Weiler (Boppard)

Weiler is ien fan de tsien Ortsbezirken fan de gemeente Boppard yn de Dútske dielsteat Rynlân-Palts. It plak leit boppe it Ortsbezirk Bad Salzig op in hichte fan likernôch 235 meter boppe de seespegel. By Weiler heart ek it loftkuerplakje Fleckertshöhe, dêr't it heechste punt fan de gemeente Boppard metten wurdt. Oant de gearfoeging fan Weiler by de nij foarme gemeente Boppard op 31 desimber 1975 wie Weiler in selsstannige gemeente.

Weiler
De Pitertsjerke fan Weiler
Bestjoer
Lân	Dútslân
Dielsteat	Rynlân-Palts
Landkreis	Rhein-Hunsrück-Kreis
Stedsyndieling	Boppard
Sifers
Befolkingsticht.	739 (2020)
Hichte	152 meter boppe seenivo
Oar
Postkoade	56154
Koördinaten	50° 11'N 7° 37'E
Kaart

It doarp Weiler waard yn in oarkonde fan de kening Konrad oan it Ursulakleaster yn Keulen foar it earst ûnder de namme Wilre neamd.

It besjen wurdich

• De roomske Sint-Pitertsjerke (Zur Peterskirche 1, 56154 Boppard)
• It útsichpunt Dünchen jout in moai útsjoch op it doarp en de oare kant fan de Ryn mei de boarch Sterrenberg en de boarch Liebenstein.
• It útsichtpunt Ziehlay, dat oan de kuierrûte Rheinburgenweg leit. Hjir stiet in houten byld fan in biddende non, makke troch Sigurd Bratzel. Foar de Twadde Wrâldkriich wie hjir in útstekkende rots dy't fan de Ryn ôf op in biddende non like. It natuermonumint waard ferneatige troch alliearde fleantúgen, dy't harren bommenlêst op Bad Salzig en Weiler dropten. Neffens in leginde wie de rots it ferstiende byld fan de non Angelika.

Leginde fan de non Angelika

Yn de Tritichjierrige Oarloch tôgen Sweedske troepen fan Gustaf Adolf al rôvjend troch de omkriten en doe't hja by it kleaster fan Weiler kamen, wist de non Angelika as iennige troch in geheime poarte oan it moardzjen fan de Sweden te ûntkommen. Hja waard lykwols sjoen en de Sweden besochten har yn te heljen. De non kaam op de Ziehlay oan en dêr begûn hja te bidden dat se troch ferstiening oan de moardners ûntkomme mocht. Doe't de Sweedske troepen op it plak oankamen wie de non ferdwûn. Hja mienden dat de non yn de bedelte stoarten wie, mar letter, doe't hja oan de Ryn oankamen, herkinden se yn de rots de ferstiende non.

De Sint-Pitertsjerke

De tsjerke fan Weiler waard yn de earste helte fan de 13e iuw yn romaanske styl boud. It skip mei in balkenplafond waard yn goatyske styl mei steunbearen tafoege. De barokke tsjerketoer datearret út de 18e iuw. It rjochthoekige koar is oerdekt mei in krúsribferwulft.

• 
  It barokke ynterieur
• 
  Fresko
• 
  Fesperbyld
• 
  Monstrâns

Keppeling om utens

Commons

Wikimedia Commons

Ofbylden dy't by dit ûnderwerp hearre, binne te finen yn de kategory Weiler (Boppard) fan Wikimedia Commons.