Riverton (Wyoming)

Riverton (útspr.: ['ɹɪvǝɹtn], likernôch: "riw-wur-tun"; Arapaho: Hóóxonó’oo, útspr.: [hɔ:xɔnɔʔɔ:], likernôch: "hô-chòn-nò-ô") is in stêd yn Fremont County, yn it westen fan 'e Amerikaanske steat Wyoming. It makket diel út fan it Wind River Yndianereservaat (Wind River Indian Reservation). Neffens in offisjele skatting út 2012, op grûn fan gegevens fan 'e folkstelling fan 2010, hie Riverton doe krapoan 11.000 ynwenners.

Riverton
Bestjoer
Lân	Feriene Steaten
Steat	Wyoming
County	Fremont County
Sifers
Ynwennertal	10.971 (2012)
Oerflak	25,6 km² (ynkl. wetter) 25,5 km² (allinnich lân)
Befolkingsticht.	415,7 / km²
Hichte	1.509 m
Oar
Stifting	1906
Tiidsône	UTC -7
Simmertiid	UTC -6
Koördinaten	43°01′40″N 108°23′42″W
Offisjele webside
www.rivertonwy.gov
Kaart
De lizzing fan Riverton yn Fremont County en yn 'e steat Wyoming.

Skiednis

Riverton, dat sa neamd is om't dêr fjouwer rivieren byinoar komme, waard yn 1906 stifte op lân dat de Arapaho Stamme (Arapaho Tribe) en de Eastlike Sjosjoanestamme (Eastern Shoshone Tribe) fan it Wind River Yndianereservaat op lêst fan it Amerikaanske Kongres ôfstean moatten hiene foar kolonisaasje troch blanken. De stammen leine har lykwols net by dy gong fan saken del, en de tsierderij oer Riverton giet oant hjoed de dei troch. Yn desimber 2013 besleaten it Amerikaanske Miljeubeskermingsagintskip (EPA), it Ministearje fan Binnenlânske Saken en it Ministearje fan Justysje dat Riverton ûnderdiel útmakke fan it reservaat. Dêrmei liek de saak nei mear as in iuw fan strideraasje einlings besljochte te wêzen, mar yn 2014 focht de steat Wyoming dit beslút by de rjochter oan. It is op dit stuit (juny 2014) noch net bekend hoe't it úteinlik beteare sil.

Demografy

Neffens gegevens fan 'e folkstelling fan 2010 wie doe fan 'e befolking fan Riverton 15,2% âlder as 65 jier en 23,9% jonger as 18 jier. Fierders bestie 31,3% fan 'e húshâldings út ien persoan. Neffens âldere sifers, fan 'e folkstelling fan 2000, libbe doe 15,7% fan 'e befolking ûnder de earmoedegrins. Wat de etnyske opbou fan 'e befolking oangiet, dy wie yn 2010 sa: 74,5% blanken; 10,4% Yndianen; 9,0% Latino's; 0,5% swarten; 0,3% Aziaten; 5,3% oaren of fan mingd etnysk komôf.

Klimaat

Riverton hat in steppeklimaat, mei kâlde drûge winters en hjitte, justjes wietere simmers. Yn july, de waarmste moanne, is de trochsneed temperatuer oerdeis 31,7 °C, en yn jannewaris, de kâldste moanne, is dat –1,1 °C. Riverton kriget jiers trochinoar 223,1 mm delslach.

Sjoch ek

• it Wind River Yndianereservaat

Keppelings om utens

• (in) Offisjele webside fan Riverton

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.