Beamsniehinnen

De beamsniehinnen (wittenskiplike namme: Dendragapus) foarmje in skaai fan 'e klasse fan 'e fûgels (Aves), it boppeskift fan 'e goes- en hineftigen (Galloanserae), it skift fan 'e hineftigen (Galliformes), de boppefamylje fan 'e fazantfûgels (Phasianoidea), de famylje fan 'e fazanteftigen (Phasianidae), de ûnderfamylje fan 'e echte fazanten (Phasianinae) en de tûke fan 'e rûchpoathinnen (Tetraonini).

beamsniehinnen
In blauwe sniehin (Dendragapus obscurus).
Taksonomy
ryk:	dieren (Animalia)
stamme:	rêchstringdieren (Chordata)
ûnderstamme:	wringedieren (Vertebrata)
klasse:	fûgels (Aves)
ûnderklasse:	moderne fûgels (Neornithes)
tuskenklasse:	nijkakigen (Neognathae)
boppeskift:	goes- en hineftigen    (Galloanserae)
skift:	hineftigen (Galliformes)
boppefamylje:	fazantfûgels (Phasianoidea)
famylje:	fazanteftigen (Phasianidae)
ûnderfamylje:	echte fazanten (Phasianinae)
tûke:	rûchpoathinnen (Tetraonini)
skaai:	beamsniehinnen    (Dendragapus)
Elliot, 1864

Beskriuwing

Dit skaai omfettet twa soarten, dy't bercheftige kontreien yn it westen fan Noard-Amearika bewenje, de skiere sniehin yn it Kustberchtme by de kust fan 'e Stille Oseaan lâns en yn 'e Sierra Nevada, en de blauwe sniehin yn 'e Rocky Mountains. Foar it meastepart fan 'e tweintichste iuw waarden de beide soarten beskôge as ûndersoarten fan ien en deselde soarte. Yn 2004 die lykwols út ûndersyk nei it DNA fan 'e fûgels troch Barrowclough et al. bliken dat it wol deeglik twa ferskillende soarten wiene, sa't se oarspronklik yn 'e njoggentjinde iuw ek beskreaun wiene. De resultaten fan dat ûndersyk waarden yn 2006 akseptearre troch it Amerikaansk Ornitologysk Genoatskip (AOS).

Soarten

skaai beamsniehinnen (Dendragapus) blauwe sniehin (Dendragapus obscurus) skiere sniehin (Dendragapus fuliginosus)

Dêrnjonken binne der noch twa fossile soarten út it Let-Pleistoseen bekend: Dendrogapus gilli út 'e westlik-sintrale legere 48 steaten fan 'e Feriene Steaten, dy't earst yn it selsstannige monotypyske skaai Palaeotetrix pleatst wie, en Dendragapus lucasi, dy't inkeld bekend is út it Nasjonaal Monumint Fossil Butte yn Wyoming.

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side. Commons Wikimedia Commons  Ofbylden dy't by dit ûnderwerp hearre, binne te finen yn de kategory Dendragapus fan Wikimedia Commons.