Boarplatfoarm

In boarplatfoarm of boareilân is in grut bouwurk dat tarist is om yn 'e seeboaiem nei ierdoalje en/of ierdgas te sykjen en boarjen, it op te pompen, op te slaan en te ferwurkjen. It heart ta de offshoretechnyk. Der bestiet ûnderskie tusken in eigentlik boarplatfoarm, dat in ierdoalje- of ierdgasboarne siket en oanboarret, en in produksjeplatfoarm dat dêrnei ynset wurdt foar de ekploitaasje fan sa'n boarne. Lytsere boarplatfoarmen, dy't ek wol well protectors (boarnebeskermers) of satelliten neamd wurde, binne ornaris ûnbemanne. Gruttere boarplatfoarmen hawwe yn 'e regel in bemanning fan tusken de 100 en 200 man. Boarplatfoarmen komme almeast foar yn 'e ûndjippe seeën fan it kontinintaal plat foar de kust fan eilannen of fan it kontinintaal fêstelân, mar se kinne ek brûkt wurde yn marren, oarre binnenwetters en yn binnenseeën.

Fersprieding

Gebieten dêr't by útstek in protte boarplatfoarmen brûkt wurde, binne:

de Noardsee;
de noardlike râne fan 'e Golf fan Meksiko, by de súdkust fan 'e Feriene Steaten lâns;
de Atlantyske Oseaan foar de kusten fan Nigearia, Angoala, Brazylje en de Kanadeeske provinsjes Nij-Skotlân en Nijfûnlân en Labrador;
de Stille Oseaan foar de kust fan 'e Amerikaanske steat Kalifornje, it Russyske eilân Sachalin en de kusten fan Súdeast-Aazje, de Yndyske Arsjipel ynbegrepen;
de Yndyske Oseaan foar de súdwestkust fan Yndia;
de Perzyske Golf foar de kusten fan 'e Arabyske Golfsteaten;
de Kaspyske See foar de kust fan Azerbeidzjan;
de Noardlike Iissee foar de kust fan Sibearje, de Amerikaanske steat Alaska en de Noardwestlike Territoaria fan Kanada.

Soarten boarplatfoarmen

Ferskillende soarten boarplatfoarmen: 1 en 2) konvinsjonele fêste boarplatfoarmen; 3) compliant tower; 4, 5) tension-leg platform; 6) spar; 7, 8) healôfsinkber boarplatfoarm; 9) FPSO-fasiliteit; 10) sub-sea completion and tie-back-to-hostfasiliteit.

Der besteane ferskate soarten boarplatfoarmen. It wichtichste ûnderskie wurdt makke tusken fêste en driuwende platfoarmen. Fêste platfoarmen rêste op 'e seeboaiem troch in konstruksje fan stiel en beton. Soks is lykwols yn djipper wetter ûnwurkber. Dêr wurde boarskippen of healôfsinkbere boarplatfoarmen brûkt, dy't mei ankers of troch gebrûk fan in dynamic positioningsysteem op har plak holden wurde.

fêste boarplatfoarmen
- hefplatfoarm: in ferpleatsber platfoarm mei 3 of 4 hydraulysk beweechbere poaten dy't rikke kinne oant likernôch 150 m djipte
- condeeps, betonnen konstruksjes oant maksimaal likernôch 300 m djipte
- boarplatfoarm mei jackets: stielen konstruksjes dy't rikke kinne oant likernôch 400 m djipte
- compliant tower: in stielen konstruksje oant maksimaal likernôch 600 m djipte
driuwende boarplatfoarmen
- tension-leg platform: in fertikaal ôfmarre driuwend platfoarm, dat op syn plak holden wurdt troch keabels dy't oan lange peallen yn 'e seeboaiem ferankere binne
- spar: in silinderfoarmich boarplatfoarm dat ôfmarre wurdt mei sûchankers (de Perdido, in spar yn 'e Golf fan Meksiko, eksploitearret in oaljeboarne op in rekôrdjipte fan goed 2.400 m)
- healôfsinkber boarplatfoarm: in farber boarplatfoarm dat ôfmarre wurdt troch de pontons ûnder wetter sakje te litten en dan mei sûchankers oan 'e seeboaiem fêst te meitsjen of troch in dynamic positioningsysteem te brûken
- Floating Production, Storage and Offloading-fasiliteit (FPSO): in spesjaal soarte skip (foarhinne ornaris in omboude oaljetanker), dat boppe de oaljeboarne posisjonearre leit (de oalje wurdt dan ôffierd yn saneamde shuttle-tankers)

Boarnen, noaten en referinsjes

Boarnen, noaten en/as referinsjes:

Foar boarnen en oare literatuer, sjoch ûnder: References, op dizze side.

Wikimedia Commons

Ofbylden dy't by dit ûnderwerp hearre, binne te finen yn de kategory Oil platform fan Wikimedia Commons.