Nôtdragershúske

It Nôtdragershúske (Nederlânsk en offisjeel: Korendragershuisje of ek wol Zakkendragershuisje) is in monumintaal hûs yn 'e Fryske stêd Frjentsjer. Foarhinne die dit gebou tsjinst as tolhûs foar de trochfier fan nôt. Tsjintwurdich hat it de funksje fan museum en de status fan ryksmonumint. It is yn it besit fan 'e Stifting Monuminten De Waadhoeke.

Nôtdragershúske Korendragershuisje
museum
Lokaasje
lân	Nederlân
provinsje	Fryslân
gemeente	De Waadhoeke
plak	Frjentsjer
adres	Eise Eisingastrjitte 28
koördinaten	53°11′15″ N 5°32′46″ E
Algemiene gegevens
type	histoarysk gebou
oprjochting	1975?
Arsjitektuer
namme gebou	Nôtdragershúske
type gebou	tolhûs
boujier	1634
boustyl	renêssansisme
monumint. status	ryksmonumint
monumintnûmer	15680
Offisjele webside
www.korendragershuisje.nl
Kaart
Lokaasje yn Frjentsjer.

Beskriuwing

It tolhûs waard yn 1634 boud yn in let-renêssansistyske boustyl mei maniëristyske eleminten. It hat in sealdak en in boppe de grêft oerkraagde (útstykjende) sydgevel. De halsgevel is foarsjoen fan klaustikken mei foluten. Op 'e foargevel fan it hûs binne seis sierlike muorre-ankers oanbrocht en teffens binne der fiif aparte gevelstiennen ynmitsele.

Op 'e meast yn it each springende gevelstien is in nôtmjitter te sjen dy't in nôtmjitte draacht mei de ynhâld fan in skepel. Oare gevelstiennen toane it wapen fan Frjentsjer (in goudkleurige klok op in blau fjild), en de letters TAK (foar Tol, Accijns, Korenmeten). De lêste beide gevelstiennen drage it wurd "Anno" en it jiertal "1634".

It Nôtdragershúske behold oant yn 'e tweintichste iuw yn oarspronklike funksje; oant yn 1937 hie de Gemeente Frjentsjer noch twa nôtmjitters yn 'e tsjinst. It Nôtdragershúske ûndergie yn 1924 en op 'e nij yn 1975 in restauraasje. Tsjintwurdich docht it tsjinst as in (fergees tagonklik) museum, dat beheind iepen is (anno 2018 allinne op snein en moandei).

Galery

• 
  de oerkraagde sydgevel
• 
  gevelstien mei in nôtmjitter
• 
  gevelstien mei it stedwapen fan Frjentsjer

Keppelings om utens

• (ned) Offisjele webside fan it Nôtdragershúske

Boarnen, noaten en referinsjes

Boarnen, noaten en/as referinsjes:

Stenvert, Ronald et al., Fryslân: Monumenten in Nederland, Deel 6, Seist/Swol, 2000 (Rijksdienst voor de Monumentenzorg/Waanders), ISBN 9 04 00 94 764. Commons Wikimedia Commons  Ofbylden dy't by dit ûnderwerp hearre, binne te finen yn de kategory Zakkendragershuisje, Franeker fan Wikimedia Commons.