbrêge, dy't offisjeel eins fan Eisenhowerbrêge hjit, en dêr't U.S. Route 63 oerhinne liedt. Neffens gegevens fan 'e folkstelling fan 2010 lei it ynwennertal fan Red Wing doe op krapoan 16.500 minsken. Ien fan 'e grutste toeristyske trekpleisters yn 'e wide omkriten is it Treasure Island Resort & Casino, in Yndiaansk kasino op it grûngebiet fan it Prairie Island Yndianereservaat.

Skiednis

Red Wing waard ferneamd nei in opperhaad fan 'e Sû (Sioux), dat ien út in lange rige lieders fan 'e pleatslike Mdewakanton-Dakota wie mei dyselde namme, fanwegen de readferve swannewjuk dy't se as teken fan harren autoriteit by formele gelegenheden by har hiene. Yn it Dakota wie syn namme Hupahuduta, wat eins "Readferve Wylde-Swannewjuk" betsjut, mar dat troch de Amerikanen yn 'e fertaling ferienfâldige waard. Hy wie yn 't earstoan in bûnsgenoat fan 'e Britten yn 'e Oarloch fan 1812, mar doe't er yn in fizioen sjoen hie dat de Amerikanen de kriich winne soene, loek er him werom yn neutraliteit. Neitiid stied er ûnder de Frânsk-Kanadezen bekend as L'Aile Rouge, en noch letter, nei't er syn liederskip oerdroegen hie oan in jongere opfolger, neamde er him Shakea, of "Man-Dy't-Himsels-Read-Fervet". Hy hie de namme in goede freon fan 'e Amerikanen te wêzen en aloan en mar wer te besykjen om 'e frede tusken de Yndianen en de blanke kolonisten te bewarjen.

It stedhûs fan Red Wing.

De delsetting Red Wing waard yn 1853 stifte, wêrby't de kolonisten foar in grut part mei steamboaten de Mississippy opfarren kamen. Yn 1857 krige it plak offisjeel de status fan stêd taparte. Red Wing lei yn in fruchtber lânbougebiet dêr't fral weet ferboud waard, en yn 1873 wie de stêd lieder fan hiel de Feriene Steaten oangeande de hoemannichte weet dy't produsearre waard. Nei't der in spoarferbining mei Minneapolis ta stân kommen wie, dêr't de weetmûnen stiene, ferlear de haven fan Red Wing foar in grut part syn wichtichheid.

Yn 1887 waard yn Red Wing de Aurora Ski Club stifte, wat ien fan 'e earste skyklubs yn hiele Noard-Amearika wie. It gebiet benoarden Red Wing is noch altiten in wichtich skygebiet yn 'e Feriene Steaten.

Susterstêden

• Ikata (Japan)
• Quzhou (Sina)
• Kongsberg (Noarwegen)

Demografy

Neffens gegevens fan 'e folkstelling fan 2010 wie doe fan 'e befolking fan Red Wing 18,2% âlder as 65 jier en 22,5% jonger as 18 jier. Fierders bestie 38,3% fan 'e húshâldings út ien persoan, wylst neffens âldere gegevens, fan 'e folkstelling fan 2000 doe 6,8% fan 'e befolking ûnder de earmoedegrins libbe. Wat de etnyske opbou fan 'e befolking oangiet, dy wie yn 2010 sa: 87,8% blanken; 3,7% Latino's; 2,2% Yndianen; 1,9% swarten; 0,8% Aziaten; 3,6% oaren of fan mingd etnysk komôf.

Keppelings om utens

• (in) Offisjele webside fan Red Wing

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Red Wing, Minnesota fan Wikimedia Commons.