Kader Abdolah

Kader Abdolah (Perzysk: قادر عبدالله) is de skûlnamme fan Hossein Sadjadi Ghaemmaghami Farahani (Perzysk: حسین سجادی قائم‌مقامی فراهانی) (Arak, 12 desimber 1954), in Iraansk-Nederlânsk skriuwer. Hy hat him yn 1988 yn Nederlân fêstige. Het Huis van de Moskee is Abdolah syn bekendste en bêst ferkochte boek, en is útroppen ta de op ien nei bêste Nederlânske roman ea.

Kader Abdolah
skriuwer
Kader Abdolah (oktober 2008)
persoanlike bysûnderheden
echte namme	Hossein Sadjadi Ghaemmaghami Farahani
nasjonaliteit	Iraansk Nederlânsk
berne	12 desimber 1954
etnisiteit	Persysk
wurk
taal	Nederlânsk, Perzysk
sjenre	Roman, koart ferhaal, autobiografy, kollumn
bekendste   wurk(en)	Het Huis van de Moskee
útjouwer	De Geus, Prometheus
prizen	sjoch artikel
jierren aktyf	1980 – no
offisjele webside
http://www.kaderabdolah.nl/

Libben en wurk

Abdolah waard berne yn Arak. Fan syn tolfde ôf ferdjippe er him yn de westerske literatuer, om't er skriuwer hope te wurden lykas syn âlde pake syn heit Qhaem Megham Ferahni. Sadwaande krige er niget oan de westerske manier fan libjen dat noch sterker waard troch it stikem harkjen nei westerske radiostasjons en nei fersetsstjoerders.

Hy studearre natuerkunde oan de universiteit fan Teheran. Yn dy tiid sluet er him ek oan by in loftse partij dy't him fersette tsjin it bewâld fan de sjah en letter tsjin dat fan de ayatollahs. Abdolah skreau foar in yllegaal blêd en publisearre twa temûk ferskynde ferhalebondels ûnder de namme Kader Abdolah, in skûlnamme gearstald út de nammen fan twa eksekútearre freonen: Kader en Abdolah.

Nei syn oplieding gie er oan it wurk as direkteur fan in emballaazjefabryk, en bleau er ek polityk warber. Yn 1985 moast er Iran ûntflechtsje. Dêrta útnûge troch de Feriene Naasjes kaam er as polityk flechteling nei Nederlân. Hy bedarre yn 1988 yn in asylsikerssintrum yn Apeldoorn en krige neifolgjend in hûs yn Swol tawiisd. Dêr gie Abdolah oan 'e gong yn in natuerhistoarysk museum en yn in konservefabryk. Yn 2003 ferhuze er nei Delft. It Nederlânsk learde er ûnder oaren út berneboekjes fan Annie M.G. Schmidt en fan Nederlânsktalige poëzij. Yn 1993 koe er al debutearje mei de ferhalebondel De adelaars, dêr't er fuortendaliks de debutantepriis Het Gouden Ezelsoor foar krige.

Yn 2006 waard Abdolah gastskriuwer oan de universiteit Leien. Yn dat ramt jout er wurkkolleezjes en lêzingen.

Kader Abdolah hat in wyklikse kollumn yn de Volkskrant ûnder it pseudonym Mirza. Mirza is yn it Perzysk 'kronykskriuwer' én it is tagelyk de namme fan syn ferstoarne heit. Syn wurk giet oer it libjen yn en tusken twa kultueren en oer it libjen yn de diaspora.

Abdolah skreau it boekewikepresint fan 2011 mei it tema 'curriculum vitae - geschreven portretten', in novelle mei de titel De kraai.

Utjouwerij De Geus wie jierrenlang de útjouwer fan it wurk fan Kader Abdolah, mar sûnt 2014 wurde syn boeken útjûn troch útjouwerij Prometheus.

Kader Abdolah en syn dochter Bahar Abdolah

Bibliografy

• 1993 - De adelaars (ferhalen)
• 1995 - De meisjes en de partizanen (ferhalen)
• 1997 - De reis van de lege flessen (roman)
• 1998 - Mirza (kollumns)
• 2000 - Spijkerschrift (autobiografy)
• 2001 - De koffer (Oeriselsk boekewikepresint)
• 2001 - Een tuin in zee (kollumns)
• 2002 - Kélilé en Demné (Perzyske ferhalen opnij ferteld)
• 2002 - Sophia's droë vrugte (roman)
• 2002 - De koning
• 2003 - Portretten en een oude droom (roman)
• 2003 - Karavaan (columns, 2003)
• 2005 - Het huis van de moskee (roman)
• 2008 - Een gouden handdruk voor Du Perron
• 2008 - De Koran en De boodschapper (resp. 'in oersetting' en 'in fertelling')
• 2009 - Dit mooie land (kollumns)
• 2011 - De Koning (roman)
• 2011 - De kraai (novelle, boekewikepresint)
• 2012 - Zeesla en de lepels van Alice (ferhalen)
• 2014 - Papegaai vloog over de IJssel (roman)
• 2016 - Salam Europa (roman)
• 2017 - Het Gordijn
• 2018 - Het pad van de gele slippers
• 2019 - Farao van de Vliet (roman)
• 2020 - 1001 nacht, een hervertelling
• 2021 - Op zoek naar Ramona (roman)
• 2022 - Wat je zoekt, zoekt jou
• 2023 - Voordat het laat wordt

Prizen en nominaasjes

• Gouden Ezelsoor (bêst ferkochte debút) 1994 foar De adelaars.
• Charlotte Köhler Stipendium 1995 foar De meisjes en de partizanen.
• De meisjes en de partizanen by de AKO Literatuerpriis en de Libris Literatuer Priis by de lêste seleksje.
• Ek De reis van de lege flessen stie op de longlist fan de Libris Literatuer Priis.
• ASN-ADO-Mediapriis 1997 foar Mirza.
• Mundial Award foar syn fertsjinsten op it mêd fan ynternasjonale gearwurking, frede en feilichheid.
• By gelegenheid fan Keninginnedei 2000 beneamd ta Ridder yn de Oarder fan de Nederlânske Liuw foar syn krewearjen op it mêd fan literatuer, ynternasjonale gearwurking en frede.
• E. du Perronpriis 2001 foar Spijkerschrift.
• Het huis van de moskee is yn de Boekewike fan 2007 keazen ta it op ien nei bêste Nederlânske boek, nei De ontdekking van de hemel fan Harry Mulisch.
• De Frânske ûnderskieding 'chevalier dans l’Ordre des arts et des lettres' yn 2008 by it ferskinen fan de Frânske oersetting fan Het huis van de moskee.
• Earedoktoraat 2009 oan de Ryksuniversiteit Grins.

Literatuer

• Michiel van Kempen, 23 desimber 1978: Edgar Cairo’s earste kollumn foar de Volkskrant; 23 jannewaris 1996: Kader Abdolahs earste kollumns foar de Volkskrant; De Nederlandse taal als onderdrukker en bevrijder, yn: Kunsten in beweging 1980-2000; Cultuur en migratie in Nederland, redaksje Rosemarie Buikema en Maaike Meijer, 2004, sd. 19–35, Sdu - De Haach

Boarnen, noaten en referinsjes

Boarnen, noaten en/as referinsjes:

Ofbylden dy't by dit ûnderwerp hearre, binne te finen yn de kategory Kader Abdolah fan Wikimedia Commons.