A Cinderella Story (filmsearje)

A Cinderella Story is in Amerikaanske filmsearje fan romantyske komeedzjes foar teenagers. De rige is betocht troch senarioskriuwster Leigh Dunlap en basearre op it bekende mearke Jiskepûster. Der binne (anno 2024) seis films, dy't los faninoar steane útsein dat it ferhalen fan itselde soarte binne. De filmsearje is eigendom fan filmstudio Warner Bros. It bekendste diel út 'e rige is A Cinderella Story út 2004, dat mei syn kommersjele súkses de oanset ta de filmsearje joech.

A Cinderella Story
betinker	Leigh Dunlap
eigner	Warner Bros.
lân	Feriene Steaten
begjinjier	2004
einjier	2021
films
langspylfilms	● A Cinderella Story ● Another Cinderella Story ● Once Upon a Song ● If the Shoe Fits ● Christmas Wish ● Starstruck
muzyk
soundtracks	● A Cinderella Story ● Another Cinderella Story ● Once Upon a Song ● If the Shoe Fits ● Christmas Wish ● Starstruck

Films

A Cinderella Story

De Wikipedy hat ek in side A Cinderella Story (film).

Yn A Cinderella Story wurdt Sam Montgomery (Hilary Duff), in teenagefamke yn Los Angeles, troch har styfmem Fiona (Jennifer Coolidge) as húshâldster en ûnbetelle hantsjemuoisfaam yn har restaurant brûkt, wylst se troch har beide styfsusters oan ien wei troch narre wurdt. Se is yn in chatroom op it ynternet yn kontakt kommen mei in leuke mar ûnbekende jonge, mei wa't se fia e-mail ôfpraat om inoar op in skoalfeest te moetsjen. It docht bliken dat de jonge de populêre Amerikaansk fuotbalspiler Austin Ames (Chad Michael Murray) is. Sam har bleuens, Austin syn hearrigens oan syn bazige heit, en moedwillige sabotaazje troch Sam har styfsusters driget Sam en Austin útinoar te hâlden, mar lang om let witte se alle obstakels te oerwinnen.

A Cinderella Story waard regissearre troch Mark Rosman nei in senario fan Leigh Dunlap. De film gie op 16 july 2004 yn premiêre. Nettsjinsteande strieminne resinsjes fan 'e filmkritisy brocht A Cinderella Story $70,1 miljoen op tsjin in budget fan $19 miljoen.

Another Cinderella Story

De Wikipedy hat ek in side Another Cinderella Story.

Yn Another Cinderella Story is Mary Santiago (Selena Gomez) de oannommen dochter fan 'e oan legerwâl rekke popstjer Dominique Blatt (Jane Lynch), mei't har ferstoarne mem ien fan Dominique har dûnseressen wie. Thús wurdt Mary troch Dominique en har beide gemiene biologyske dochters as in slavinne behannele, en op skoalle wurdt se troch har pleechsusters narre. De ferneamde popstjer Joey Parker (Drew Seeley) keart werom nei syn middelbere skoalle om syn eksamenjier te dwaan. Op in maskere bal dat de skoalle hâldt ta gelegenheid fan Falentynsdei reitsje Mary en Joey fereale opinoar.

Another Cinderella Story waard regissearre troch Damon Santostefano nei in senario fan Erik Patterson en Jessica Scott. De film waard op 26 septimber 2008 direkt-op-fideo útbrocht.

A Cinderella Story: Once Upon a Song

De Wikipedy hat ek in side A Cinderella Story: Once Upon a Song.

Yn A Cinderella Story: Once Upon a Song dreamt de santjinjierrige Katie Gibb (Lucy Hale) derfan om sjongster te wurden, mar yn it echte libben wurdt se oerwurke, narre en oan ien wei troch dwers sitten troch har styfmem Gail (Missi Pyle), har styfsuster Beverly (Megan Park) en har jongere styfbroer Victor (Matthew Lintz). As Luke (Freddie Stroma), de soan 'e direkteur fan platelabel Kensington Records, as nije learling op har skoalle komt, sjocht Katie har kâns skoan en stoppet se in demo-cd yn syn skoaltas. Underwilens makket Gail snoade plannen om foar Beverly in lukratyf platekontrakt by Kensington Records los te krijen troch har sjongen te dubben mei Katie har stimlûd. Oan Luke de taak om it famke te finen op wa har sjongen er fereale rekke is.

A Cinderella Story: Once Upon a Song waard regissearre troch Damon Santostefano nei in senario fan Erik Patterson en Jessica Scott. De film waard op 6 septimber 2011 direkt-op-fideo útbrocht.

