Taheakke
In taheakke (ôfkoarte ta tah.), bylage of appendiks is in bykommend dokumint dat oan in boek, rapport, skripsje, brief of e-mailberjocht fêstkeppele wurdt. Yn sa'n dokumint is oer it algemien eftergrûnynformaasje opnommen dy't de haadtekst ûnnedige lang meitsje soe. By in boek is in taheakke gauris in ferklearjende wurdlist of glossarium. By in sollisitaasjebrief wurdt faak as taheakke in curriculum vitae meistjoerd. By in e-mailberjocht wurdt in taheakke tsjintwurdich yn 'e foar it meastepart Ingelsktalige kompjûterterminology ek wol in attachment neamd.
Foarbylden
bewurkje seksjeIn goed en hiel bekend foarbyld fan taheakken by in wurk fan fiksje is The Lord of the Rings, fan 'e Ingelske skriuwer J.R.R. Tolkien. Dyselde foege oan syn magnum opus (neffens de paperbackedysje út 2001) mar leafst 103 siden oan taheakken ta (de ynhâldsopjefte net meirekkene). Dêryn jout er eftergrûnynformaasje oer de skiednis fan 'e troch him optochte wrâld Midierde, oer de kalinders dy't dêr brûkt wurde, oer de ôfstamming fan 'e haadpersoanen, oer de gronology fan syn ferhaal, oer de stavering en útspraak fan nammen, oer de talen fan syn elven en it skrift dêr't dy talen yn skreaun wurde, ensfh.
In foarbyld fan taheakken by in non-fiksjewurk is it mânske boek Adel in Friesland (1780-1880) fan Yme Kuiper, dat 58 siden taheakken omfiemet. Dy befetsje (fragminten fan) stambeammen fan 'e beskreaune slachten fan 'e Fryske adel; in opsomming fan aadlike famyljes yn Fryslân mei byhearrende aadlike titels en it jiertal fan ferheffing yn 'e adel; in list mei de famkesnammen fan froulju dy't yn 'e beskreaune perioade trouden mei Fryske eallju; in list mei patrysjers dy't yn dy snuorje trouden mei froulju út Fryske aadlike slachten; in list mei de sechstich rykste ynwenners yn Fryslân yn 1813/1814; listen mei de ynwenners fan Fryslân dy't yn 1821, 1851 en 1891 it heechst oanslein waarden foar belesting; en ferskate listen dy't ynsjoch jouwe yn 'e fermogensopbou fan 'e rykste ynwenners fan Fryslân.
| Boarnen, noaten en/as referinsjes: |
|