Augustinertsjerke (Mainz)

De Augustinertsjerke (Dútsk: Augustinerkirche) is in barokke roomske tsjerke yn de Dútske stêd Mainz. Yn de Twadde Wrâldkriich bleau de tsjerke sparre foar skansearrings troch de swiere bombardeminten op de stêd. De op de fûneminten fan in midsiuwske tsjerke boude tsjerke is de tsjerke fan it biskoplike preesterseminaarje Sint-Bonifatius.

Augustinertsjerke Augustinerkirche
Lokaasje
lân	Dútslân
dielsteat	Rynlân-Palts
plak	Mainz
adres	Augustinerstraße
koördinaten	49° 59' N 8° 16' E
Tsjerklike gegevens
tsjerkegenoatskip	Roomsk-Katolike Tsjerke
bisdom	Mainz
Arsjitektuer
boujier	1768-1771
boustyl	Barok
Webside
Side seminaarje
Kaart

Skiednis

De tsjerke waard tusken 1768 en 1771 boud op it plak fan in sûnt 1260 boude goatyske tsjerke. De bouwers wiene de Augustiner hearemiten, dy't ek de foargonger boud hiene. Harren kleaster stie dêr sûnt 1260 oant de sekularisaasje fan 1803. De boumaster fan de tsjerke is ûnbekend.

Nei de opheffing fan it kleaster yn 1893 waarden de gebouwen it preesterseminaarje fan it doe wer stifte bisdom Mainz.

Arsjitektuer

Portaal biskoplike preesterseminaarje Sint-Bonifatius

De tsjerke is in let foarbyld fan barokke bou en wurdt troch de gebouwen fan it seminaarje en oare gebouwen omklamme. Allinne de foarse gevel is te sjen, dy't boppe de oare gebouwen fan de histoaryske binnenstêd útstekt.

Boppe it troch Nikolaus Binterim makke portaal is de kroaning fan Marije te sjen. De himelskeninginne wurdt tusken Augustinus fan Hippo, patroanhillige fan de Augustiner oarder, en syn mem Monika fan Tagaste útbylde.

Súdlik en eastlik fan de tsjerke binne de eardere 18e-iuwske kleastergebouwen en de tsjintwurdige gebouwen fan it seminaarje. De súdlike fleugel fan it kleaster hat ek in ryk portaal mei bylden fan Nikolaus Binterim.

It ynterieur fan de tsjerke niget nei de rokoko. It skip en it koer lykje in ienheid, in konsept dat faker yn de rokoko foarkomt.

Ynrjochting

De tsjerke makket troch de grutte alters en it plafondfresko, dat yn 1772 troch Johann Baptist Enderle oanbrocht waard, in tige rike yndruk.

Yn 'e tsjerke stiet boppedat in byld fan Marije mei Bern út 1420, dat út de baarnende en yn 1807 ôfbrutsen goatyske Leaffrouwetsjerke rêden wurde koe en letter in plak krige yn de Augustinertsjerke.

Oargel

It oargel fan de tsjerke is yn 1773 boud troch de bruorren Stumm. It is ien fan de seldsume letbarokke ynstruminten fan de oargelbouwers, dy't foar it measte orizjineel bleaun is. It oargel hat 31 registers op twa manualen en pedaal. De spyl- en registertraktueren binne mechanysk.

Ofbylden

• 
  Ynterieur
• 
  Fresko plafond
• 
  Haadalter

• 
  Stumm-oargel
• 
  Sydalters mei preekstoel en Marijebyld

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: Einzelnachweise en Literatur, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Augustinertsjerke, Mainz fan Wikimedia Commons.