A Cinderella Story: If the Shoe Fits

De Wikipedy hat ek in side A Cinderella Story: If the Shoe Fits.

Yn A Cinderella Story: If the Shoe Fits is Tessa (Sofia Carson) nei it ferstjerren fan har heit op 'e noed kommen is fan har boasaardige styfmem Divine (Jennifer Tilly). Dyselde en har dochters Athena (Amy Louise Wilson) en Olympia (Jazzara Jaslyn) meitsje har oan ien wei troch it libben soer. Op in stuit moat hja as helpster mei nei in hotel-resort dêr't har styfsusters audysje dogge foar in musical. Tessa falt as in blok foar de manlike haadrolspiler Reed West (Thomas Law). Om mei him yn kontakt te kommen, docht se temûk sels ek audysje. Se makket yndruk op Reed en regisseur Freddie Marks (David Ury), mar moat flechtsje om foar te kommen dat har styffamylje har op it poadium sjocht, wêrby't se ien fan har skuon ferliest.

A Cinderella Story: If the Shoe Fits waard regissearre troch Michelle Johnston nei in senario fan Elena Song. De film waard op 2 augustus 2016 direkt-op-fideo útbrocht.

A Cinderella Story: Christmas Wish

De Wikipedy hat ek in side A Cinderella Story: Christmas Wish.

A Cinderella Story: Christmas Wish giet oer Kat Decker (Laura Marano), dy't sûnt de dea fan har heit by har aaklike styfmem Deirdre (Johannah Newmarch) ynwennet, dêr't se oanhâldend narre wurdt troch har styfsusters Joy (Lillian Doucet-Roche) en Grace (Chanelle Peloso). Se twinge Kat om 'e húshâlding foar harren te dwaan en pakke ek noch it meastepart fan har lean ôf dat se kriget foar har wurk as sjongster yn Santa Land, in ferdivedaasjepark mei in krysttema. Nick Wintergarden (Gregg Sulkin), in nije wurknimmer fan Santa Land, rekket smoarfereale op Kat as er har foar it earst optreden sjocht. Wat nimmen wit, is dat Gregg syn heit Terrence (Barclay Hope) in miljardêr is en in âlde freon fan Kat har heit. Dyselde hat Deirdre en Kat útnûge om in goeddiedichheidsevenemint by te wenjen, mar Deirdre beslút ynstee Joy mei te nimmen en har trochgean te litten foar Kat.

A Cinderella Story: Christmas Wish waard regissearre troch Michelle Johnston nei in senario fan harsels. De film waard op 15 oktober 2019 direkt-op-fideo útbrocht.

A Cinderella Story: Starstruck

De Wikipedy hat ek in side A Cinderella Story: Starstruck.

Yn A Cinderella Story: Starstruck is Finley Tremaine (Bailee Madison) in plattelânsfamke út Idaho, dat op 'e pleats wennet by har wrede styfmem Valeria (April Telek). Dêr moat se al it smoarge en swiere wurk opknappe, har styfsuster en styfbroer betsjinje en by it fee yn 'e skuorre sliepe. Mei de bisten as har bêste freonen dreamt Finley derfan om in filmstjer te wurden. Wannear't der yn har wenplak in filmcrew út Hollywood delkomt om opnamen op lokaasje te dwaan, docht Finley har styfsuster Saffron (Lillian Doucet-Roche) audysje foar figurante. Finley beslút dat foarbyld te folgjen, mar har audysje misbeteart alhiel troch tadwaan fan har baarch. Yn alle gaos moetet se wol Jackson Stone (Michael Evans Behling), de haadrolspiler, dy't fuortendaliks ûnder har tsjoen rekket. Finley beslút it net op te jaan en ferklaait har as man om jitris audysje te dwaan. As cowboy Huck kriget se in rol yn 'e film, mar no moat se har geheim sjen te bewarjen foar har styffamylje en foar de oantreklike Jackson.

A Cinderella Story: Starstruck waard regissearre troch Michelle Johnston nei in senario fan harsels. De film waard op 29 juny 2021 direkt-op-fideo útbrocht.

Muzyk

Yn it ramt fan 'e filmsearje binne de folgjende soundtrackalbums ferskynd:

• 2004 – A Cinderella Story
• 2008 – Another Cinderella Story
• 2011 – A Cinderella Story: Once Upon a Song
• 2016 – A Cinderella Story: If the Shoe Fits
• 2019 – A Cinderella Story: Christmas Wish
• 2021 – A Cinderella Story: Starstruck

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.